Wóltaʼii 71
Diyin Yá Yáłtiʼí Joseph Smith dóó Sidney Rigdon díí diyingo bił ííshją́ą́ ályaa, Hiram, Ohiodi, Níłchʼitsoh 1, 1831 yihahgo. Diyin Yá Yáłtiʼí Diyin Bizaad Bible yá ataʼ halneʼgo tʼah yinaalnish Sidney Rigdon éí bá naʼadzogo éí díí diyingo bił ííshją́ą́ ályaajįʼ, ákweʼé hoolzhishgo tʼóó hóníshgháníjįʼ yinaalnishígíí niʼ kwíyiilaa áko díí kweʼé biyiʼ ádoohłííł biʼdooniidígíí ałtso áyiilaajįʼ índa. Ałkiʼs nidlínígíí éí naʼnitin dooleeł áko Sodizin bikʼijįʼ doo yáʼáshǫ́ǫ́góó ntsáhákeesígíí tʼóóyóó niʼ kódoolnííł biniyé éí Ezra Booth, Sodizin yitsʼá níyáhígíí díkwíígooshį́į́ atseezį́ binaaltsoos yiyiʼjįʼ ánáʼiidlaaígíí biniinaa.
1–4, Joseph Smith dóó Sidney Rigdon éí nahatʼá bee yisdáʼiildéehii yee naʼnitin doogo abiʼdoolʼaʼ; 5–11, Akéé Naazíinii biʼanaʼí doo hanáádadoodzihgóó ádeidoolííł.
1 Áko shooh, Diyin Bóhólníihii shá naalʼaʼí Joseph Smith, Jun., dóó Sidney Rigdon kwííłní, kʼad tʼáá aaníí áájįʼ baa hoolzhiizh shi nahatʼá bee yisdáʼiildéehii yéego nihizhí dadiitsʼaʼgo bee naʼnohtin doo háálá éí bídin hóyééʼ dóó tʼáá íiyisíí nisin, Diyin bił hazʼą́ądiígíí, dóó Diyin God bizaad biyiʼdóó bi tʼáá aaníinii tʼahdoo ííshją́ą́ ádaalnéhígíí hazhóʼí baa hodoołnih, éí Iiʼ Sizį́ Diyinii dóó beʼadziil niheiníláhígíí łahdóó bikʼehgo nihaa doolyééł, shí íínisinígíí bikʼehgo.
2 Tʼáá aaníigo nihichʼįʼ haasdziih, nihinaagóó nahasdzáán bikááʼgóó baa dahołneʼ, áádóó sodizin biyiʼ ndi ałdóʼ, tʼáá nízaadjįʼ, nihił ííshją́ą́ ádaalyaajįʼ ndi.
3 Tʼáá aaníigo éí díí haashį́į́ nízahjįʼ nihinaanish doo, díí éí Shí nihaa diníʼą́.
4 Ákohgo, shidáʼákʼehgi naołnish. Nahasdzáán bikááʼ kéédahatʼíinii bíká ádóhní, dóó tʼáá aaníigo baa hołneʼ, áádóó bee hazʼáanii dóó diyingo nihił ííshją́ą́ ádadoolníłígíí bá hashtʼehołééh.
5 Kʼad, áko shooh díí hódzáanii átʼé; tʼáá háííshį́į́ yiyííłtaʼígíí, bíniʼdii yikʼidiʼdootį́į́ł dóó ałdóʼ baʼ doolyééł;
6 Háálá tʼáá háííshį́į́ neidiiláhígíí tʼáá ląʼígo baa náádoolyééł, adziilii ndi.
7 Ákohgo, niheʼanaʼí doo hanáádadoodzihgóó ádoołííł; hasłą́ągi dóó tʼáá sahdii hágo bidoohníigo bił áłah dohłeeł; áádóó nihaʼólníigo yaa yádanízinígíí bééhodoozįįł.
8 Ákohgo, Diyin Bóhólníihii tʼáá íiyisíí biniyé yikʼijįʼ danilínígíí bíniʼdii nihichʼįʼ kódeidoolííł.
9 Tʼáá aaníigo, Diyin Bóhólníihii kónihiłní—bee naʼabaahii nihiniyé ályaaígíí tʼáá ałtso doo nihidéíłníi da doo;
10 Áádóó tʼáá háiida ayóó íítsʼaʼgo nikʼijįʼ haadzíiʼgo éí tʼáá shí ííniizį́į́ʼjįʼ doo hanáádadoodzihgóó ádeishłííł.
11 Ákohgo, shibee hazʼáanii bikʼeh honołʼį́į doo; háálá éí tʼáá aaníinii dóó bee daʼoodláanii ádaatʼé. Tʼáá ákótʼée doo. Amen.