Wóltaʼii 55
Diyin Yá Yáłtiʼí Joseph Smith díí diyingo bił ííshją́ą́ ályaa éí William W. Phelps yee yił hodoolnih biniyé, Kirtland, Ohiodi, Yaʼiishjááshchilí 14, 1831 yihahgo. William W. Phelps, naaltsoos bikʼeʼéschį́ ííłʼíní nilį́, dóó bí dóó baʼáłchíní ániid Kirtlandjįʼ níná, áádóó Diyin Yá Yáłtiʼí Diyin Bóhóníihii hastiin yá naʼídééłkid.
1–3, William W. Phelps nídiiltį́ dóó tó bee bidiʼdoolzį́į́ł biniyé bikʼihodiiniiʼ, éí elder dooleeł biniyé óʼoolʼįįł bá ályaa, áádóó Diyin binaʼnitin bee yisdáʼiildéehii yee naʼnitin dooleeł biniyé; 4, Áádóó ałdóʼ Sodizin óltaʼ ndeiznilígíí biyiʼ áłchíní bá naaltsoos ííłʼį́į doo; 5–6, Missourigóó doogááł, áadi hazʼą́ądi naalnish doo.
1 Áko shooh, Diyin Bóhólníihii ni ááhniłní, shá naalʼaʼí William, aooʼ, Diyin Bóhólníihii tʼáá átʼé yikʼi hooʼááłii, nániʼdiiltį́ dóó nikʼihodiiniiʼ; áádóó shiʼayóó átʼéíi tʼéiyá bee shichʼįʼ díníʼį́įgo, tó bee niʼdidoolzį́į́ł, nibąąhági ádaatʼéii bee naanídiʼdootʼááł dóó Iiʼ sizį́ Diyinii atsiitʼááh dah adéesniiʼgo naadoolyééł;
2 Áádóó índa shá naalʼaʼí Joseph Smith, Jun. bílaʼ yee nitsiitʼááh dahdéesniiʼgo niidoosį́į́ł, áko díí sodizinjí elder dííleeł, áko Jesus Christ, Diyin God hiináanii biYeʼ nilíinii bízhiʼ binahjįʼ tó bee iinisį́į́h doo dóó ádaa náʼookąąh bee naʼnítin doo éí binahjįʼ bąąhági ádaatʼéii bá yóóʼadahididootʼááł.
3 Áádóó tʼáá háiida, shidááhdóó yínííł aʼdiilyaaígíí bitsiitʼááh dahdidíílnih, dóó adziilii nee hólǫ́ǫgo Iiʼ sizį́ Diyinii aadíílééł.
4 Áádóó ałdóʼ, oʼoolʼįįł ná ádoolnííł áko shá naalʼaʼí Oliver Cowdery naanish naaltsoos bikʼídaʼashchį́įgo hahinidééh bee bíká adíílwoł, áádóó éí sodizin óltaʼ deiyééłyeedígíí biyiʼ, áko áłchíní yázhí ałdóʼ ndabidiʼnitin doo éí tsʼídá baa shił hózhǫ́ǫgo néshʼį́į doo.
5 Áádóó ałdóʼ, Shí tʼáá aaníigo nichʼįʼ haasdziih, díí biniyé shá naalʼaʼí Joseph Smith, Jun., dóó Sidney Rigdon bił chʼaadííkah, áko kéyah naadeestʼánígíí bikáaʼgi díí naanish ádíílííł.
6 Áádóó ałdóʼ, bíniʼdii shá naalʼaʼí Joseph Coe ałdóʼ bił dahdidoohkah. Áádóó łaʼígíí éí tʼah índa bééhodoozįįł, shí íínisinígíí bikʼehgo. Amen.