Vahe 54
Ko e fakahā naʻe fai mai ʻia Siosefa Sāmita ko e Palōfitá kia Niueli Naiti, ʻi Ketilani, ʻOhaiō, ʻi he ʻaho 10 Sune, 1831. Naʻe loto kehekehe ʻa e kāingalotu naʻe nofo ʻi Tomasoní, ʻi ʻOhaiō, ʻo kau ki ha ngaahi fehuʻi fekauʻaki mo hono fakatapui ʻo e ngaahi koloá. Naʻe hā mai ʻa e siokitá mo e mānumanú. Hili ʻene ngāue fakafaifekau ki he kau Sieká (vakai ki he ʻuluʻi fakamatala ki he vahe 49), kuo maumauʻi ʻe Līmani Kopelī ʻa ʻene fuakava ke fakatapui ha konga lahi ʻo ʻene fāmá ke hoko ko ha tofiʻa ʻo e Kāingalotu ʻoku hiki mai mei Kolesivili, Niu ʻIoké. Ko hono olá, ne ō mai ai ʻa Niueli Naiti (ko e taki ʻo e kāingalotu ne nofo ʻi Tomasoní) mo ha niʻihi ʻo e kaumātuʻá ki he Palōfitá ʻo fehuʻi kiate ia pe ko e hā te nau faí. Naʻe fehuʻi ai ʻe he Palōfitá ki he ʻEikí ʻo ne maʻu ai ʻa e fakahā ko ʻení, ʻo fekau ʻa e kāingalotu ʻi Tomasoní ke nau mavahe mei he faama ʻa Līmani Kopelií pea fononga ki Mīsuli.
1–6, Kuo pau ke tauhi ʻe he Kāingalotú ʻa e fuakava ʻo e ongoongoleleí ke nau maʻu ʻa e ʻaloʻofá; 7–10, Kuo pau ke nau faʻa kātaki ʻi he faingataʻá.
1 Vakai, ʻoku folofola peheni ʻe he ʻEikí, ʻa ia ko e ʻĀlifá mo e ʻŌmeká, ʻa e kamataʻangá mo e ngataʻangá, ʻio ko ia ia naʻe kalusefai koeʻuhi ko e ngaahi angahala ʻa e māmaní—
2 Vakai, ko e moʻoni, ko e moʻoni, ʻoku ou pehē kiate koe, ʻa ʻeku tamaioʻeiki ko Niueli Naití, ke ke tuʻu maʻu ʻi he lakanga ʻa ia kuó u fili koe ki aí.
3 Pea kapau ʻoku loto ʻa ho kāingá ke nau hao mei honau ngaahi filí, tuku ke nau fakatomala mei heʻenau ngaahi angahala kotoa pē, pea hoko ʻo loto-fakatōkilalo moʻoni ʻi hoku ʻaó mo loto-fakatomala.
4 Pea ko e meʻa ʻi he maumauʻi ʻo e fuakava naʻa nau fai mo aú, ko ia kuo fakataʻeʻaongaʻi ia pea kuo hoko pē ʻo taʻeʻaonga.
5 Pea ʻe malaʻia ia ʻa ia ʻoku tupu mei ai ʻa e fakahala ní, he naʻe lelei ange kiate ia ʻo kapau naʻe melemo ia ʻi he loto moaná.
6 Ka ʻoku monūʻia ʻa kinautolu ʻa ia naʻa nau tauhi ʻa e fuakavá mo tauhi ʻa e fekaú, he te nau maʻu ʻa e ʻaloʻofa.
7 Ko ia, mou ʻalu atu pea hola leva mei he fonuá, telia naʻa haʻu kiate kimoutolu ʻa homou ngaahi filí; pea fai hoʻomou fonongá, pea fili ʻa ia ʻoku mou loto ke hoko ko homou takimuʻá, pea ke maʻu mo totongi ʻa e paʻanga maʻamoutolu.
8 Pea ʻe pehē hoʻomou fai hoʻomou fononga ki he ngaahi potu ʻi he feituʻu fakahihifó, ki he fonua ko Mīsulí, ki he ngaahi ngataʻanga fonua ʻo e kau Leimaná.
9 Pea ʻi he hili hoʻomou fonongá, vakai ʻoku ou pehē kiate kimoutolu, ke mou ngāue ke maʻu haʻamou moʻui ʻo hangē ko e anga ʻo e kakaí, kae ʻoua ke u teuteu ha potu moʻomoutolu.
10 Pea ko e tahá, ke mou faʻa kātaki ʻi he faingataʻá kae ʻoua ke u haʻu; pea vakai, ʻoku ou haʻu vave, pea ko ʻeku totongí ʻoku ʻiate au, pea ko kinautolu kuo nau kumi vave kiate aú te nau ʻilo ʻa e fiemālie ki honau laumālié. ʻE pehē. ʻĒmeni.