Vahe 74
Ko e fakahā naʻe fai kia Siosefa Sāmita ko e Palōfitá, ʻi he Vahefonua Ueiní, ʻi Niu ʻIoke ʻi he 1830. Naʻa mo e teʻeki fokotuʻu e Siasí, ne ʻosi ʻi ai pē ha ngaahi fehuʻi ia fekauʻaki mo e founga totonu ʻo e papitaisó pea tupu ai ha fekumi ʻa e Palōfitá ki ha ngaahi tali ʻi he kaveingá ni. ʻOku pehē ʻe he hisitōlia ʻa Siosefa Sāmitá ko e fakahaá ni ko hano fakamatala ia ʻo e 1 Kolinitō 7:14, ko ha potufolofola kuo faʻa ngāue ʻaki ke fakatonuhiaʻi ʻa e papitaiso ʻo e pēpē valevalé.
1–5, ʻOku akonaki ʻa Paula ki he Siasi ʻi hono ʻahó ke ʻoua te nau tauhi ʻa e fono ʻa Mōsesé; 6–7, ʻOku māʻoniʻoni ʻa e fānau īkí pea ʻoku fakamāʻoniʻoniʻi ʻa kinautolu tuʻunga ʻi he Fakaleleí.
1 He ʻoku fakamāʻoniʻoniʻi ʻa e husepāniti taʻetuí ʻe he uaifí, pea fakamāʻoniʻoniʻi ʻa e uaifi taʻetuí ʻe he husepānití; ka ne ʻikai ke pehē, ʻe taʻemaʻa hoʻomou fānaú, ka ko ʻeni ʻoku nau māʻoniʻoni.
2 Ko ʻeni, ʻi he ngaahi ʻaho ʻo e kau ʻaposetoló, naʻe maʻu ʻa e fono ʻo e kamú ʻi he kau Siú kotoa pē ʻa ia naʻe ʻikai te nau tui ki he ongoongolelei ʻa Sīsū Kalaisí.
3 Pea naʻe hoko ʻo pehē naʻe tupu hake ha fuʻu fefakakikihiʻaki lahi ʻi he kakaí ʻo kau ki he fono ʻo e kamú, he naʻe holi ʻa e husepāniti taʻetuí ke kamu ʻa ʻene fānaú pea hoko ʻo moʻulaloa ki he fono ʻa Mōsesé, ʻa ia ko e fono naʻe fakakakató.
4 Pea naʻe hoko ʻo pehē ko e meʻa ʻi he tupu hake ʻa e fānaú, pea ngaohi ke moʻulaloa ki he fono ʻa Mōsesé, ko ia naʻa nau tokanga ai ki he ngaahi talatukufakaholo ʻa ʻenau ngaahi tamaí ʻo ʻikai te nau tui ki he ongoongolelei ʻa Kalaisí, pea nau hoko ai ʻo taʻe-māʻoniʻoni.
5 Ko ia, ko e ʻuhinga ʻeni naʻe tohi ai ʻa e ʻaposetoló ki he siasí, ʻo fai kiate kinautolu ha fekau, ʻo ʻikai mei he ʻEikí, kae meiate ia pē, ʻo pehē, ʻoku ʻikai totonu ke fakamaʻu ʻa e tokotaha tuí mo e tokotaha taʻetuí; tuku kehe pē ʻo kapau ʻe fakangata ʻa e fono ʻa Mōsesé ʻiate kinautolu.
6 Koeʻuhí ke nofo taʻekamu ʻenau fānau; pea ke fakangata ʻa e talatukufakaholó, ʻa ia ʻoku pehē ʻoku taʻe-māʻoniʻoni ʻa e fānau īkí; he naʻe maʻu ia ʻi he kau Siú;
7 Ka ʻoku māʻoniʻoni ʻa e fānau īkí, he kuo fakamāʻoniʻoniʻi ʻa kinautolu ʻi he fakalelei ʻa Sīsū Kalaisí; pea ko e ʻuhinga ʻeni ʻa e ngaahi folofolá.