Vahe 131
Ko e ngaahi akonaki naʻe fai ʻe Siosefa Sāmita ko e Palōfitá, ʻi Leimasi, ʻi ʻIlinoisi, ʻi he ʻaho 16 mo e 17 Mē, 1843.
1–4, ʻOku mahuʻinga ʻa e mali fakasilesitialé ki hono maʻu ʻo e hakeakiʻi ʻi he langi taupotu tahá; 5–6, ʻOku fakamatalaʻi ʻa e anga hono fakamaʻu ʻo e tangatá ki he moʻui taʻengatá; 7–8, Ko e laumālié kotoa pē ko e meʻa ia.
1 ʻI he nāunau fakasilesitialé ʻoku ʻi ai ʻa e ngaahi langi pe ngaahi tuʻunga ʻe tolu;
2 Pea ko e meʻa ʻe maʻu ai ʻa e tuʻunga māʻolunga tahá, kuo pau ke kau ha tangata ʻi he angá ni ʻo e lakanga fakataulaʻeikí [ko e ʻuhinga ki he fuakava foʻou mo taʻengata ʻo e malí];
3 Pea kapau ʻe ʻikai te ne kau ki ai, ʻe ʻikai te ne lava ke maʻu ia.
4 Te ne lava ʻo hū ki he tuʻunga ʻe tahá, ka ko e ngataʻanga ia ʻo hono puleʻangá; ʻe ʻikai te ne lava ʻo maʻu ha tupulaki.
5 (Mē 17, 1843.) Ko e lea papau ange ʻo e kikité ko hono ʻuhingá ko hono ʻiloʻi ʻe ha tangata kuo fakamaʻu hake ia ki he moʻui taʻengatá, ʻi he fakahā pea mo e laumālie ʻo e kikité, tuʻunga ʻi he mālohi ʻo e Lakanga Fakataulaʻeiki Toputapú.
6 ʻOku ʻikai lava ke fakamoʻui ha tangata ʻi he taʻeʻiló.
7 ʻOku ʻikai ke ʻi ai ha meʻa ʻe pehē ko ha meʻa ʻoku ʻikai ke ʻi ai ha meʻa. Ko e laumālie hono kotoa pē ko e meʻa ia, ka ʻoku pelepelengesi ʻaupito pe haohaoa ia, pea ʻoku ʻikai lava ke sio ki ai ka ʻi he mata pē ʻoku haohaoa ange;
8 ʻOku ʻikai te tau lava ʻo mamata ki ai; ka ʻo ka fakahaohaoaʻi hotau sinó te tau mamata ʻo ʻiloʻi ai ko e meʻa kotoa ia.