Wóltaʼii 54
Diyin Yá Yáłtiʼí Joseph Smith díí diyingo bił ííshją́ą́ ályaa éí Newel Knight yee yił hodoolnih biniyé, Kirtland, Ohiodi, Yaʼiishjááshchilí 10, 1831 yihahgo. Thompson, Ohiodi, Sodizin daʼatahígíí, éí kéyah sodizindóó aa dahideestʼánígíí yíndaʼídíłkidígíí yee ałtsʼą́ą́ʼ daazlį́į́ʼ. Łaʼ sodizin atah danilínígíí tʼáá bí tʼéiyá ádaa ntsédaakees dóó bił dahatsohgo baa ákohoniidzį́į́ʼ. Leman Copley Shakers yitah naʼneeztą́ą́ʼ dóó bikʼijįʼ (wóltaʼii 49gi alą́ąjįʼ saad dashijaaʼígíí yídííłtah), kéyah sodizinjí dáʼákʼeh ntsaa yee ałhaʼdeetʼánée kʼíínítiʼ éí Colesville, New Yorkdééʼ Jesus Christ Yikééʼ Naazíinii nehikáhígíí bá ałtsʼá dahidoodzohyę́ę tʼáadoo yeʼiilaa da. Díí ákóhóótʼįįdígíí biniinaa, Newel Knight (Thompsondi sodizin daʼatah yilą́ąjįʼ sizíinii) dóó nááná łaʼ elders yił Diyin Yá Yáłtiʼí haalá dadiiʼnííł deidííniid. Diyin Yá Yáłtiʼí Diyin Bóhólníihii neiyídeełkid dóó díí bił ííshją́ą́ ályaa, éí binahjįʼ Thompsondi sodizin daʼatahígíí Leman Copley bidáʼákʼehdóó dahdidoohnééł dóó níléí Missourigóó doohkah biʼdooniid.
1–6, Jesus Christ Yikééʼ Naazíinii éí Jesus Christ binaʼnitin bee yisdáʼiildéehii bee ałhaʼdiitʼaah yikʼeh dahółʼį́įgo tʼéiyá diyingo ajoobaʼ baa dahidoolyééł; 7–10, Achʼįʼ nahwiiʼná yiiʼ yikahgo hadaʼólníi doo.
1 Áko shooh, Diyin Bóhólníihii kóní, Alpha dóó Omega ndi, bee hahooyaii dóó bee nihoníyaii, nihokááʼ dineʼé bibąąhági ádaatʼéii éí tsin ałnáosʼá bikááʼ biʼdiisyį́įgo yá nináʼnídlá—
2 Áko shooh, tʼáá aaníí, tʼáá aaníigo, ándishní, shá naalʼaʼí Newel Knight, naanish naah niníláhígíí bee nidziilgo sínízį́.
3 Áádóó nihikʼéí beʼanaʼí bitsʼą́ą́ dahdidiikah danízingo, bíniʼdii tʼáá átʼé bibąąhági ádaatʼéii yaa nídaʼiidookąął, dóó tʼáá aaníigo shidááhdóó hajoobaʼ dóó yínííł ádaʼdidoolnííł.
4 Áádóó diyingo ałhaʼdeetʼą́ shił ádeiyiilaayę́ę kʼídeiztiʼ, éí doo ílį́į da dóó doo naalnish da silį́į́ʼ.
5 Áádóó yíi bichʼįʼ kódoolnííł díí kʼíinítiʼgo, háálá tó nteeljígo biih jíítłʼizhgo hwiisxį́įgo éí há yáʼátʼééh doo ńtʼę́ę́ʼ.
6 Ákondi diyingo ahadeetʼą́ tʼáá yikééʼ naazį́įgo dóó bee hazʼáanii tʼáá yikʼeh dahółʼį́įgo bikʼidahojídlíí doo, háálá hojoobaʼ baa dadoolyeeł.
7 Ákohgo, kʼad yíwohjįʼ kéyahdóó dahdohjeeh, háálá niheʼanaʼí da nihikʼídookah; áko dahdoohnééh, áádóó nihi naatʼáanii dooleełígíí łaʼ ńdadidoołtééł, áko béeso nihá yikʼidéezʼį́į́ʼ dooleeł.
8 Áádóó ákótʼáo eʼeʼaah nahósʼaʼjigo dahdidoohnééł, Missouri kéyah bichʼįʼjigo, Laman bidineʼé kéyah bił hadahwiisdzoíjįʼ.
9 Áádóó áadi noonáago, áko shooh, Shí nihichʼįʼ hadeesdzih, tʼáá nihí ákʼinidaałdzil doo, nihá hastʼeʼhooshłaago índa.
10 Áádóó ałdóʼ, nihichʼįʼ nahwiiʼnáago haʼíínółní nihaa níyáajįʼ; áádóó, áko shooh, tʼáá hooshchʼįʼ deeshááł, dóó deidoołbįįłígíí nishjááh, áádóó tʼáá íídą́ą́ʼ yéego shíká dadeezʼíʼígíí éí biiʼ sizíinii hááʼáyįįh yikʼídahidookah. Tʼáá ákótʼée doo. Amen.