Wóltaʼii 47
Diyin Yá Yáłtiʼí Joseph Smith díí diyingo bił ííshją́ą́ ályaa, Kirtland, Ohiodi, Wóózhchʼį́į́d 8, 1831 yihahgo. John Whitmer, éí Diyin Yá Yáłtiʼí yá naaltsoos ííłʼíní nilį́į ńtʼę́ę́ʼ, éí Oliver Cowdery binaanish bikékʼehjįʼ adíínááł dóó ádíílííł biʼdooniid, éí Sodizinjí binákééʼ náháneʼ dóó diyingo ił ííshją́ą́ ádaʼalʼínígíí baa naʼiyíízóóh doo, áko éí áłtsé yichʼįʼ niʼ silį́į́ʼ. Kóníigo íʼiilaa, “Shí éí doo íínisin da ndi Diyin Bóhólníihii íínízinígíí bikʼehgo doo, áádóó yinízingo éí, Joseph Diyingo Ooʼíinii yee yił ííshją́ą́ íídoolííł nisin.” Joseph Smith díí bił ííshją́ą́ ályaago, John Whitmer tʼáá áko níigo naanish baa deitʼánígíí yee ákáʼeelwod.
1–4, John Whitmer éí Sodizin binákééʼ náháneʼ dóó Diyin Yá Yáłtiʼí yá naʼiizóóh doogo bee bikʼihodiiniiʼ.
1 Áko shooh, shá naalʼaʼí John éí naʼadzoh dóó éí éíí tʼáá ahą́ą́h nákééʼ náháneʼ neizohgo neiʼáa doo, shá naalʼaʼí Joseph, níkáʼanálwoʼ doo, éí tʼáá ałtsoní nił ííshją́ą́ álʼínígíí néyiizóóh doo, éí nááná łaʼ naanish bee bikʼinááhodiiniiʼjįʼ índa.
2 Áádóó ałdó, tʼáá aaníigo nichʼįʼ haasdziih éí ałdóʼ áłah aleehdi hanádzihgo bá ahóótʼiʼ doo, tʼáá bá nahooʼaahgi.
3 Áádóó áłdóʼ, tʼáá aaníigo nichʼįʼ hanáánásdziih sodizinjí ádahoonííł dóó tʼáá ahą́ą́ʼ nákééʼ náháneʼ néíyiizóóh doo; háálá Oliver Cowdery éí Shí nááná łahjí naanish bee bikʼináádiishniiʼ.
4 Ákohgo, tʼáá akééʼ sizį́įgo, Aaʼáhályáanii yinahjįʼ, díí neidiyoozohígíí, bił ííshją́ą́ íídoolííł. Tʼáá ákótʼée doo. Amen.