1 Cia li mloog, auj lub ntuj ceeb tsheej, thiab cuab pob ntseg, auj ntiaj teb, thiab nej cov uas nyob rau hauv, vim tus Tswv yog Vajtswv, thiab tsis muaj tus Cawm Seej tsuas yog nws tib leeg xwb.

2 Nws lub tswv yim tsis paub kawg, nws tej kev xav tsis thoob, thiab tag nrho tej nws ua yeej tsis muaj ib tug twg muaj peev xwm paub tau.

3 Nws tej hom phiaj yeej tsis ploj, thiab tsis muaj leej twg uas cheem tau nws txhais tes.

4 Thaum ib txhiab ib txhis mus rau ib txhiab ib txhis nws yeej yog tib tug, thiab nws txoj sia tsis muaj hnub kawg.

5 Vim tus Tswv hais li no tias—Kuv, tus uas yog tus Tswv, yeej hlub tshua thiab ua zoo rau cov uas hwm kuv, thiab zoo siab muab nqi zog rau cov uas ua hauj lwm rau kuv ntawm txoj kev ncaj ncees thiab kev tseeb kom txog hnub kawg.

6 Lawv yuav txais nqi zog tseem ceeb thiab lawv lub yeeb koob yuav nyob mus ib txhis.

7 Thiab kuv yuav muab tag nrho kuv tej txuj ci uas neeg paub tsis txog ua tshwm sim los rau lawv, muaj tseeb tiag, tag nrho tej txuj ci uas neeg tsis paub txog kuv lub nceeg vaj uas tau muab zais puag thaum ub los lawm, thiab rau ntau ntau xyoo yav tom ntej, kuv yuav ua kom lawv paub txog tej kuv xav kom lawv ua nyob hauv txhua yam muaj nyob hauv kuv lub nceeg vaj.

8 Muaj tseeb tiag, txawm yog tej txuj ci uas xav tsis thoob nyob mus ib txhis los lawv yuav paub, thiab tej yam yuav muaj los kuv yuav qhia rau lawv, twb yog tej yam ntawm ntau tiam neeg.

9 Thiab lawv laj lim tswv yim yuav tsis paub kawg, thiab lawv txoj kev to taub yuav ncav mus txog ntuj; thiab cov neeg txawj ntse lub tswv yim yuav piam sij nyob ntawm lawv xub ntiag, thiab txoj kev to taub ntawm cov neeg ntse yuav tsis muaj nqis dab tsi.

10 Vim los ntawm kuv tus Ntsuj Plig kuv yuav ua rau lawv pom kev, thiab los ntawm kuv lub hwj chim kuv yuav muab tej uas neeg tsis paub txog kuv lub siab nyiam qhia rau lawv—muaj tseeb tiag, twb yog tej yam qhov muag tsis tau pom, thiab pob ntseg tsis tau hnov, thiab neeg lub siab xav tsis tau txog.

11 Wb, Joseph Smith, tus Hluas, thiab Sidney Rigdon, muaj tus Ntsuj Plig puv npo nyob rau hnub kaum rau lub Ob Hlis Ntuj, thaum xyoo ib txhiab yim pua thiab peb caug ob, txij peb tus Tswv lub xyoo los—

12 Tus Ntsuj Plig lub hwj chim ua rau wb qhov muag txawm qhib thiab wb txoj kev to taub txawm meej tuaj, kom pom thiab to taub tej yam txog Vajtswv—

13 Twb yog tej yam uas muaj puag thaum chiv keeb los ua ntej muaj lub ntiaj teb, uas Leej Txiv tsim muaj, los ntawm nws Tib Leeg Tub, tus uas tau nyob ntawm Leej Txiv xub ntiag, txij puag thaum chiv keeb los;

14 Ntawm tus uas wb ua pov thawj txog; thiab kev ua pov thawj uas wb hais yog qhov txhij txhua ntawm Yexus Khetos txoj moo zoo, tus uas yog Leej Tub, tus uas wb tau pom thiab tus uas nrog wb txuas lus nyob hauv txoj kev ua yog toog los saum ntuj los.

15 Vim thaum uas wb tab tom ua hauj lwm txhais lus, uas tus Tswv tau txib wb ua, wb txhais los txog rau nqe nees nkaum cuaj ntawm tshooj tsib ntawm Yauhas, uas tau muab qhia rau wb raws li nram no—

16 Hais lus txog txoj kev sawv rov los ntawm cov neeg tuag, ntsig txog cov uas yuav hnov Neeg Leej Tub lub suab:

17 Ces yuav sawv los; lawv cov uas tau ua zoo, nyob hauv txoj kev sawv rov los ntawm cov ncaj ncees; thiab lawv cov uas tau ua phem, nyob hauv txoj kev sawv rov los ntawm cov tsis ncaj ncees.

18 Nim no qhov no ua rau wb xav tsis thoob, vim tus Ntsuj Plig tau muab tej lus no rau wb.

19 Thiab thaum wb tseem xav txog tej yam no, tus Tswv tau chwv wb qhov muag ntawm wb txoj kev to taub thiab wb qhov muag txawm qhib, thiab tus Tswv lub yeeb koob ci nyob ib puag ncig.

20 Thiab wb tau pom Leej Tub lub yeeb koob, nyob ntawm Leej Txiv sab tes xis, thiab tau txais nws lub hwj chim tag nrho;

21 Thiab wb pom tej tim tswv dawb huv, thiab lawv cov uas dawb huv nyob ntawm nws lub rooj theej kiab, teev tiam Vajtswv, thiab tus Me Nyuam Yaj, cov uas teev tiam nws mus ib txhiab thiab ib txhis li.

22 Thiab nim no, tom qab tej lus tim khawv ntau uas tau hais txog nws lawm, zaj no yog zaj lus tim khawv, zaj kawg nkaus, uas wb hais txog nws: Hais tias nws muaj txoj sia nyob!

23 Vim wb pom nws, nyob ntawm Vajtswv sab tes xis; thiab wb hnov lub suab ua tim khawv tias nws yog Leej Txiv Tib Leeg Tub—

24 Hais tias los ntawm nws, thiab vim yog nws, thiab yog ntawm nws, tej ntuj los muab tsim thiab tau muab tsim tas los, thiab cov neeg uas nyob rau hauv tej lub ntuj ntawd yog cov tub thiab cov ntxhais uas yug los rau Vajtswv.

25 Thiab wb kuj tau pom qhov no, thiab ua pov thawj, hais tias Vajtswv ib tug tim tswv muaj hwj chim nyob ntawm Vajtswv xub ntiag, tus uas ntxeev siab tawm tsam Leej Txiv Tib Leeg Tub tus uas Leej Txiv hlub thiab nyob ntawm Leej Txiv xub ntiag, tus tim tswv ntawd raug ntiab tawm ntawm Vajtswv thiab Leej Tub xub ntiag mus.

26 Thiab hu ua Kev Puas Tsuaj, vim cov neeg saum ntuj quaj rau nws—nws twb yog Luxifaws, ib tug tub ntawm lub caij sawv ntxov.

27 Thiab wb pom, thiab xyuas seb, nws tau poob los! tau poob los, twb yog ib tug tub ntawm lub caij sawv ntxov!

28 Thiab thaum wb tseem muaj tus Ntsuj Plig puv npo, tus Tswv txib wb kom wb yuav tsum sau txoj kev ua yog toog cia; vim wb pom Dab Ntxwg Nyoog, tus nab txwj nab laug, uas twb yog tus dab phem, tus uas ntxeev siab tawm tsam Vajtswv, thiab nrhiav kev txeeb lub nceeg vaj ntawm peb tus Vajtswv thiab nws tus Khetos—

29 Yog li ntawd, nws ua rog nrog Vajtswv haiv neeg ntseeg, thiab vij lawv ib puag ncig.

30 Thiab wb ua yog toog pom tej kev raug txom nyem ntawm cov uas nws tawm tsam ua rog thiab tau kov yeej lawv, vim tus Tswv lub suab tau los li no rau wb:

31 Tus Tswv hais li no ntsig txog tag nrho cov uas paub kuv lub hwj chim, thiab cov uas tau txais kuv lub hwj chim ntawd, thiab tau cia tus dab phem lub hwj chim kov yeej lawv tus kheej, thiab kom lawv xyeej qhov tseeb thiab ua txhaum kuv lub hwj chim—

32 Lawv yog cov uas yog cov tub ntawm txoj kev puas tsuaj, yog cov uas kuv hais tias ntshe yuav zoo dua rau lawv yog hais tias lawv txhob yug los;

33 Vim lawv yog cov twj taig uas ntim txoj kev npau taws, raug txiav txim los ris Vajtswv txoj kev npau taws, nrog tus dab phem thiab nws cov tim tswv nyob mus ib txhis li;

34 Ntsig txog cov uas kuv tau hais no ces twb tsis muaj kev zam txim rau hauv lub neej no los yog hauv lub neej yuav los—

35 Vim lawv xyeej tus Ntsuj Plig Dawb Huv tom qab lawv txais nws, thiab vim lawv xyeej Leej Txiv Tib Leeg Tub, vim lawv tus kheej tau xav muab nws ntsia rau saum ntoo khaub lig thiab ua rau nws raug thuam tab meeg sawv daws.

36 Cov no yog cov uas yuav tawm mus hauv lub pas hluav taws thiab leej faj, nrog tus dab phem thiab nws cov tim tswv—

37 Thiab tsuas yog lawv xwb uas txoj kev tuag zaum ob thiaj muaj hwj chim kov yeej;

38 Muaj tseeb tiag, tsuas yog lawv xwb uas thiaj yuav tsis txais kev txhiv dim thaum txog lub sij hawm tus Tswv pom zoo, tom qab lawv raug nws txoj kev npau taws.

39 Vim yuav tsa tag nrho lwm tus sawv nyob hauv txoj kev sawv rov los ntawm cov tuag, los ntawm tus Me Nyuam Yaj txoj kev kov yeej thiab yeeb koob, tus uas raug tua tuag, tus uas nyob ntawm Leej Txiv xub ntiag ua ntej tej ntuj tsim teb raug.

40 Thiab qhov no yog txoj moo zoo, tej moo zoo siab, uas lub suab tawm saum ntuj los tau ua pov thawj rau wb—

41 Hais tias nws los rau hauv lub ntiaj teb, tus uas yog Yexus, los mus raug muab ntsia rau saum ntoo khaub lig theej neeg ntiaj teb, thiab los ris neeg ntiaj teb tej kev txhaum, thiab los ua rau neeg ntiaj teb hloov ua neeg dawb huv, thiab los ntxuav lawv tawm ntawm tag nrho tej kev ua tsis ncaj ncees;

42 Hais tias los ntawm nws tag nrho sawv daws cov uas Leej Txiv tau muab tso rau nws lub hwj chim kav thiab cov uas nws tau tsim yuav txais kev cawm cawm dim;

43 Tus uas muab yeeb koob rau Leej Txiv, thiab txhiv tag nrho tej yam nws ob txhais tes tau ua, tsuas yog cov tub ntawm txoj kev puas tsuaj uas xyeej Leej Tub tom qab Leej Txiv tau muab nws ua tshwm sim.

44 Yog li ntawd, nws cawm txhua tus tshuav lawv xwb—lawv yuav mus poob rau txoj kev rau txim kav ib txhis, uas yog txoj kev rau txim uas tsis muaj qhov kawg, uas yog txoj kev raug txim nyob mus ib txhis, mus kav nrog tus dab phem thiab nws cov tim tswv nyob mus ib txhis, nyob ntawd lawv tej kas yuav tsis txawj tuag, thiab cub hluav taws tsis tuag, uas yog lawv txoj kev tsim txom—

45 Thiab qhov kawg ntawd, thiab qhov chaw nyob ntawd, los yog lawv tej kev tsim txom, tsis muaj neeg paub;

46 Tsis tau muab ua tshwm sim, ziag no los kuj tsis tau, thiab yuav tsis muab ua tshwm sim los rau neeg, tsuas yog rau cov uas muaj feem raug li no xwb;

47 Txawm li ntawd los, kuv, tus uas yog tus Tswv, muab qhia los rau ntau tus los ntawm kev ua yog toog, tiam sis nrawm nroos rov muab kaw hlo lawm;

48 Yog li ntawd, qhov kawg, qhov dav, qhov siab, qhov tob, thiab txoj kev nyuaj siab ntawd, lawv tsis to taub, tsis muaj ib tug neeg twg to taub tsuas yog cov uas raug muab teem rau txoj kev raug txim no xwb.

49 Thiab wb hnov lub suab, hais tias: Sau kev ua yog toog cia, vim xyuas seb, qhov no yog qhov kawg ntawm txoj kev ua yog toog txog pom tej kev txom nyem ntawm cov uas tsis mloog Vajtswv lus.

50 Thiab ntxiv wb ua pov thawj txog—vim wb tau pom thiab tau hnov, thiab zaj no yog zaj lus tim khawv txog Khetos txoj moo zoo ntsig txog lawv cov uas yuav sawv los nyob rau hauv txoj kev sawv rov los ntawm cov ncaj ncees—

51 Lawv yog cov uas tau txais ib zaj lus tim khawv txog Yexus, thiab ntseeg nws lub npe thiab ua kev cai raus dej raws li tus txheej txheem uas muab nws faus, vim muab lawv faus rau hauv dej los ntawm nws lub npe, thiab ua li no thiaj raws li lo lus txib uas nws tau muab lawm—

52 Kom los ntawm qhov uas lawv ua raws li tej lus txib tus Tswv yuav muab lawv ntxuav thiab ua rau lawv huv ntawm tag nrho lawv tej kev txhaum, thiab txais tus Ntsuj Plig Dawb Huv los ntawm kev tso tes rau saum taub hau los ntawm tus uas tus Tswv tsa thiab muab lub hwj chim no khi lawm;

53 Thiab cov uas kov yeej los ntawm kev ntseeg, thiab cov uas tus Ntsuj Plig Dawb Huv ntawm txoj kev cog lus tau muab khi, tus uas Leej Txiv muab nplua mias los rau tag nrho cov uas ncaj thiab tseeb.

54 Lawv yog cov uas yog lub koom txoos ntawm tus Tub Hlob.

55 Lawv yog cov uas Leej Txiv tau muab txhua yam cob rau lawv tes—

56 Lawv yog cov uas yog cov pov thawj thiab cov vaj ntxwv, cov uas tau txais tag nrho nws lub hwj chim, thiab nws lub yeeb koob;

57 Thiab yog cov pov thawj rau tus Siab Tshaj Plaws, raws li Mekhixedes tus txheej txheem, uas yog raws li tus txheej txheem ntawm Enauj, uas yog raws li tus txheej txheem ntawm tus uas yog Tib Leeg Tub.

58 Yog li ntawd, raws li twb sau cia lawm, lawv yog cov vaj tswv, uas twb yog Vajtswv cov tub—

59 Yog li ntawd, txhua yam yog lawv li, txawm yog txoj sia los yog kev tuag, los sis tej yam nyob lub sij hawm no, los sis tej yam tseem yuav muaj los, tag nrho yog lawv li thiab lawv yog Khetos li, thiab Khetos yog Vajtswv li.

60 Thiab lawv yuav kov yeej txhua yam.

61 Yog li ntawd, tsis txhob cia ib tug neeg twg qhuas neeg, tiam sis cia kom nws qhuas Vajtswv, tus uas yuav muab tag nrho cov yeeb ncuab tsuj rau hauv nws qab xib taws.

62 Cov no yuav nyob ntawm Vajtswv thiab nws tus Khetos xub ntiag mus ib txhiab thiab ib txhis li.

63 Cov no yog cov uas nws yuav coj nrog nws los, thaum nws los saum cov huab saum ntuj los kav nws cov neeg hauv lub ntiaj teb.

64 Cov no yog cov uas yuav muaj feem nyob hauv thawj txoj kev sawv rov los.

65 Cov no yog cov uas yuav sawv los nyob hauv txoj kev sawv rov los ntawm cov ncaj ncees.

66 Cov no yog cov uas yuav los rau lub Roob Xi-oos, thiab los rau lub nroog ntawm tus Vajtswv muaj sia zees nyob, qhov chaw uas yog ceeb tsheej, qhov chaw uas dawb huv tshaj txhua qhov.

67 Cov no yog cov uas tau los mus koom ib pab tim tswv suav tsis txheeb, los rau pawg neeg sib sau ua ke thiab lub koom txoos ntawm Enauj, thiab ntawm tus Tub Hlob.

68 Cov no yog cov uas muaj lawv lub npe sau cia rau saum ntuj ceeb tsheej, qhov chaw uas Vajtswv thiab Khetos yog tag nrho sawv daws tus txiav txim.

69 Cov no yog cov neeg ncaj ncees uas yuav hloov ua neeg zoo tag nrho los ntawm Yexus uas yog tus nruab nrab ntawm txoj kev khi lus tshiab, tus uas ua tau txoj kev theej txhoj zoo tag nrho no los ntawm txoj kev cia nws tus kheej cov ntshav nrog.

70 Cov no yog cov muaj lub cev xilethi-aus, lawv lub yeeb koob yog zoo li lub hnub, ib yam li Vajtswv lub yeeb koob, qhov siab tshaj txhua qhov, lub yeeb koob uas tau muab sau hais tias muaj li lub hnub uas nyob saum nruab ntug.

71 Thiab ntxiv, wb tau pom lub ntuj thawlethi-aus, thiab saib seb thiab xyuas seb, cov no yog cov uas tau lub ntuj thawlethi-aus, lawv lub yeeb koob txawv li lub koom txoos ntawm tus Tub Hlob uas tau txais tag nrho tej uas yog Leej Txiv li, twb ib yam li qhov uas lub hli txawv ntawm lub hnub nyob saum nruab ntug.

72 Saib seb, cov no yog cov tau tuag uas tsis coj tej kev cai;

73 Thiab cov uas yog neeg cov ntsuj plig uas raug muab tso rau hauv tsev kaw, cov uas Leej Tub mus xyuas, thiab tshaj tawm txoj moo zoo rau lawv, kom lawv yuav raug txiav txim raws li thaum muaj cev nqaij daim tawv;

74 Cov tsis txais yuav zaj lus tim khawv txog Yexus thaum muaj cev nqaij daim tawv, tiam sis tom qab ntawd txais yuav.

75 Cov no yog cov neeg uas muaj sam xeeb nyob hauv ntiaj teb, uas neeg txoj kev txawj ntxias ua rau lawv dig muag.

76 Cov no yog cov uas txais nws lub yeeb koob, tiam sis tsis tau tag nrho tej uas nws muaj.

77 Cov no yog cov uas txais Leej Tub lub yeeb haum, tiam sis tsis tau tag nrho tej uas Leej Txiv muaj.

78 Yog li ntawd, lawv muaj lub cev thawlethi-aus, tiam sis tsis muaj lub cev xilethi-aus, thiab lub yeeb koob yeej sib txawv ib yam li lub hli txawv ntawm lub hnub.

79 Cov no yog cov uas tsis rau siab ua raws li tej lus tim khawv txog Yexus; yog li ntawd, lawv thiaj txais tsis tau lub meej mom kav peb tus Vajtswv lub nceeg vaj.

80 Thiab nim no qhov no yog qhov kawg ntawm wb txoj kev ua yog toog pom lub ntuj thawlethi-aus, uas tus Tswv txib kom wb muab sau cia thaum wb tseem muaj tus Ntsuj Plig puv npo.

81 Thiab ntxiv, wb tau pom lub yeeb koob ntawm lub ntuj thilethi-aus, uas muaj yeeb koob tsawg dua, ib yam li lub yeeb koob ntawm tej hnub qub txawv ntawm lub yeeb koob ntawm lub hli uas nyob saum nruab ntug.

82 Cov no yog cov tsis kam txais Khetos txoj moo zoo, thiab tej lus tim khawv txog Yexus.

83 Cov no yog cov tsis xyeej tus Ntsuj Plig Dawb Huv.

84 Cov no yog cov raug ntiab tawm mus rau hauv ntuj txiag teb tsaus.

85 Cov no yog cov yuav tsis txais kev txhiv dim tus dab phem kom txog thaum txoj kev sawv rov los zaum kawg tso, kom txog thaum tus Tswv, uas twb yog Khetos uas yog tus Me Nyuam Yaj, yuav ua nws txoj hauj lwm tiav tso.

86 Cov no yog cov uas tsis txais tag nrho tej uas nws muaj nyob hauv lub ntuj kav mus ib txhis, tiam sis txais tus Ntsuj Plig Dawb Huv los ntawm cov nyob hauv thawlethi-aus txoj kev txhawb pab;

87 Thiab cov nyob hauv thawlethi-aus txais los ntawm cov nyob saum xilethi-aus txoj kev txhawb pab.

88 Thiab cov nyob hauv thilethi-aus txais txoj kev qhuab qhia los ntawm cov tim tswv uas tus Tswv txib los txhawb pab lawv, los sis cov uas tus Tswv txib ua cov ntsuj plig los txhawb pab lawv; vim lawv yog cov uas yuav txais txoj kev cawm seej ua lawv tug.

89 Thiab wb tau pom li no, nyob hauv txoj kev ua yog toog uas los saum ntuj los, lub yeeb koob ntawm lub ntuj thilethi-aus, uas tshaj txhua txoj kev to taub;

90 Thiab tsis muaj ib tug neeg paub tsuas yog tus uas Vajtswv tau muab ua tshwm sim rau nws xwb.

91 Thiab li no wb tau pom lub yeeb koob ntawm lub ntuj thawlethi-aus uas muaj txhua yam zoo tshaj lub yeeb koob ntawm lub ntuj thilethi-aus, tsis hais ntawm yeeb koob, thiab ntawm hwj chim, thiab ntawm lub zog, thiab ntawm kev kav los yog.

92 Thiab li no wb tau pom lub yeeb koob ntawm lub ntuj xilethi-aus, uas muaj txhua yam zoo tshaj—qhov chaw uas Vajtswv, tus uas twb yog Leej Txiv, zaum saum nws lub rooj theej kiab kav mus ib txhiab thiab ib txhis li;

93 Tus uas txhua yam txo hwj chim txhos caug pe hawm ntawm nws lub rooj theej kiab, thiab qhuas nws mus ib txhiab thiab ib txhis li.

94 Lawv cov uas nyob ntawm nws xub ntiag yog lub koom txoos ntawm tus Tub Hlob; thiab lawv pom ib yam li Vajtswv pom lawv, thiab paub ib yam li Vajtswv paub lawv, vim tau txais tag nrho tej uas nws muaj thiab nws txoj kev tshav ntuj;

95 Thiab nws ua rau lawv muaj hwj chim, thiab muaj zog, thiab txawj kav kom sib npaug.

96 Thiab lub yeeb koob ntawm lub ntuj xilethi-aus nws zoo nws ib yam, twb ib yam li lub yeeb koob ntawm lub hnub nws zoo nws ib yam.

97 Thiab lub yeeb koob ntawm lub ntuj thawlethi-aus nws zoo nws ib yam, twb ib yam li lub yeeb koob ntawm lub hli nws zoo nws ib yam.

98 Thiab lub yeeb koob ntawm lub ntuj thilethi-aus nws zoo nws ib yam, twb ib yam li lub yeeb koob ntawm cov hnub qub nws zoo nws ib yam; ib yam li lub yeeb koob ntawm ib lub hnub qub twb txawv ib lub hnub qub, zoo li ntawd ib tug thiaj muaj yeeb koob txawv ib tug nyob hauv lub ntuj thilethi-aus;

99 Vim cov no yog cov uas hais tias yog Povlauj cov, thiab yog Apaulaus cov, thiab yog Kefas cov.

100 Cov no yog cov uas hais tias lawv ib txhia yog ib tug cov thiab ib txhia yog lwm tus cov—ib txhia yog Khetos cov thiab ib txhia yog Yauhas cov, thiab ib txhia yog Mauxes cov, thiab ib txhia yog Eli-as cov, thiab ib txhia yog Exayas cov, thiab ib txhia yog Yaxayas cov, thiab ib txhia yog Enauj cov;

101 Tiam sis tsis txais txoj moo zoo, thiab zaj lus tim khawv txog Yexus, thiab cov yaj saub, thiab txoj kev khi lus uas kav ib txhis.

102 Thiab qhov kawg, tag nrho cov no yog cov uas tus Tswv yuav tsis muab sau los ua ke nrog haiv neeg ntseeg, coj mus koom lub koom txoos ntawm tus Tub Hlob, thiab txais mus rau saum tej huab.

103 Cov no yog cov neeg dag; thiab neeg txawj ua khawv koob, thiab neeg deev luag poj luag txiv, neeg deev nkauj deev nraug, thiab txhua tus uas nyiam dag thiab hais lus dag.

104 Cov no yog cov uas raug Vajtswv txoj kev npau taws thaum nyob hauv ntiaj teb.

105 Cov no yog cov uas raug kev pauj ntawm cub hluav taws cig nyob mus ib txhis.

106 Cov no yog cov uas raug muab ntiab mus rau hauv ntuj txiag teb tsaus thiab raug Vajtswv uas Muaj Hwj Chim Tag Nrho txoj kev npau taws, kom txog lub caij nyoog uas muaj txhij txhua, thaum Khetos muab tag nrho cov yeeb ncuab tsuj kiag rau hauv nws qab xib taws, thiab ua nws txoj hauj lwm kom zoo tag nrho lawm tso;

107 Thaum nws yuav muab lub nceeg vaj coj mus, thiab muab cob rau Leej Txiv, tsis muaj qhov phem hlo li, hais tias: Kuv tau kov yeej lawm thiab tau tsuj lub rhawv tsuam txiv hmab kuv ib leeg, uas twb yog lub rhawv tsuam txiv hmab ntawm txoj kev tshawj chim ntawm tus Vajtswv uas Muaj Hwj Chim Tag Nrho txoj kev npau taws.

108 Tom qab ntawd nws yuav tau lub meej mom ntawm nws lub yeeb koob ntoo, mus zaum saum lub rooj theej kiab ntawm nws lub hwj chim los kav mus ib txhiab thiab ib txhis li.

109 Tiam sis saib seb, thiab xyuas seb, wb pom lub yeeb koob thiab cov neeg ntawm lub ntuj thilethi-aus tias, lawv coob suav tsis txheeb ib yam li cov hnub qub nyob saum nruab ntug, los yog ib yam li cov xuab zeb nyob nram ntug dej hiav txwv;

110 Thiab hnov tus Tswv lub suab hais tias: Tag nrho cov no yuav txhos lub hauv caug pe, thiab txhua tus nplaig yuav lees rau tus uas zaum rau saum lub rooj theej kiab mus ib txhiab thiab ib txhis li;

111 Vim lawv yuav raug txiav txim raws li tej yam uas lawv ua, thiab txhua tus neeg yuav tau txais raws li tej yam uas nws tus kheej tau ua, nws tus kheej txoj kev kav, nyob rau tej chaw nyob uas tau npaj lawm;

112 Thiab lawv yuav ua cov tub qhe rau tus Siab Tshaj Plaws; tiam sis qhov chaw Vajtswv thiab Khetos nyob lawv mus tsis tau, tej ntuj tsis paub kawg.

113 Qhov no yog qhov kawg ntawm txoj kev ua yog toog uas wb pom, uas tus Tswv txib wb kom muab sau cia thaum wb tseem muaj tus Ntsuj Plig puv npo.

114 Tiam sis tus Tswv tej hauj lwm tseem ceeb thiab zoo kawg nkaus, thiab tej txuj ci uas neeg tsis paub txog nws lub nceeg vaj uas nws tau muab qhia rau wb, uas muaj yeeb koob, thiab muaj lub zog, thiab txawj kav zoo tshaj txhua txoj kev to taub;

115 Uas nws txib wb kom wb yuav tsum tsis txhob sau thaum wb tseem muaj tus Ntsuj Plig puv npo, thiab tsis pub neeg hais lus txog;

116 Thiab neeg twb tsis muaj peev xwm muab tej ntawd qhia tawm, vim tib neeg yuav pom thiab to taub tej ntawd tsuas yog los ntawm tus Ntsuj Plig Dawb Huv lub hwj chim xwb, uas Vajtswv foom pub rau cov uas hlub nws, thiab hloov lawv tus kheej kom nws pom tias lawv yog neeg huv;

117 Rau cov uas nws pub lub cib fim no kom pom thiab paub ntawm lawv tus kheej;

118 Kom los ntawm tus Ntsuj Plig lub hwj chim thiab txoj kev qhia, thaum tseem muaj cev nqaij daim tawv, kom lawv muaj peev xwm tiv taus nws lub yeeb haum hauv lub ntuj muaj yeeb koob.

119 Thiab thov kom Vajtswv thiab tus Me Nyuam Yaj cia li muaj yeeb koob, thiab sam xeeb, thiab kev kav mus ib txhiab thiab ib txhis li. Amees.