Vahe 56
Ko e fakahā naʻe fai mai ʻia Siosefa Sāmita ko e Palōfitá, ʻi Ketilani, ʻOhaiō, ʻi he ʻaho 15 Sune 1831. ʻOku valokiʻi ʻe he fakahaá ni ʻa ʻĒsela Teia, ʻi he ʻikai talangofua ki ha fakahā ki muʻa (ko e “fekaú” ne ʻuhinga ki ai ʻi he veesi 8), ʻa ia naʻe maʻu ai ʻe Siosefa Sāmita maʻana, ʻo fakahinohinoʻi ʻa Teia fekauʻaki mo hono ngaahi fatongia ʻi he faama ʻa Feletiliki G. Uiliamisí, ʻa ia naʻe nofo aí. ʻOku toe fakataʻeʻaongaʻi foki ʻe he fakahaá ni ʻa e ui ʻo Teia ke fononga ki Mīsuli mo Tōmasi B. Māsí (vakai ki he vahe 52:22).
1–2, Kuo pau ke toʻo hake ʻe he Kāingalotú ʻa honau kolosí pea muimui ʻi he ʻEikí ka nau maʻu ʻa e fakamoʻuí; 3–13, ʻOku fekau ʻe he ʻEikí peá ne toe taʻofi, pea ʻoku kapusi ki tuʻa ʻa e kau talangataʻá; 14–17, ʻE malaʻia ʻa e kau maʻu koloa ʻa ia ʻe ʻikai te nau tokoni ki he masivá, pea ʻe malaʻia ʻa e masiva ko ia ʻoku ʻikai mafesifesi honau lotó; 18–20, ʻOku monūʻia ʻa e kau masiva ko ia ʻoku loto-maʻá, he te nau maʻu ʻa e fonuá.
1 Tokanga mai, ʻa kimoutolu ʻa e kakai ʻa ia ʻoku nau lau ʻoku ui ʻaki ʻa kinautolu ʻa hoku hingoá, ʻoku folofola ʻe he ʻEikí ko homou ʻOtuá; he vakai, ʻoku tupu hake ʻa ʻeku ʻita ki he kau angatuʻú, pea te nau ʻilo ʻa hoku nimá mo ʻeku lilí ʻi he ʻaho ʻo e tauteá mo e ʻitá ki he ngaahi puleʻangá.
2 Pea ko ia ia ʻe ʻikai te ne toʻo hake hono kolosí ʻo muimui ʻiate aú, pea tauhi ʻeku ngaahi fekaú, ʻe ʻikai fakamoʻui ia.
3 Vakai, ko au, ko e ʻEikí, ʻoku ou fekau; pea ko ia ia ʻe ʻikai te ne talangofuá ʻe motuhi atu ia ʻi hoku taimi totonu pē ʻoʻokú, ʻi he hili ʻeku fekaú pea mo hono maumauʻi ʻo e fekaú.
4 Ko ia ko au, ko e ʻEikí, ʻoku ou fekau peá u taʻofi ia, ʻo fakatatau mo e meʻa ʻoku hā ngalingali lelei kiate aú; pea ʻe tali ʻeni kotoa ʻi he ʻulu ʻo e kau angatuʻú, ʻoku folofola ʻe he ʻEikí.
5 Ko ia, ʻoku ou fakafoki ʻa e fekau naʻe fai ki heʻeku ongo tamaioʻeiki ko Tōmasi B. Māsí mo ʻĒsela Teiá, peá u fai ha fekau foʻou ki heʻeku tamaioʻeiki ko Tōmasí, ke ne fai fakatoʻotoʻo ʻa ʻene fononga ki he fonua ko Mīsulí, pea ʻe fononga mo ia ʻa ʻeku tamaioʻeiki ko Sila J. Kilifiní.
6 He vakai, ʻoku ou fakafoki ʻa e fekau naʻe fai ki heʻeku ongo tamaioʻeiki ko Sila J. Kilifiní mo Niueli Naití, koeʻuhi ko e kia-kekeva ʻa hoku kakai ʻoku ʻi Tomasoní, mo ʻenau ngaahi angatuʻú.
7 Ko ia, tuku ke nofo ʻiate kinautolu ʻa ʻeku tamaioʻeiki ko Niueli Naití; pea ʻe ngofua ke ʻalu ʻa kinautolu kotoa pē ʻe fie ʻalú, ʻa ia ʻoku loto-mafesifesi ʻi hoku ʻaó, pea ke tataki ʻa kinautolu ʻe ia ki he fonua kuó u filí.
8 Pea ko e tahá, ko e moʻoni ʻoku ou pehē kiate kimoutolu, kuo pau ke fakatomala ʻa ʻeku tamaioʻeiki ko ʻĒsela Teiá mei heʻene loto-hīkisiá, pea mo ʻene siokitá, pea talangofua ki he ʻuluaki fekau naʻá ku fai kiate ia ʻo kau ki he feituʻu ʻokú ne nofo aí.
9 Pea kapau te ne fai ʻeni, koeʻuhi he ʻe ʻikai ke ʻi ai ha ngaahi vahevahe ʻe fai ki he kelekelé, ʻe kei tuʻutuʻuni ai pē kiate ia ke ʻalu ki he fonua ko Mīsulí;
10 Ka ʻikai, pea te ne maʻu ʻa e paʻanga kuó ne totongí, pea te ne ʻalu mei he feituʻu ko iá, pea ʻe motuhi atu ia mei hoku siasí, ʻoku folofola ʻe he ʻEikí ko e ʻOtua ʻo e ngaahi kau taú;
11 Pea neongo ʻe mole atu ʻa e langí mo e māmaní, ka ʻe ʻikai mole atu ʻa e ngaahi leá ni, ka ʻe fakahoko ia.
12 Pea kapau ʻoku ʻaonga ke totongi ʻa e paʻangá ʻe heʻeku tamaioʻeiki ko Siosefa Sāmita, ko e Siʻí, vakai, ko au, ko e ʻEikí te u toe totongi ia kiate ia ʻi he fonua ko Mīsulí koeʻuhí ke toe totongi kiate kinautolu te ne maʻu mei aí ʻo fakatatau ki he meʻa ʻoku nau faí;
13 He ʻe fakatatau ki he meʻa ʻoku nau faí ʻa e meʻa te nau maʻú, ʻio ʻa e ngaahi kelekelé ke hoko ko honau tofiʻa.
14 Vakai, ʻoku folofola peheni ʻe he ʻEikí ki hoku kakaí—ʻoku lahi ʻa e ngaahi meʻa ke mou fai mo fakatomala mei ai; he vakai, kuo aʻu hake kiate au ʻa hoʻomou ngaahi angahalá, pea ʻoku ʻikai ke fakamolemoleʻi ia, koeʻuhí he ʻoku mou feinga ke fealeaʻaki ʻi homou ngaahi hala ʻo kimoutolu pē.
15 Pea ʻoku ʻikai ke fiemālie ʻa homou lotó. Pea ʻoku ʻikai te mou talangofua ki he moʻoní, ka ʻoku mou maʻu ʻa e fiefia ʻi he taʻe-māʻoniʻoni.
16 ʻE malaʻia ʻa kimoutolu ʻa e kau tangata koloaʻiá, ʻa ia ʻoku ʻikai ke fie foaki hoʻomou ngaahi koloa ki he masivá, he ʻe fakakoviʻi ʻe hoʻomou ngaahi koloá ʻa homou laumālié; pea ʻe hoko ʻeni ko hoʻomou tangilāulau ʻi he ʻaho ʻo e tauteá, mo e fakamāú pea mo e houhaú: Kuo ʻosi ʻa e utu-taʻú, kuo ngata ʻa e faʻahitaʻu māfaná, pea ʻoku ʻikai ke fakamoʻui ʻa hoku laumālié!
17 ʻE malaʻia ʻa kimoutolu ʻa e kakai masiva, ʻa ia ʻoku ʻikai ke mafesifesi ʻa homou lotó, ʻa ia ʻoku ʻikai ke fakatomala homou laumālié, pea ʻoku ʻikai ke fiemālie ʻa homou keté, pea ʻoku ʻikai ke taʻofi ʻa homou nimá mei he ala ki he ngaahi koloa ʻa e kakai kehé, ʻa ia ʻoku fonu ʻa homou matá ʻi he mānumanu, pea ʻoku ʻikai te mou fie ngāue ʻaki homou nima ʻomoutolú!
18 Ka ʻoku monūʻia ʻa e kakai masiva ʻa ia ʻoku loto-maʻá, ʻa ia ʻoku mafesifesi ʻa honau lotó, pea ʻoku fakatomala ʻa honau laumālié, he te nau mamata ki he puleʻanga ʻo e ʻOtuá ʻoku haʻu ʻi he mālohi mo e nāunau lahi ke fakahaofi ʻa kinautolu; koeʻuhí he te nau maʻu ʻa e mahu ʻo e māmani.
19 He vakai, ʻe hāʻele mai ʻa e ʻEikí, pea ʻe ʻiate ia ʻa ʻene totongí, pea te ne totongi ki he tangata kotoa pē, pea ʻe fiefia ʻa e kakai masivá;
20 Pea ʻe maʻu ʻe honau ngaahi hakó ʻa e māmaní mei he toʻu tangata ki he toʻu tangata, ʻo taʻengata pea taʻengata. Pea ko ʻeni ʻoku ou fakaʻosi ʻeku lea kiate kimoutolú. ʻE pehē. ʻĒmeni.