Sección 108
Rrevelasiõ oñemeʼẽvaʼekue José Smith upe Proféta rupive, Kirtland, Ohio-pe, diciembre 26, 1835-pe. Ko sección ojehupytýkuri ojerurégui Lyman Sherman, pe mboyve oñeʼordenavaʼekue setenta, ha ouvaʼekue Proféta rendápe ojerure hag̃ua peteĩ rrevelasiõ oikuaaukátava chupe hembiaporã.
1–3, Lyman Sherman-pe oñeperdona hiʼangaipakuéra; 4–5, Haʼe ojeipapáta Tupao elder-kuéra imbaʼeguasuvéva apytépe; 6–8, Haʼe oñehenói omboʼe hag̃ua evanhélio ha omombarete hag̃ua ijoykeʼykuérape.
1 Añetehápe, che rembiguái Lyman, péicha heʼi ndéve Ñandejára: Oñeperdona ndéve ne angaipakuéra, reñeʼẽrendúgui che ñeʼẽpúre rejúvo koʼápe ko pyhareve, rehupyty hag̃ua ñemoñeʼẽ upe Che ahenoivaʼekuégui.
2 Upévare, topytuʼu ne ánga ne ñeime espiritual reheguápe, ha anive reñemoĩ che ñeʼẽpúre.
3 Epuʼã ha ejesarekove koʼág̃a guive tenondeve gotyo, reñongatúvo umi vóto rejapovaʼekue ha rejapóva, ha rejehovasáta jehovasa tuichaitéva reheve.
4 Ehaʼarõ pyʼaguapýpe oñehenói peve che rembiguaikuéra asamblea solemne; upérõ ejegueromanduʼáta che elder-kuéra peteĩhándi, ha rehupytýta pe derécho, ordenasiõ rupive, che elder-kuéra rembyre Che aiporavovaʼekuéndi.
5 Péina ápe, kóva haʼe Túva promésa ndéve g̃uarã, rejeroviareko meméramo.
6 Ha oñekumplíta ndéve g̃uarã ára reguereko jave derécho remboʼe hag̃ua che evanhélio, oimeraẽ tenda Che romondohápe, upe ára guive tenondeve gotyo.
7 Upévare, emombarete nde joykeʼykuérape opa ne ñemongetápe, opa ne ñemboʼépe, opa ne ñemokyreʼỹme, ha opa ne rembiapópe.
8 Ha péina ápe, péicha, Che aime nendive rohovasa ha romosãso hag̃ua tapiaite g̃uarã. Amén.