Sigaba 71
Sembulo lesaniketwa Joseph Smith umPhrofethi naSidney Rigdon, eHiram, e-Ohio, mhlaka 1 iNgongoni, 1831. UmPhrofethi bekachubekile nekuhumusha liBhayibheli naSidney Rigdon njengembhali wakhe kwate kwatfolakala lesi sembulo, lokwatsi ngaleso sikhatsi lomsebenti wabekwa eceleni kwesikhashana kute bakwati kugcina umyaleto labaniketwa wona kuso. Labazalwane bekufanele bahambe baye kuyawushumayela kute batsambise imizwa lengemihle lebeseyicubukile lebeyiphikisana neliBandla ngenca yekukhishwa kwetincwadzi lebetibhalwe ngu-Ezra Booth, lobesekahlubukile.
1–4, Joseph Smith naSidney Rigdon batfunyelwa kuyawushumayela livangeli; 5–11, Titsa talabaNgcwele titawehlulwa.
1 Bukani, naku lokushiwo yiNkhosi kini tinceku tami Joseph Smith lomNcane, naSidney Rigdon, kutsi sikhatsi sesifikile sekutsi kufanele futsi kudzingekile kutsi nivule imilomo yenu kushumayela livangeli lami, tintfo tembuso, nichaze kabanti ngetimfihlakalo tawo ngemibhalo lengcwele, ngekwesabelo saMoya nemandla latawuniketwa nine, ngekwentsandvo yami.
2 Ngicinisile ngitsi kini, shumayelani emhlabeni etifundzeni letisedvute, kanjalo nasebandleni, sikhatsi lesitsite, kute kwembulwe kini.
3 Ngicinisile lona ngumsebenti wesikhatsi lesitsite, lengininika wona.
4 Ngaloko-ke, sebentani esivinini sami. Bitani bantfu basemhlabeni, nifakaze, nilungise nendlela yemiyaleto neyetembulo letitawufika.
5 Manje, bukani loku kuhlakanipha; noma ngubani lofundzako, akacondze aphindze emukele;
6 Ngoba kuloyo lowemukelako uyawuphiwa kube kuningi, ngisho nemandla.
7 Ngaloko-ke, tehluleni titsa tenu; tibiteni kute nihlangane nato phambi kwebantfu bonkhe nangasense; futsi nangabe netsembekile lihlazo labo litawubonakaliswa.
8 Ngaloko-ke, ababeke tizatfu tabo leticinile ngekumelana neNkhosi.
9 Ngicinisile, naku lokushiwo yiNkhosi kini—kute sikhali lesilolelwe kulwa nani lesiyawuphumelela;
10 Futsi uma kukhona lophakamisa livi lakhe ngekumelana nani uyawehlulwa ngesikhatsi sami lesifanele.
11 Ngaloko-ke, gcinani imiyaleto yami; iliciniso futsi yetsembekile. Kunjalo nje. Amen.