1 I teie mahana ’ua ta’iruru mai te hō’ē ’āpo’ora’a nō te mau tahu’a rahi e piti ’ahuru ma maha, i te fare o Iosepha Semita, tamaiti, nā roto i te heheura’a, ’e ’ua ha’amata ihora rātou i te fa’anahonaho i te ’āpo’ora’a rahi nō te ’ēkālesia a te Mesia, ’e tei roto i te reira te mau tahu’a rahi hō’ē ’ahuru ma piti, ’e hō’ē ’e ’aore rā e toru peresideni, mai te au i te ’ohipa ’o tē ha’apa’ohia.

2 ’Ua fa’ata’ahia te ’āpo’ora’a rahi nā roto i te heheura’a nō te fa’a’āfarora’a i te mau fifi rahi ’o tē nehenehe e tupu mai i roto i te ’ēkālesia, ’o tē ’ore ho’i e ti’a ’ia fa’a’āfarohia e te ’ēkālesia ’e ’aore rā e te ’āpo’ora’a a te ’episekōpo, e māuruuru mai ai nā pae ato’a ra.

3 ’Ua fāri’ihia ’o Iosepha Semita, tamaiti, ’o Sidney Rigdon, ’e ’o Frederick G. Williams ’ei mau peresideni nā roto i te fa’aotira’a a te ’āpo’ora’a ; ’e ’o Iosepha Semita, metua, ’o John Smith, ’o Joseph Coe, ’o John Johnson, ’o Martin Harris, ’o John S. Carter, ’o Jared Carter, ’o Oliver Cowdery, ’o Samuel H. Smith, ’o Orson Hyde, ’o Sylvester Smith, ’e ’o Luke Johnson, ’ei mau tahu’a rahi, ’o tei mā’itihia ’ia riro ’ei ’āpo’ora’a tāmau nō te ’ēkālesia nā roto i te fa’aotira’a a te ’āpo’ora’a.

4 ’Ua anihia atu ra te mau melo nō te ’āpo’ora’a teitei i parauhia i ni’a nei ē, ’ua fāri’i ānei rātou i tō rātou mā’itira’a, ’e e rave ānei rātou i te ’ohipa nō taua tōro’a nei mai te au i te ture nō te ao ra, ’e ’ua pāhono mai ra rātou pā’āto’a ē, ’ua fāri’i rātou i tō rātou mau tōro’a, ’e e ha’apa’o ho’i rātou i tō rātou mau pi’ira’a mai te au i te aroha tā te Atua i nīni’i mai i ni’a ia rātou ra.

5 Te rahira’a melo nō te ’āpo’ora’a, ’o tei mā’iti nā ni’a i te i’oa nō te ’ēkālesia ’e nō te ’ēkālesia, nō te fa’ata’a i te mau melo nō te ’āpo’ora’a, ’o tei fa’a’itehia tō rātou mau i’oa i ni’a nei, e maha ’ahuru ma toru ïa, mai teie i pāpa’ihia i muri nei : e iva tahu’a rahi, hō’ē ’ahuru ma hitu peresibutero, e maha tahu’a, ’e hō’ē ’ahuru ma toru melo.

6 ’Ua mā’itihia ē : ’aita tō te ’āpo’ora’a rahi e mana ’ia rave i te ’ohipa maori rā tei reira e hitu a’e melo nō te ’āpo’ora’a ’o tei fa’a’itehia tō rātou mau i’oa i ni’a nei, ’e ’aore rā tō rātou mau mono i mā’itihia mai te au i te ture.

7 E mana tō teie mau ta’ata e hitu ’ia mā’iti i te tahi mau tahu’a rahi ’ē atu, ’o tā rātou e mana’o ē e mea ti’amā ’e e ti’a ia rātou ’ia rave maita’i i te ’ohipa ’ei mono nō te mau melo nō te ’āpo’ora’a ’o tei ’ore i tae mai.

8 ’Ua mā’itihia ē : ’Ia vata mai te hō’ē ti’ara’a i roto i te ’āpo’ora’a nā roto i te pohera’a, te ’īritira’ahia te tōro’a nō te ’ōfatira’a i te ture, ’e ’aore rā nō te haere-’ē-ra’a atu i rāpae i te mau ’ōti’a nō te fa’aterera’a o teie nei ’ēkālesia, e monohia ïa taua ti’ara’a nā roto i te mā’itira’a a te peresideni ’e ’aore rā te mau peresideni, ’e ’ia fa’ati’ahia e te reo o te ’āpo’ora’a rahi nō te mau tahu’a rahi i ha’aputuputuhia nō te reira ’ōpuara’a, ’ia rave i te ’ohipa nā roto i te i’oa nō te ’ēkālesia.

9 Te peresideni nō te ’ēkālesia, ’o ’oia ato’a ïa te peresideni nō te ’āpo’ora’a, ’ua fa’ata’ahia ’oia nā roto i te heheura’a, ’e ’ua fāri’ihia ho’i i roto i tāna fa’aterera’a nā roto i te reo nō te ’ēkālesia.

10 ’E ’ua au ho’i ïa i te tura nō tōna tōro’a ’ia peresideni ’oia i ni’a i te ’āpo’ora’a nō te ’ēkālesia ; ’e e ti’ara’a tōna ’ia tauturuhia ’oia e nā peresideni e to’opiti ra, ’o tei mā’itihia mai te au i tōna iho mā’itira’ahia.

11 ’E mai te mea ē ’aita te hō’ē ’e ’aore rā e piti ato’a o rāua ’o tei fa’ata’ahia nō te tauturu iāna i tae mai, e mana ïa tōna ’ia peresideni i ni’a i te ’āpo’ora’a ’aita tōna e tauturu ; ’e mai te mea ē ’aita ’oia iho i tae mai, e mana ïa tō te tahi atu nā peresideni ’ia peresideni ’ei mono nōna, ’o rāua to’opiti ato’a ’e ’aore rā te hō’ē noa o rāua.

12 ’E i te mau taime ato’a e fa’anahonahohia te hō’ē ’āpo’ora’a rahi nō te ’ēkālesia a te Mesia, mai te au i te hōho’a i fa’a’itehia mai i ni’a nei, e ’ohipa ïa nā te mau melo hō’ē ’ahuru ma piti ’ia tu’u i te kelero nā roto i te nūmera, ’e nā roto i te reira e ’ite ai ē ’o vai i rotopū i te ’ahuru ma piti ’o tē parau mai nā mua, e ha’amata i te nūmera hō’ē ’e nā reira noa ē tae noa atu i te nūmera hō’ē ’ahuru ma piti.

13 I te mau taime ato’a, ’ia ta’iruru mai teie nei ’āpo’ora’a nō te ha’apa’o i te hō’ē ’ohipa, e feruri te mau melo hō’ē ’ahuru ma piti ē e ’ohipa fifi ānei ’e ’aore ānei ; mai te mea ’aore ra, to’opiti noa iho melo nō te ’āpo’ora’a ’o tē parau mai nō ni’a i te reira, mai te au i te hōho’a i pāpa’ihia i ni’a nei.

14 Mai te mea rā ’ua mana’ohia e ’ohipa fifi te reira, to’omaha ïa tē fa’ata’ahia ; ’e mai te mea e mea fifi roa a’e, to’oono ïa ; ’eiaha rā eia hau a’e i te to’oono ’o tē fa’ata’ahia ’ia parau mai.

15 E ti’ara’a ho’i tō tei parihia, i roto i te mau ’ohipa ato’a, ’ia pāruruhia e te ’āfa ti’a nō te mau melo nō te ’āpo’ora’a, ’ia ’ore ’oia ’ia parau-fa’a’ino-hia ’e ’ia fa’ahapa-ti’a-’ore-hia.

16 ’E nā te mau melo nō te ’āpo’ora’a ’o tei fa’ata’ahia ’ia parau mai i mua i te ’āpo’ora’a e vauvau atu i te ’ohipa i mua ia rātou, i muri iho i te hi’opo’ara’ahia te mau ha’apāpūra’a i mua i te ’āpo’ora’a ; ’e e parau mai ho’i te mau ta’ata ato’a mai te au i te fāito ti’a mau ’e te parauti’a ho’i.

17 ’O te mau melo nō te ’āpo’ora’a ’o tē noa’a ia rātou te mau nūmera pea, ’oia ho’i, 2, 4, 6, 8, 10, ’e te 12, ’o rātou ïa te mau ta’ata ’o tē ti’a mai nō te pāruru i te ta’ata i parihia ra, ’ia ’ore ’oia ’ia parau-fa’a’ino-hia ’e ’ia fa’ahapa-ti’a-’ore-hia.

18 I roto i te mau ’āpo’ora’a ato’a, e ti’ara’a tō te ta’ata pari ’e tei parihia ho’i ’ia parau mai i te parau nō rāua iho i mua i te ’āpo’ora’a, i muri a’e i te fa’aro’ora’ahia te mau ha’apāpūra’a, ’e i te otira’a te parau a te mau melo ’o tei fa’ata’ahia ’ia parau nō ni’a i taua ’ohipa ra.

19 ’Ia oti te mau ha’apāpūra’a i te fa’aro’ohia, ’e ’ia oti te parau a te mau melo nō te ’āpo’ora’a, te parau a tei pari ’e a tei parihia ho’i, ’ei reira te peresideni e rave ai i te fa’aotira’a mai te au i te ’ite tei noa’a iāna nō ni’a i te reira ’ohipa, ’e e ani ho’i ’oia i te mau melo hō’ē ’ahuru ma piti nō te ’āpo’ora’a ’ia fa’ati’a mai i te reira nā roto i te mā’itira’a.

20 Terā rā, mai te mea e ’ite te toe’a o te mau melo nō te ’āpo’ora’a ’o tei ’ore i parau mai, ’e ’aore rā te hō’ē noa atu o rātou, ’ia oti te fa’aro’ora’ahia te mau ha’apāpūra’a ’e te mau parau pārurura’a ho’i ē, e hape tē vai ra i roto i te fa’aotira’a a te peresideni, e ti’a ïa ia rātou ’ia fa’a’ite mai i te reira, ’e e fa’aro’o-fa’ahou-hia te parau nō te reira ’ohipa.

21 ’E ’ia oti te fa’aro’o-fa’ahou-ra’a i te parau, mai te mea e ’itehia mai te hō’ē ma’a vāhi māramarama a’e nō ni’a i taua ’ohipa ra, e fa’ahuru-’ē-hia ïa te fa’aotira’a ’ia au i te reira.

22 Terā rā, mai te mea ’aita i noa’a te hō’ē ma’a vāhi māramarama a’e, e vai noa ïa te fa’aotira’a mātāmua, ’e tei te pae rahi ho’i o te ’āpo’ora’a te mana nō te fa’aoti i te reira.

23 Mai te mea e tupu te hō’ē fifi nō ni’a i te mau ha’api’ira’a tumu ’e ’aore rā i te mau parau tumu, ’e mai te mea ho’i ē ’aita i nava’i tei pāpa’ihia nō te ha’amāramarama mai i te ferurira’a o te mau melo nō te ’āpo’ora’a, e ti’a ïa i te peresideni ’ia ani ’e ’ia fāri’i ho’i i te hina’aro o te Fatu nā roto i te heheura’a.

24 E mana tō te mau tahu’a rahi, ’ia rātere ana’e rātou ’ia tītau ’e ’ia fa’anahonaho i te ’āpo’ora’a mai te au i tei fa’a’itehia mai iho nei, nō te fa’a’āfaro i te mau fifi, mai te mea e tītauhia mai e te hō’ē ’e ’aore rā e nā pae e piti nō taua fifi ra.

25 ’E e mana ho’i tō taua ’āpo’ora’a nō te mau tahu’a rahi ra, ’ia fa’ata’a i te hō’ē o rātou nō te peresideni i ni’a i taua ’āpo’ora’a ra nō te reira taime.

26 E riro ïa ’ei ’ohipa nā te reira ’āpo’ora’a ’ia hāpono ’oi’oi i te hōho’a parau i pāpa’ihia nō tā rātou mau ’ohipa, ’e te tā’āto’ara’a ho’i nō te mau parau fa’a’ite i ’āpitihia i ni’a i tā rātou fa’aotira’a, i te ’āpo’ora’a rahi nō te pū tōro’a ’ohipa a te Peresidenira’a Mātāmua nō te ’Ēkālesia.

27 Mai te mea ē ’aita te hō’ē ’e ’aore rā nā pae e piti i māuruuru i te fa’aotira’a a taua ’āpo’ora’a i parauhia ra, e nehenehe ia rātou ’ia tītau atu i te ’āpo’ora’a rahi i te pū tōro’a ’ohipa a te Peresidenira’a Mātāmua nō te ’Ēkālesia, ’e ’ia fa’aro’o-fa’ahou-hia, ’e e ha’apa’ohia te reira ’ohipa mai te au i te hōho’a i pāpa’ihia na, mai te mea ra ē, ’aore ā i fa’aotihia.

28 Teie ’āpo’ora’a a te mau tahu’a rahi i te ātea ra, e ani-noa-hia rātou nō te mau ’ohipa rave ’atā ana’e nō te ’ēkālesia ; ’e e’ita ho’i i te mea ti’a i te mau ’ohipa ri’i ato’a ’ia tītau i te reira huru ’āpo’ora’a.

29 Te mau tahu’a rahi rātere ’e ’aore rā ’o tei fa’aea noa i te vāhi hō’ē ra, e mana ïa tō rātou nō te fa’aoti ē e mea ti’a ānei ’ia tītau i te reira huru ’āpo’ora’a ’e ’aita ānei.

30 Tē vai nei te vāhi huru ’ē i rōpū i te ’āpo’ora’a rahi ’e ’aore rā te mau tahu’a rahi rātere i te ātea, ’e te ’āpo’ora’a rahi rātere o te tino hō’ē ’ahuru ma piti ’āpōsetolo, i roto i tā rātou mau fa’aotira’a.

31 I roto i te parau fa’aotira’a a te ’āpo’ora’a mātāmua, e nehenehe ’ia ani nō te ha’avā fa’ahou ; terā rā, i roto i te parau fa’aotira’a a te ’āpo’ora’a piti, ’aita roa ïa e ti’a.

32 E hi’o-noa-hia te fa’aotira’a a te ’āpo’ora’a piti e te huimana fa’atere rahi nō te ’ēkālesia mai te mea tē vai ra te ’ōfatira’a ture.

33 ’Ua fa’aotihia ē : e mana tō te peresideni ’e ’aore rā tō nā peresideni nō te pū tōro’a ’ohipa a te Peresidenira’a Mātāmua nō te ’Ēkālesia nō te fa’aoti, e mea ti’a ānei ’ia fa’aro’o-fa’ahou-hia te tahi fifi, ’ia oti te hi’opo’ara’a i te horora’a, te mau ha’apāpūra’a, ’e te mau parau fa’a’ite i ’āpitihia i ni’a iho i te reira.

34 ’Ua tu’u ihora te mau melo hō’ē ’ahuru ma piti nō te ’āpo’ora’a i te kelero, ’oia ho’i te parau mā’iti, ’ia ’itehia ē ’o vai tē parau nā mua, ’e ’o teie i muri nei te fa’aotira’a, ’oia ho’i : 1, Oliver Cowdery ; 2, Joseph Coe ; 3, Samuel H. Smith ; 4, Luke Johnson ; 5, John S. Carter ; 6, Sylvester Smith ; 7, John Johnson ; 8, Orson Hyde ; 9, Jared Carter ; 10, Iosepha Semita, metua ; 11, John Smith ; 12, Martin Harris.’Ia oti te pure, ’ua fa’aoti te ’āpo’ora’a.