Sigaba 62
Sembulo lesaniketwa ngaJoseph Smith umPhrofethi, elusentseni lweMfula iMissouri eChariton, eMissouri, mhlaka 13 iNgci, 1831. Ngalelilanga umPhrofethi nelicembu lakhe, labebasendleleni yabo baphuma e-Independence baya eKirtland, bahlangana nebabonisi labehlukene labebasendleleni yabo leya eveni laseSiyoni, futsi emvakwekubingelelana ngekujabula, waniketwa lesi sembulo.
1–3, Bufakazi buyabhalwa ezulwini; 4–9, Babonisi kufanele bahambe bashumayele ngekubona kwabo futsi njengoba bayaletwa nguMoya.
1 Bukani, niphindze nilalele, Awu nine babonisi belibandla lami, kusho iNkhosi Nkulunkulu wenu, ngisho Jesu Khristu, ummeli wenu, lowati butsakatsaka bemuntfu nekutsi basitwa kanjani labalingwako.
2 Futsi ngicinisile emehlo ami asetikwalabo labasengakayi eveni laseSiyoni; ngaloko-ke lenitfunywe kona kusengakagcwaliseki.
3 Noko, nibusisiswe, ngoba bufakazi lenibufakazile bubhaliwe ezulwini kute tingilosi tibubuke; futsi tiyanijabulela, netono tenu titsetselelwe.
4 Manje chubekani neluhambo lwenu. Butsanani eveni laseSiyoni; nibambe umhlangano futsi nijabule kanyekanye, niletse sidlo seNkhosi kuLosetikwako Konkhe.
5 Emvakwaloko ningabuya kutawufakaza, yebo, nonkhe ndzawonye, noma ngababili, ngekutsandza kwenu; kuphela tsembekani, nimemetele tindzaba letimnandzi kubantfu basemhlabeni, noma emkhatsini wemabandla alababi.
6 Bukani, mine, iNkhosi, nginiletse ndzawonye kute setsembiso sigcwaliseke, kute labetsembekile emkhatsini wenu bagcinwe baphindze bajabule kanyekanye eveni laseMissouri. Mine, iNkhosi, ngiyabetsembisa labetsembekile futsi angeke ngiwacambe emanga.
7 Mine, iNkhosi, ngitimisele, uma kukhona emkhatsini enu lofisa kugibela emahhashi, noma iminyuzi, noma tincola, uyawusitfola lesi sibusiso, uma asitfola ngesandla seNkhosi, ngenhlitiyo lebongako etintfweni tonkhe.
8 Leti tintfo tisele ngani kutsi nitente ngekubona kwenu nangekuyaletwa nguMoya.
9 Bukani, umbuso ngewenu. Futsi bukani niphindze nibone, nginalabatsembekile njalo. Kunjalo nje. Amen.