Vahe 40
Ko e fakahā naʻe fai kia Siosefa Sāmita ko e Palōfitá mo Sitenei Likitoni, ʻi Feieti, ʻi Niu ʻIoke, ʻi he ʻaho 6 Sānuali, 1831. Ki muʻa ʻi heʻene tohi ʻa e fakahā ko ʻení ʻoku pehē ʻe he hisitōlia ʻa e Palōfitá, “Ko e meʻa ʻi he siʻaki ʻe Sēmisi [Kovili] ʻa e folofola ʻa e ʻEikí, ʻo ne foki ki heʻene ngaahi akonaki mo e kakai ʻi muʻá, ko ia naʻe fai mai ai ʻe he ʻEikí kiate au mo Sitenei Likitoni ʻa e fakahā ko ʻení” (vakai ki he vahe 39).
1–3, ʻOku hanga ʻe he manavahē ki he fakatangá mo e ngaahi tokanga ki he māmaní ʻo fakatupu hono fakafisingaʻi ʻo e ongoongoleleí.
1 Vakai, ko e moʻoni ʻoku ou pehē kiate kimoua, naʻe totonu ʻi hoku ʻaó ʻa e loto ʻo ʻeku tamaioʻeiki ko Sēmisi Kovilí, he naʻá ne fuakava mo au ke ne talangofua ki heʻeku leá.
2 Peá ne tali ʻa e leá ʻi he loto fiefia, ka naʻe ʻahiʻahiʻi leva ia ʻe Sētane; pea ko e manavahē ki he fakatangá pea mo e tokanga ki he māmaní naʻe fakatupu ʻa ʻene fakafisingaʻi ʻa e leá.
3 Ko ia, naʻá ne maumauʻi ʻa ʻeku fuakavá, pea ʻoku toe pē kiate au ke u fai kiate ia ʻo fakatatau mo e meʻa ʻoku hā ngalingali lelei kiate aú. ʻĒmeni.