Wóltaʼii 46
Diyin Yá Yáłtiʼí Joseph Smith díí diyingo bił ííshją́ą́ ályaa éí sodizin daʼatahahígíí yee yił hodoolnih biniyé, Kirtland, Ohiodi, Wóózhchʼį́į́d 8, 1831 yihahgo. Díí Sodizin tʼóó haalwodyę́ędą́ą́ʼ, Sodizinjí áłah náʼádleeh bikʼehgo áłah ndaʼadleehígíí tʼah doo łaʼ hadilnééh da ńtʼę́ę́ʼ. Ákótʼée ndi, nighaidę́ę́ʼ sodizin daʼatahígíí dóó tʼáá íiyisíí Sodizin ndeiłkaahígíí tʼéiyá bááh dóó tó bikʼi sohodizindi áłah ńdaadleeh ńtʼę́ę́ʼ áádóó tʼáá ákótʼáo Sodizingóó áłah nídaʼadleeh daazlį́į́ʼ. Díí diyingo ííshją́ą́ ályaaígíí éí Diyin Bóhólníihii yinízinígíí bikʼehgo sodizin áłah ndaadleeh doo éí yikʼi déezʼį́į́ʼ dóó haitʼáo yilwoł dóó Bí ánínígíí bikʼehgo Iiʼ Sizį́ Diyinii aʼílyéii biká áhátʼį́į doo dóó ákótʼáo hazhóʼí bił béédahoozįįł.
1–2, Elders éí Iiʼ Sizį́ Diyinii bikʼehgo áłah nídaahłeeh doo yidííniid; 3–6, Tʼáá aaníinii hadeinitáhígíí sodizindi tó dóó bááh dílzin biniyé áłah naʼádleeh éí doo bichʼįʼ baa hóchįʼ da doo; 7–12, Diyin God ndeidółkid dóó Iiʼ Sizį́ Diyinii aa dahalyéii bíká ádaahtʼį́; 13–26, Diyingo aa dahalyéii tʼáá ałʼąą ádaatʼéego aa dahaasyá; 27–33, Sodizin yinaatʼáanii danilínígíí éí adziilii Iiʼ Sizį́ Diyinii aa dahalyéii aidiiʼaahii bił béédahózingo baa dahaasyá.
1 Daʼíísínółtsʼą́ą́ʼ, O shisodizinjí daʼnohtahígíí; háálá tʼáá aaníigo nihichʼįʼ haasdziih áko dah bee nidiʼdíílééł dóó íhwiidiilʼááł biniyé nihił hóoneʼ.
2 Azhą́ éí ńdaháásdzo ndi, shisodizin haalwodyę́ędą́ą́ʼ elders díí baa dahaasyá, dóó tʼáá ákótʼée doo, éí éíí tʼáá ałtso áłah ndaʼadleeh Iiʼ Sizį́ Diyinii binahjįʼ dóó bikʼehgo ádaalʼį́į doo.
3 Ákótʼée ndi áłah ndaahdleehgóó tʼáadoo háiida chʼídahinółchéhé, éí nihokááʼ dineʼé bichʼįʼ ąąʼ ádaatʼée doo.
4 Áádóó ałdóʼ ánihidishní sodizin daʼatahígíí bááh dóó tó bikʼi sohodizin áłah naʼádleehdóó tʼáadoo chʼídahinołchéhé; ákótʼée ndi, łaʼ doo ákoʼiilaagóó, bááh dóó tó bikʼi sohodoozįįdígíí doo choyoołʼį́į da doo ádaa ńdaʼooskan dóó doo ákoʼiilaaígíí hashtʼéíyiidlaago índa.
5 Áádóó Shí díí bee nihichʼįʼ hanáánásdziih, diyingo hazʼą́ tʼáá íiyisíí háíídeezʼį́įʼgo tʼáadoo bááh dóó tó bikʼi sohodizin áłah aleehdééʼ chʼídahinołchéhé—Díí sodizin tʼah doo yidahidiikáhígíí ááłdishní.
6 Áádóó díí bee nihichʼįʼ hanáánásdziih, éí tó bee alzį́į́h baa ńdadoohtʼįįł biniyé, áko doo łaʼ sodizinjí atah nilį́į́góó, tʼáá íiyisíí diyin bił hazʼą́ądi hádeidéezʼį́į́ʼgo, doo chʼídadínóołkał da.
7 Ákondi tʼáá ałtsojįʼ Diyin God nideídółkid, éí tʼáá nííkʼeh doo; dóó Iiʼ Sizį́ Diyinii tʼáá aaníigo nihił halneʼgo éí nihijéí tʼáá átʼéé ńtʼę́ę́ʼ díí nidzingo bidaʼdohłííł, shidááhdóó yáʼátʼéehgo wohkahgo, éí nihoníyáadi yisdániʼdookahígíí baa ntsídaahkeesgo, dóó tʼáá ałtsóníjįʼ sodizin dóó ahééh hwiindzin bee ádaʼołʼį́įgo, áko níłchʼi bidaʼiiníziinii bindaʼnitin, doodago chʼį́įdii bindaʼnitin doo deisínółtsʼą́ą́ da doo, éí doodago nihokááʼ dineʼé bibee hazʼáanii, háálá łaʼ nihokááʼ dineʼé bitsʼą́ą́dę́ę́ʼ, dóó łaʼ éí chʼį́įdii bedaʼ iiníziinii bitsʼą́ą́dééʼ ádaatʼé.
8 Éí bąą, ádaaʼákonohsin áko doo yooʼanihidínóotʼah da; áádóó aa dahalyéii tsʼídá aláahdiígíí bíká ádaahtʼį́ áko doo yooʼanihiʼdinóotʼah da; haʼátʼíí biniyé nihaa dahaasyáhígíí tʼáá áłahjįʼ béédaałniih;
9 Háálá tʼáá aaníigo nihichʼįʼ haasdziih, éí ayóó ádashóónínígíí dóó tʼáá átʼé shibee hazʼáanii yikʼe dahółʼínígíí bá dooleełgo aa dahaasyá, áádóó ákódaʼdoolííłgo yíká ádaatʼínígíí; áko tʼáá ałtso yíká ádaatʼínígíí dóó yíndaʼídiłkidígíí bikáʼaʼdoowoł, áko bee yitʼį́į dooígíí doo yíndaʼádíłkid da doo éí atsʼíseekʼehgo bił dahonéenih tʼéiyá biniyé deiyókeed.
10 Áádóó ałdóʼ, tʼáá aaníigo nihichʼįʼ haasdziih, tʼáá áłahjįʼ béédaałniih, dóó díí aa dahalyéii tʼáá áłahjįʼ nihiniʼ biyiʼ baa ntsídaahkees, éí sodizin daʼatahígíí baa dahaasyá.
11 Háálá doo tʼáá ałtso díí aa dahalyéii baa dahaasyáa da; háálá aa dahalyéii tʼóó adahayóí, dóó Diyin God biʼIiʼ Sizíinii binahjįʼ diné tʼááłáʼí nízínígo aa dahalyéii baa dahaasyá.
12 Łaʼ éí tʼááłáʼígo baa dahaasyá, áádóó nááná łaʼ éí łahgo átʼéhígíí bee yílyá, áko tʼáá átʼé bee badaʼdoodił.
13 Áádóó nááná łaʼ éí Iiʼ Sizį́ Diyinii binahjįʼ Jesus Christ Diyin God yiYeʼ nilíigo bił béédahodoozįįł, dóó tsin ałnáozʼá bikáaʼjįʼ bił oʼoolkaalgo nihokááʼ dineʼé bibąąhági ádaatʼéii yá yikʼé nináʼnídlá.
14 Łaʼ éí bizaad deiyoodlą́ągo baa dahaasyá, áko daʼoodlą́ągo ałdóʼ hoolʼáágóó iiná baa dahidoolyééł.
15 Áádóó ałdóʼ, łaʼ éí Iiʼ Sizį́ Diyinii binahjįʼ daʼníłʼąą ádaatʼéego ndaʼanish bił béédahodoozįįł, éí tʼáá éí Diyin Bóhólníihii bił yáʼátʼééh doo, Diyin Bóhólníihii íínízinígíí bikʼehgo, beʼajoobaʼ bee nihokááʼ dineʼé baʼáłchíní bił ádahootʼéhígíí bikʼehgo yaa yiilé.
16 Áádóó ałdóʼ, Iiʼ Sizį́ Diyinii binahjįʼ ałʼąą ádaatʼéego daʼíníshígíí bił béédahodoozįįł, éí daatsʼí Diyin God bitsʼą́ą́dę́ę́ʼ, Iiʼ Sizį́ Diyinii hoł ííshją́ą́ íídoolííł áko diné bee bikʼihozhdoodliił.
17 Áádóó ałdóʼ, tʼáá aaníigo nihichʼįʼ haasdziih, łaʼ, Diyin God biʼIiʼ Sizíinii, saad bee hódzáanii baa dahalyé.
18 Nááná łaʼ éí saad bee ééhózinígíí baa dahalyé, áko tʼáá áłtso ndabidiʼnitingo yee dahóyą́ą doo dóó bił éédahózin doo.
19 Áádóó ałdóʼ, łaʼ éí bidaʼoodląʼ binahjįʼ nídaadziih doo;
20 Áádóó nááná łaʼ éí naʼáłdziih yoodlą́ągo baa dahaasyá.
21 Áádóó ałdóʼ łaʼ, álileekʼehjí éʼélínígíí baa dahidoolyééł;
22 Áádóó nááná łaʼ éí diyingo ádahodooníłígíí yaa dahalneʼgo baa dahodoolyééł;
23 Áádóó nááná łaʼ éí iiʼ naazíinii yaa ákonízingo yiniih doo.
24 Áádóó ałdóʼ, ła éí ałʼąą átʼéego saad yee yádaałtiʼgo deiniih doo;
25 Áádóó nááná łaʼ éí saad bee ataʼ haneʼ yee yiniih doo.
26 Áádóó díí tʼáá ałtso aa dahalyéii Diyin God bitsʼą́ą́dę́ę́ʼ átʼé, háálá Diyin God baʼáłchíní yee átʼée dooleeł biniyé.
27 Áádóó sodizin bibishop danilíinii, éí Diyin God bisodizin yikʼidadéezʼį́įgo bee bikʼidahodiiniiʼ dóó daalzį́į́ʼ éí sodizin biʼelders danilį́, éí aa dahaasyéii tʼáá ałtso ałʼąą ádaatʼéego bił béédahózin doo ákótʼée ndi łaʼ nihitahdóó tʼóó adaʼdilʼį́ éí doo Diyin God bitsʼą́ą́dóó ádaatʼée da.
28 Áádóó baa hodoolzhish tʼáá háíshį́į́ Iiʼ Sizį́ Diyiniikʼehgo naʼádíłkidígíí éí Iiʼ Sizį́ Diyiniikʼehgo baʼdoolyééł;
29 Áko łaʼ éí díí tʼáá ałtso aaʼ dahalyéii baa dahodoolyééł, áko łaʼ aláahdigo dah oolééł doo, áko tʼáá ałtso sodizin daʼatahígíí bee bikáʼadoowoł.
30 Tʼáá háíshį́į́ Iiʼ Sizį́ Diyiniikʼehgo naʼádíkidgo éí Diyin God íínízinígííkʼehgo naʼádíłkid doo; ákohgo yínaʼádíłkidígíí bikʼehgo beʼdoolnííł.
31 Áádóó ałdóʼ, Shí nihichʼįʼ haasdziih, tʼáá ałtsóní óʼoolʼįįł éí Christ bízhiʼ binahjįʼ ádaalʼį́į doo, tʼáá ałtso Iiʼ Sizį́ Diyinii bikʼehgo ádaʼoołʼį́įgo;
32 Áádóó Diyin God Iiʼ Sizį́ Diyiniikʼehgo ahéheeʼ dabidohní éí tʼáá haʼátíí shį́į́ bee nihikʼidahojisdliʼígíí bá.
33 Áádóó tsʼídá yáʼátʼéehgo dóó dahodínohsingo tʼáá áłahjįʼ shidááh ádaʼołʼį́į doo. Tʼáá ákótʼée doo. Amen.