Sigaba 54
Sembulo lesaniketwa ngaJoseph Smith umPhrofethi kuNewel Knight, eKirtland, e-Ohio, mhlaka 10 iNhlaba, 1831. Emalunga eliBandla labekahlala eThompson, e-Ohio abehlukene ekhatsi ngeludzaba lolumayelana nekunikelwa kwemphahla. Bugovu nemhobholo kwabonakala. Emvakwekutfunywa kwakhe kumaShakers (buka sihloko sesigaba 49), Leman Copley wasephula sivumelwano sakhe sekunikela lipulazi lakhe lelikhulu njengendzawo yelifa lalabaNgcwele labebafika besuka eColesville, eNew York. Ngenca yaloko, Newel Knight (lobekangumholi wemalunga labekahlala eThompson) nalabanye babonisi bebete kumPhrofethi kutawubuta kutsi bente njani, UmPhrofethi wabuta iNkhosi wase utfola lesi sembulo, lesiyaleta emalunga labekaseThompson kutsi alishiye lipulazi laLeman Copley ahambe aye eMissouri.
1–6, LabaNgcwele kufanele bagcine sivumelalwano selivangeli kute batfole umusa; 7–10, Kumele babeketele elusizini.
1 Bukani, naku lokushiwo yiNkhosi, ngisho Alfa na-Omega, sicalo nesiphetfo, ngisho yena lowabetselwa ngenca yetono temhlaba—
2 Buka, ngicinisile, ngicinisile, ngitsi kuwe, nceku yami Newel Knight, uyawukuma ucine kulesi sikhundla lengikubeke kuso.
3 Futsi uma bomnakenu bafisa kusindza etitseni tabo, abaphendvuke kuto tonkhe tono tabo, batitfobe ngekweliciniso phambi kwami babe ngulabadzabukile.
4 Futsi njengoba sivumelwano labasenta kimi sesephukile, ngaleyo ndlela sesilite futsi asisasebenti.
5 Maye kuloyo lesita ngaye lesi sikhubekiso, ngoba bekuncono kuye kube ucwiliswe ekujuleni kwelwandle.
6 Kodvwa babusisiwe labo labasigcinile lesivumelwano baphindze bagcina nalomyaleto, ngoba bayawutfola umusa.
7 Ngaloko-ke, manje hambani nibaleke kulelive, funa titsa tenu tinihlasele; nitsatse luhambo lwenu, nikhetse leningatsandza kutsi abe ngumholi wenu, nalotawuningenisela timali.
8 Futsi niyawutsatsa luhambo lwenu kanjalo niye etifundzeni letingasenshonalanga, eveni laseMissouri, eminceleni yemaLamani.
9 Futsi uma senilucedzile luhambo lwenu, bukani, ngitsi kini, yentani taba tekutiphilisa njengalabanye bantfu, ngite nginilungiselele indzawo yenu.
10 Ngetulu kwaloko, beketelani elusizini ngite ngibuye; futsi, bukani, ngiyabuya masinyane, nemvuzo wami ukimi, futsi labo labangifunisisile bayawutfola kuphumula emiphefumulweni yabo. Kunjalo nje. Amen.