Vahe 69
Ko e fakahā naʻe fai mai ʻia Siosefa Sāmita ko e Palōfitá, ʻi Hailame, ʻi ʻOhaiō, ʻi he ʻaho 11 Nōvema, 1831. Naʻe ʻosi tali ʻi ha konifelenisi makehe ʻi he ʻaho 1–2 ʻo Nōvemá ʻa hono fakamāʻopoʻopo fakatahaʻi ʻo e ngaahi fakahā naʻe teuteu ke pulusí. ʻI he ʻaho 3 ʻo Nōvemá, naʻe tānaki mai ʻa e fakahā ʻoku hā atu hení ʻo hoko ko e vahe 133, pea naʻe ui ia kimui ko e Fakalahi. Naʻe ʻosi fili kimuʻa ʻa ʻŌliva Kautele ke ne ʻave ʻa e tohi fakatahatahaʻi ʻo e ngaahi fakahaá mo e ngaahi fekaú ki Tauʻatāina, Mīsuli, ke paaki. Naʻe tuʻutuʻuni foki ke ne ʻave mo ia ʻa e paʻanga ʻa ia ne foaki mai ki hono langa hake ʻo e Siasí ʻi Mīsulí. ʻOku fakahinohino ʻe he fakahaá ni ʻa Sione Uitemā ke kaungā-fononga mo ʻŌliva Kautele pea toe fekau foki kia Uitemā ke ʻalu pea mo tānaki ha ngaahi fakamatala fakahisitōlia ʻi hono uiuiʻi ko e fai-hisitōlia pea mo e tauhi lekooti ʻo e Siasí.
1–2, ʻOku fekau ke fononga ʻa Sione Uitemā mo ʻŌliva Kautele ki Mīsuli; 3–8, ʻOku fekau ke ne malanga foki mo tānaki, mo lekooti, mo hiki ʻa e ngaahi fakamatala fakahisitōlia.
1 Tokanga mai kiate au, ʻoku folofola ʻe he ʻEikí ko homou ʻOtuá, koeʻuhi ko e lelei ʻa ʻeku tamaioʻeiki ko ʻŌliva Kautelé. ʻOku ʻikai ngali mo e poto ʻiate aú ke tuku kiate ia ʻa e ngaahi fekau mo e ngaahi paʻanga ʻa ia te ne ʻave ki he fonua ko Saioné, tuku kehe pē ʻo kapau te ne ʻalu mo ha taha ʻe angatonu mo falalaʻangá.
2 Ko ia, ko au, ko e ʻEikí, ʻoku ou loto ke ʻalu ʻa ʻeku tamaioʻeiki ko Sione Uitemaá mo ʻeku tamaioʻeiki ko ʻŌliva Kautelé;
3 Pea ke ne fai atu foki ʻi he fai tohi mo hiki ha hisitōlia ʻo e ngaahi meʻa mahuʻinga kotoa pē ʻa ia te ne mamata ki ai mo ʻiloʻi ʻo kau ki hoku siasí;
4 Pea ke ne maʻu foki ʻa e akonaki mo e tokoni mei heʻeku tamaioʻeiki ko ʻŌliva Kautelé mo ha niʻihi kehe.
5 Pea ko e tahá foki, e ʻoatu ʻe heʻeku kau tamaioʻeiki ʻoku fononga holo ʻi he māmaní ʻa e ngaahi fakamatala ki honau ngaahi lakangá tauhí ki he fonua ko Saioné;
6 He ʻe hoko ʻa e fonua ko Saioné ko e nofoʻanga pea ko e potu ke tali ai mo fai ai ʻa e ngaahi meʻá ni kotoa pē.
7 Ka neongo iá, tuku ʻa ʻeku tamaioʻeiki ko Sione Uitemaá ke fononga tuʻo lahi mei he feituʻu ki he feituʻu, pea mei he potu siasi ki he potu siasi, koeʻuhí ke faingofua ange ʻene maʻu ʻa e ʻilo—
8 ʻO malanga mo fakamatala, mo fai tohi, mo hiki, mo fili, pea maʻu ʻa e ngaahi meʻa kotoa pē ʻe ʻaonga ki he siasí, pea ki he ngaahi toʻu tangata tupu hake ʻa ia ʻe tupu hake ʻi he fonua ko Saioné, ke maʻu ia mei he toʻu tangata ki he toʻu tangata, ʻo taʻengata pea taʻengata. ʻĒmeni.