1 ’O tō’u ïa hina’aro ’ia fa’ata’ahia ’e ’ia fa’atōro’ahia tō’u tāvini ra ’o Warren A. Cowdery ’ei tahu’a rahi peresideni nō tā’u ’ēkālesia i te fenua nō Freedom ’e nō te mau retioni ē ’ati noa a’e ;

2 ’E ’ia poro haere ho’i i tā’u ’evanelia mure ’ore, ’e ’ia fa’ateitei i tōna reo ’e ’ia fa’aara atu i te mau ta’ata, ’eiaha i tōna ana’e iho vāhi, ’āre’a rā i te mau mata’eina’a tāpiri mai ;

3 ’E ’ia fa’a’ohipa i te tā’āto’ara’a o tōna taime i roto i teie tōro’a teitei ’e te mo’a, ’o tā’u e hōro’a atu nei iāna i teienei, ma te tītau māite noa i te bāsileia o te ao ra ’e i tōna ra parauti’a, ’e e ’āmuihia atu te mau mea ato’a i tītauhia i te reira ; nō te mea ’ua au ho’i i te ta’ata rave ’ohipa tāna ra utu’a.

4 ’E teie fa’ahou ā, ’oia mau tē parau atu nei au ia ’outou na, tē fātata mai nei te taera’a mai o te Fatu, ’e e ro’ohia tō te ao nei i te reira mai te ta’ata ’eiā i te pō ra—

5 Nō reira, ’a tātua na i tō ’outou tau’upu, ’ia riro ’outou ’ei mau tamari’i nō te māramarama, ’e e ’ore roa ’outou e ro’ohia i te reira mahana mai te ta’ata ’eiā ra.

6 ’E teie fa’ahou ā, ’oia mau tē parau atu nei au ia ’outou na, e ’oa’oa rahi tō te ao ra ’a auraro ai tō’u tāvini ra ’o Warren i tā’u sēpeta ’e ’a fa’ata’a ’ē atu ai ’oia iāna iho i te mau ’ohipa parauti’a ’ore a te ta’ata nei ;

7 Nō reira, e ao tō tō’u tāvini ra ’o Warren, nō te mea e fa’atae atu vau i tō’u aroha i ni’a iāna ; ē, noa atu te te’ote’o o tōna ’ā’au, e fa’ateitei ā vau iāna i ni’a mai te mea e fa’aha’eha’a ’oia iāna iho i mua iā’u nei.

8 ’E e hōro’a atu vau i te aroha ’e te ti’aturira’a iāna nā roto i te reira e ti’a ai iāna ’ia ti’a noa mai i ni’a ; ’e mai te mea e tāmau noa ’oia ’ia riro ’ei ’ite ha’apa’o maita’i ’e ’ei māramarama i te ’ēkālesia ’ua fa’aineine ïa vau i te hō’ē korona nōna i roto i te mau aora’i o tō’u ra Metua. ’Oia ïa. ’Āmene.