Tufa’a 32
E heheura’a tei hōro’ahia nā roto ia Iosepha Semita te peropheta, ia Parley P. Pratt ’e Ziba Peterson, i Manchester, i New York i te ’ōmuara’a o te ’āva’e ’Ātopa 1830. ’Ua tupu te mana’o rahi ’e te mau hina’aro pāpū i roto i te mau peresibutero ’ia roa’a te ’ite ia rātou nō ni’a i te mau ’āti Lamana, ’oia ho’i nō ni’a i te mau ha’amaita’ira’a i tohuhia na nō rātou ’e ’o tā te ’Ēkālesia e ’ite ra ē ’ua fa’a’itehia i roto i te Buka a Moromona. Nō reira, ’ua ani atu ra rātou i te Fatu ’ia fa’a’ite mai i tōna hina’aro ē e mea ti’a ānei ’ia tono atu i te mau peresibutero i taua taime ra i te mau nūna’a Inidia i te tō’o’a o te rā. Teie te heheura’a i hōro’ahia mai.
1–3, ’Ua pi’ihia Parley P. Pratt ’e Ziba Peterson ’ia ha’api’i atu i te ’evanelia i te mau ’āti Lamana ’e ’ia pe’e atu ia Oliver Cowdery ’e Peter Whitmer, tamaiti ; 4–5, ’Ua tītauhia rātou ’ia pure nō te ha’amāramaramara’a nō ni’a i te mau pāpa’ira’a mo’a.
1 ’E i teienei, nō ni’a i tō’u tāvini ra ia Parley P. Pratt, inaha, tē parau atu nei au iāna, mai iā’u e ora nei, ’ua ti’a iā’u ’ia poro haere ’oia i tā’u nei ’evanelia ’e ’ia ha’api’i mai i te mau mea nō’u nei, ’e ’ia vai te marū ’e te ha’eha’a i roto i te ’ā’au.
2 ’E ’o tā’u i fa’ata’a nāna ra, ’oia ho’i ’ia haere atu ’oia nā muri iho i tō’u nā tāvini ra ia Oliver Cowdery rāua ’o Peter Whitmer, tamaiti, i roto i te mēdēbara i rotopū i te mau ’āti Lamana.
3 ’E e haere ato’a ’o Ziba Peterson nā muri iho ia rātou. E haere ato’a atu vau i pīha’i iho ia rātou ’e e pārahi ho’i i rotopū ia rātou ; ’e ’o vau ho’i tō rātou ti’a i mua i te Metua, ’e ’aita rātou e tāpe’ahia e te hō’ē noa atu mea.
4 ’E e ha’apa’o rātou i tei pāpa’ihia ra, ’e ’eiaha ho’i e parau fa’ahua noa i te tahi heheura’a ’ē atu ; ’e e pure tāmau noa rātou, ’ia ha’amāramarama vau i te reira i roto i tō rātou ferurira’a.
5 ’E e ha’apa’o ho’i rātou i teie nei mau parau, ’e ’eiaha ho’i e fa’ariro ’ei mea faufa’a ’ore, ’e nā’u e ha’amaita’i ia rātou. ’Āmene.