Vahe 32
Fakahā naʻe foaki mai ʻia Siosefa Sāmita ko e Palōfitá kia Paʻale P. Pālati mo Saipa Pitasoni, ʻi Manisesitā, ʻi Niu ʻIoke, he konga kimuʻa ʻo ʻOkatopa 1830. Naʻe fai ha tokanga mo ongoʻi ha holi lahi ʻe he kau kaumātuʻá fekauʻaki mo e kakai Leimaná, ʻi he ilo ʻe he Siasí honau tāpuaki kuo talaʻofá mei he Tohi ʻa Molomoná. Ko hono olá, naʻe fai ha lotu tāumaʻu ke fakahā ʻe he ʻEikí Hono finangaló pe ʻoku totonu ke fekauʻi atu e kaumātuʻá he taimi ko iá ki he matakali ʻInitia ʻi he Hihifó. Naʻe fai mai ai e fakahaá.
1–3, ʻOku ui ʻa Paʻale P. Pālati mo Saipa Pitasoni ke malanga ki he kau Leimaná pea ke na fononga fakataha mo ʻŌliva Kautele mo Pita Uitemā ko e Siʻí; 4–5, Kuo pau ke na lotu ke maʻu ha ʻilo ki he ngaahi folofolá.
1 Pea ko ʻeni, ko e meʻa ki heʻeku tamaioʻeiki ko Paʻale P. Pālatí, vakai, ʻoku ou pehē kiate ia ʻo hangē ʻoku ou moʻuí ʻoku ou loto ke ne fakahā ʻa ʻeku ongoongoleleí, pea ako ʻiate au, pea angavaivai mo angamalū.
2 Pea ko e meʻa kuó u tuʻutuʻuni kiate iá, ke ne ʻalu mo ʻeku ongo tamaioʻeiki ko ʻŌliva Kautele mo Pita Uitemā, ko e Siʻí, ki he feituʻu maomaonganoá ʻi he lotolotonga ʻo e kau Leimaná.
3 Pea ke nau ʻalu foki mo Saipa Pitasoni; pea ko au foki te u ʻalu mo kinautolu, pea te u ʻi honau lotolotongá; pea ko honau taukapo au ki he Tamaí, pea ʻe ʻikai ikunaʻi ʻa kinautolu ʻe ha meʻa.
4 Pea te nau tokanga ki he meʻa ʻa ia kuo tohí, pea ʻoua naʻa nau fakangalingali tokua kuo nau maʻu mo ha toe fakahā kehe; pea ke nau lotu maʻu ai pē koeʻuhi ke u fakamatalaʻi ia ke mahino kiate kinautolu.
5 Pea te nau tokanga ki he ngaahi leá ni ʻo ʻikai fakavaʻivaʻinga, pea te u tāpuakiʻi ʻa kinautolu. ʻĒmeni.