Wóltaʼii 53
Diyin Yá Yáłtiʼí Joseph Smith díí diyingo bił ííshją́ą́ ályaa éí Algernon Sidney Gilbert yee yił hodoolnih biniyé, Kirtland, Ohiodi, Yaʼiishjááshchilí 8, 1831 yihahgo. Sidney Gilbert naʼídíłkidígíí binahjįʼ, Diyin Yá Yáłtiʼí bikʼis Gilbert yindoolnish dóó Sodizinjí bee bikʼihodidoonihígíí yá Diyin Bóhólníihii neiyídéíłkid.
1–3, Sidney Gilbert éí Sodizin biyiʼ elder dooleełgo bíká ádooʼniidgo nídiiltį́; 4–7, Áádóó ałdóʼ bishop yíkáʼanálwoʼí nilį́į doo.
1 Áko shooh, shá naalʼaʼí Sidney Gilbert, kónidishní, nisodizin sidétsʼą́ą́ʼ; áádóó nashídííníłkid áko Diyin Bóhólníihii niDiyin God, bitsʼą́ą́dééʼ nił bééhodoozįįł, sodizin biyiʼ ninaanish dóó ádíílííł bídéétʼígíí, éí shí, Diyin Bóhólníihii, díí akéedi dayoołkáałdi hadiishłaa.
2 Áko shooh, Shí, Diyin Bóhólníihii, tsin ałnáozʼá bikáaʼjįʼ shił oʼoolkaalgo nihokááʼ dineʼé bibąąhági ádaatʼéii bá bikʼé nináʼníshdlá, nihokááʼ bikáaʼgi doo dadiyinígíí nahjįʼ kódíílííł biniyé bee hazʼáanii łaʼ naa nílá.
3 Sheʼoʼoolʼįįł ádąąhninílé, elder dííleeł, áko oodląʼ dóó ádaa náʼookąąh dóó bąąhági ádaatʼéii bá yóóʼahididootʼááł, bee haasdzíʼígíí bikʼehgo, bee naʼnitin doo áádóó Iiʼ sizį́ Diyinii atsiitʼááh dah adéesniiʼgo aahalyéhígíí ałdóʼ;
4 Áádóó ałdóʼ díí sodizinjí ákaʼanánílwoʼígíí éí bishop haaígi ákaʼadíílwołígíí yee nikʼididoolnih, éí bee hazʼáanii náasdi baa dahodoonihígíí bikʼehgo.
5 Áádóó ałdóʼ, Shí tʼáá aaníigo nichʼįʼ haasdziih, shá naalʼaʼí Joseph Smith, Jun. dóó Sidney Rigdon bił chʼaadííkah.
6 Áko shooh, díí tsʼídá áłtsé ádaʼoolʼįįł naahidoolyééł; łaʼígíí éí tʼah índa naahidoolyééł, shidáʼákʼehgi nishínílnishígíí bikʼehgo.
7 Áádóó ałdóʼ, díí bikʼeʼdidíítį́į́ł háiida yéego idiilkaalígíí tʼéiyá yisdádoogááł. Tʼáá ákótʼée doo. Amen.