Sigaba 25
Sembulo lesaniketwa ngaJoseph Smith umPhrofethi, eHarmony, ePennssylvania, kuKholwane 1830. (buka sihloko sesigaba 24). Lesembulo lesi siveta intsandvo yeNkhosi ku-Emma Smith, umfati wemPhrofethi.
1–6, Emma Smith, inkhosikati lekhetsiwe, ubitelwa kusita nekudvudvuta umyeni wakhe; 7–11, Uphindze ubitelwa kubhala, kuchaza ngalokugcwele imibhalo lengcwele, nekukhetsa emaculo; 12–14, Liculo lalabalungile lingumthandazo eNkhosini; 15–16, Timiso tekutfobela kulesembulo lesi tisebenta kubo bonkhe bantfu.
1 Lalela livi leNkhosi Nkulunkulu wakho, ngesikhatsi ngikhuluma nawe, Emma Smith, ndvodzakati yami; ngoba ngicinisile ngitsi kuwe, bonkhe labo labemukela livangeli lami bangemadvodzana nemadvodzakati embusweni wami.
2 Sembulo ngikunika sona mayelana nentsandvo yami; futsi uma wetsembekile uphindze uhamba etindleleni tekulunga phambi kwami, ngitawulondvolota imphilo yakho, uyawutfola lifa eSiyoni.
3 Buka, tono takho ticolelwe, futsi uyinkhosikati lekhetsiwe, lengiyibitile.
4 Ungavungami ngenca yetintfo longakatiboni, ngoba tisegodliwe kuwe nasemhlabeni, lokukuhlakanipha kimi ngesikhatsi lesitako.
5 Futsi umsebenti welubito lwakho kuyawuba kudvudvuta inceku yami, Joseph Smith, lomNcane, umyeni wakho, etinhluphekweni takhe, ngemavi endvudvuto, ngemoya webumnene.
6 Futsi uyawuhamba naye ngesikhatsi sekuhamba kwakhe, ube ngumbhali wakhe, uma kute lotawumbhalela, kute ngitfumele inceku yami, Oliver Cowdery, noma ngukuphi lapho ngitawumtfumela khona.
7 Futsi uyawubekwa ngaphansi kwesandla sakhe kute uchaze ngalokugcwele imibhalo lengcwele, nekukhutsata libandla, njengoba uyawukwembulelwa nguMoya wami.
8 Ngoba uyawubeka tandla takhe etikwakho, uphiwe Moya loNgcwele, nesikhatsi sakho uyawusinikela ekubhaleni, nasekufundzeni lokuningi.
9 Futsi ukudzingeki wesabe, ngoba umyeni wakho uyawukwesekela ebandleni; ngoba lubito lwakhe kusita bona, kute tonkhe tintfo tembulwe kubo, noma yini lengiyifisako, ngekwelukholo lwabo.
10 Futsi ngicinisile ngitsi kuwe uyawubeka eceleni tintfo talomhlaba, ufune tintfo temhlaba loncono.
11 Futsi uyawuphindze uniketwe umsebenti, wekukhetsa emaculo langcwele, njengoba uyawukwembulelwa, loko lokutsandzekako kimi, kute agcinwe ebandleni lami.
12 Ngoba umphefumulo wami uyajabula ngeliculo lenhlitiyo; yebo, liculo lalabalungile lingumthandazo kimi, futsi liyawugcwaliswa ngesibusiso etikwabo.
13 Ngaloko-ke, jabula enhlitiyweni yakho utfokote, ubambelele etivumelwaneni lowutentile.
14 Chubeka ube nemoya webumnene, ucaphele kutikhukhumeta. Vumela umphefumulo wakho ujabule ngemyeni wakho, neludvumo loluyawukuta kuye.
15 Gcina imiyaleto yami njalo, futsi umchele wekulunga uyawutfola. Ngaphandle kwekutsi ukwente loku, lapho ngikhona angeke ute.
16 Futsi ngicinisile ngicinisile, ngitsi kuwe, leli livi lami kubo bonkhe. Amen.