ພາກທີ 33
ການເປີດເຜີຍທີ່ມອບໃຫ້ຜ່ານໂຈເຊັບ ສະມິດ ຜູ້ເປັນສາດສະດາ ແກ່ເອຊະຣາ ແຕ ແລະ ນອດທະໂຣບ ສະວີດ, ທີ່ເມືອງເຟແອດ, ລັດນິວຢອກ, ເດືອນຕຸລາ 1830. ໃນການແນະນຳການເປີດເຜີຍນີ້, ປະຫວັດຂອງໂຈເຊັບ ສະມິດ ຢືນຢັນວ່າ “ພຣະຜູ້ເປັນເຈົ້າ … ພ້ອມສະເໝີທີ່ຈະແນະນຳຄົນທີ່ສະແຫວງຫາຢ່າງພາກພຽນດ້ວຍສັດທາ.”
1–4, ຄົນງານໄດ້ຖືກເອີ້ນໃຫ້ປະກາດພຣະກິດຕິຄຸນໃນຊົ່ວໂມງທີສິບເອັດ; 5–6, ສາດສະໜາຈັກໄດ້ຮັບການສະຖາປະນາຂຶ້ນ, ແລະ ຜູ້ທີ່ຖືກເລືອກຈະຖືກເຕົ້າໂຮມເຂົ້າກັນ; 7–10, ຈົ່ງກັບໃຈ, ເພາະອານາຈັກສະຫວັນໃກ້ເຂົ້າມາເຖິງແລ້ວ; 11–15, ສາດສະໜາຈັກຖືກສ້າງຂຶ້ນໄວ້ເທິງດານຫີນແຫ່ງພຣະກິດຕິຄຸນ; 16–18, ຈົ່ງຕຽມສຳລັບການສະເດັດມາຂອງເຈົ້າບ່າວ.
1 ຈົ່ງເບິ່ງ, ເຮົາກ່າວກັບເຈົ້າ, ຜູ້ຮັບໃຊ້ຂອງເຮົາ ເອຊະຣາ ແລະ ນອດທະໂຣບ, ວ່າຈົ່ງເປີດຫູຂອງເຈົ້າ ແລະ ເຊື່ອຟັງສຸລະສຽງຂອງພຣະຜູ້ເປັນເຈົ້າອົງເປັນພຣະເຈົ້າຂອງເຈົ້າ, ຊຶ່ງ ຖ້ອຍຄຳມີຊີວິດ ແລະ ມີພະລັງ, ແຫລມຄົມຫລາຍກວ່າດາບສອງຄົມ, ຊຶ່ງຈະແຍກທັງຂໍ້ຕໍ່ ແລະ ໄຂໃນກະດູກ, ຈິດວິນຍານ ແລະ ວິນຍານອອກຈາກກັນ; ແລະ ພຣະອົງຫລິງເຫັນຄວາມນຶກຄິດ ແລະ ຄວາມເຈດຕະນາຂອງໃຈ.
2 ເພາະຕາມຈິງ, ຕາມຈິງແລ້ວ, ເຮົາກ່າວກັບເຈົ້າວ່າ ເຈົ້າໄດ້ຖືກເອີ້ນໃຫ້ເປັ່ງສຽງຂອງເຈົ້າດັ່ງກັບ ສຽງແກ, ເພື່ອປະກາດພຣະກິດຕິຄຸນຂອງເຮົາໃຫ້ແກ່ລຸ້ນທີ່ຄົດໂກງ ແລະ ເສຍຄົນນີ້.
3 ເພາະຈົ່ງເບິ່ງ, ທົ່ງກໍຂາວພ້ອມແລ້ວທີ່ຈະເກັບກ່ຽວ; ແລະ ນີ້ຄືຊົ່ວໂມງ ທີສິບເອັດ, ແລະ ເທື່ອສຸດທ້າຍທີ່ເຮົາຈະເອີ້ນຄົນງານໃຫ້ເຂົ້າໄປໃນສວນອະງຸ່ນຂອງເຮົາ.
4 ແລະ ສວນອະງຸ່ນຂອງເຮົາກັບມາ ເສຍໄປໝົດທຸກບ່ອນ; ແລະ ບໍ່ມີໃຜເຮັດ ຄວາມດີ ນອກຈາກຈຳນວນໜ້ອຍໜຶ່ງເທົ່ານັ້ນ; ແລະ ພວກເຂົາເຮັດ ຄວາມຜິດພາດຫລາຍຢ່າງເພາະ ການຫລອກລວງຂອງປະໂລຫິດ, ທຸກຄົນມີຈິດໃຈເສື່ອມຊາມ.
5 ແລະ ຕາມຈິງ, ຕາມຈິງແລ້ວ, ເຮົາກ່າວກັບເຈົ້າ, ວ່າ ສາດສະໜາຈັກນີ້ ເຮົາໄດ້ ສະຖາປະນາມັນຂຶ້ນ ແລະ ເອີ້ນໃຫ້ອອກມາຈາກຖິ່ນແຫ້ງແລ້ງກັນດານ.
6 ແລະ ແມ່ນແຕ່ເຊັ່ນນັ້ນ ເຮົາຈະ ເຕົ້າໂຮມຜູ້ທີ່ຖືກເລືອກໄວ້ຂອງເຮົາຈາກ ສີ່ສ່ວນຂອງແຜ່ນດິນໂລກ, ແມ່ນແຕ່ຫລາຍຕໍ່ຫລາຍຄົນທີ່ຈະເຊື່ອໃນເຮົາ, ແລະ ເຊື່ອຟັງສຽງຂອງເຮົາ.
7 ແທ້ຈິງແລ້ວ, ຕາມຈິງ, ຕາມຈິງແລ້ວ, ເຮົາກ່າວກັບເຈົ້າ, ວ່າທົ່ງກໍຂາວພ້ອມແລ້ວທີ່ຈະເກັບກ່ຽວ; ດັ່ງນັ້ນ, ຈົ່ງເດ່ກ່ຽວຂອງເຈົ້າອອກໄປ, ແລະ ເກັບກ່ຽວດ້ວຍສຸດພະລັງ, ຄວາມຄິດ, ແລະ ກຳລັງຂອງເຈົ້າ.
8 ຈົ່ງ ເປີດປາກຂອງເຈົ້າ ແລະ ມັນຈະຖືກເຮັດໃຫ້ເຕັມ, ແລະ ເຈົ້າຈະກາຍເປັນແມ່ນແຕ່ເໝືອນດັ່ງ ນີໄຟໃນສະໄໝບູຮານ, ຜູ້ໄດ້ເດີນທາງຈາກເຢຣູຊາເລັມໄປໃນຖິ່ນແຫ້ງແລ້ງກັນດານ.
9 ແທ້ຈິງແລ້ວ, ຈົ່ງເປີດປາກຂອງເຈົ້າ ແລະ ຢ່າຢັບຢັ້ງໄວ້, ແລະ ເຈົ້າຈະໜັກດ້ວຍ ຟ່ອນເຂົ້າຢູ່ເທິງບ່າຂອງເຈົ້າ, ເພາະເບິ່ງແມ, ເຮົາຢູ່ນຳເຈົ້າ.
10 ແທ້ຈິງແລ້ວ, ຈົ່ງເປີດປາກຂອງເຈົ້າ ແລະ ມັນຈະຖືກເຮັດໃຫ້ເຕັມ, ກ່າວວ່າ: ຈົ່ງ ກັບໃຈ, ຈົ່ງກັບໃຈເຖີດ, ແລະ ຈົ່ງຕຽມທາງຂອງພຣະຜູ້ເປັນເຈົ້າ, ແລະ ເຮັດໃຫ້ທາງຂອງພຣະອົງຊື່ຕົງ; ເພາະອານາຈັກສະຫວັນໃກ້ເຂົ້າມາເຖິງແລ້ວ;
11 ແທ້ຈິງແລ້ວ, ຈົ່ງກັບໃຈ ແລະ ຮັບ ບັບຕິສະມາ, ເຈົ້າທຸກຄົນ, ເພື່ອການປົດບາບຂອງເຈົ້າ; ແທ້ຈິງແລ້ວ, ລົງໄປໃນນ້ຳຮັບບັບຕິສະມາ, ແລະ ຈາກນັ້ນການບັບຕິສະມາດ້ວຍໄຟ ແລະ ດ້ວຍພຣະວິນຍານບໍລິສຸດ ຈະມາເຖິງ.
12 ຈົ່ງເບິ່ງ, ຕາມຈິງ, ຕາມຈິງແລ້ວ, ເຮົາກ່າວກັບເຈົ້າ, ນີ້ຄື ພຣະກິດຕິຄຸນຂອງເຮົາ; ແລະ ຈົ່ງຈື່ຈຳໄວ້ວ່າ ພວກເຂົາຕ້ອງມີສັດທາໃນເຮົາ ຖ້າບໍ່ດັ່ງນັ້ນພວກເຂົາບໍ່ມີທາງທີ່ຈະລອດໄດ້ເລີຍ;
13 ແລະ ເທິງ ດານຫີນນີ້ ເຮົາຈະສ້າງສາດສະໜາຈັກຂອງເຮົາຂຶ້ນ; ແທ້ຈິງແລ້ວ, ເທິງດານຫີນນີ້ ເຈົ້າຈະຖືກສ້າງຂຶ້ນ, ແລະ ຖ້າຫາກເຈົ້າດຳເນີນຕໍ່ໄປ, ປະຕູນະລົກຈະເອົາຊະນະເຈົ້າບໍ່ໄດ້.
14 ແລະ ເຈົ້າຈົ່ງຈື່ຈຳທີ່ຈະຮັກສາ ກົດ ແລະ ພັນທະສັນຍາຂອງສາດສະໜາຈັກ.
15 ແລະ ຜູ້ໃດກໍຕາມທີ່ມີສັດທາ ເຈົ້າຈົ່ງ ຢືນຢັນເຂົ້າໃນສາດສະໜາຈັກຂອງເຮົາ, ໂດຍການວາງ ມື, ແລະ ເຮົາຈະມອບ ຂອງປະທານແຫ່ງພຣະວິນຍານບໍລິສຸດໃຫ້ເຂົາ.
16 ແລະ ພຣະຄຳພີມໍມອນ ແລະ ພຣະຄຳພີທີ່ສັກສິດ ໄດ້ຖືກມອບໃຫ້ຈາກເຮົາເພື່ອເປັນ ການແນະນຳແກ່ເຈົ້າ; ແລະ ອຳນາດວິນຍານຂອງເຮົາເຮັດໃຫ້ທຸກສິ່ງມີ ຊີວິດຊີວາ.
17 ດັ່ງນັ້ນ, ຈົ່ງຊື່ສັດ, ຈົ່ງອະທິຖານສະເໝີ, ຕັດໄສ້ຕະກຽງຂອງເຈົ້າ ແລະ ໃຫ້ມັນລຸກຢູ່, ແລະ ມີນ້ຳມັນຢູ່ນຳເຈົ້າ, ເພື່ອວ່າເຈົ້າຈະຕຽມພ້ອມໃນການສະເດັດມາຂອງ ເຈົ້າບ່າວ—
18 ເພາະຈົ່ງເບິ່ງ, ຕາມຈິງ, ຕາມຈິງແລ້ວ, ເຮົາກ່າວກັບເຈົ້າ, ວ່າເຮົາ ມາຢ່າງໄວ. ແມ່ນເປັນດັ່ງນັ້ນ. ອາແມນ.