Wóltaʼii 85
Diyin Yá Yáłtiʼí Joseph Smith díí diyingo bił ííshją́ą́ ályaa, Kirtland, Ohiodi, Níłchʼitsʼósí 27, 1832 yihahgo. Díí kweʼé Diyin Yá Yáłtiʼí William W. Phelps naaltsoos yichʼįʼ áyiilaaígíí biyiʼdóó haadzoh, éí Independence, Missouridi kééhatʼį́. Éí Diyin Yikééʼ Naazíinii Zionjįʼ ndahazʼnánígií baa ndáʼádíkidígíí yaa náhálneʼ áko éí bee hazʼáanii tʼáadoo yikʼeh dahółʼį́įd da éí bikéyah dóó bindaadeełii tʼáadoo diyingo nideiyiizláa da éí biniinaa Sodizin Bá Hooghanjí bikʼehgo éʼélʼínígíí tʼáadoo bikʼehgo badaʼiisyáa da.
1–5, Ziongi aa daʼiilyéhígíí éí bee aa hajoobaʼ binahjįʼ aa dahidoolyééł; 6–12, Łaʼ ayóó bidziilii dóó hayóígíí éí Ziondi Diyin Yikééʼ Naazíinii baa dahidoolyéłígíí eidoolééł.
1 Diyin Bóhólníihii yá naaltsoos ííłʼíinii, éí díí binaanishgo yee yikʼidiilniiʼ, éí nákééʼ náháneʼ neiyiizóohgo bikʼihodiiniiʼ, áádóó tʼáá ałtso Ziongi ádahooníłígíí, tʼáá ałtso kéyah dóó bindaadeełii ajoobaʼgo ndeiyiiléhígíí, dóó bishop bitsʼą́ą́dóó aa dahalyéhígíí ílį́įgo aa yiiléhígíí néíyiizóóh doo;
2 Áádóó ałdóʼ iinaʼ ádeiiłʼínígíí, bedaʼoodląʼ, dóó yindaalnishígíí; áádóó sodizin bá hooghan biyiʼ baa daʼiisyáhígíí bikééʼdóó atsʼáhaaskaiígíí ałdóʼ tʼáá ałtso yaa náʼiizóóh.
3 Diyin God yinízinígíí dóó yee haadzíʼígíí bitsʼą́ąjígo bee aa hojoobaʼ bee aa dahasyáhígíí bikʼehgo doo badaʼiisyáágóó, bibee hazʼáanii bee lą́go, éí bí einíláago, áko bidineʼé Diyin bibéeso yinahjįʼ ndaʼiiléego, éí Diyin Bóhólníihii akʼeh didoodleeł dóó adahodiʼdoolką́ą́ł bijí, yichʼįʼ hashtʼeʼ ádadiʼdoolníiłgo íídoolííł éí Diyin God bidineʼé bitah bízhiʼ deidoodzoh.
4 Áádóó bizází binákééʼ náháneʼ doo łaʼ biyiʼ siláa da doo, éí doodago haaígi da náhaasdzohgo doo bikʼídínóotah da éí doodago sodizin bá hooghan binákéé náháneʼ ałdóʼ doo biyiʼ siláa da doo.
5 Bízhiʼ doo daasdzoh da doo, dabizází dabízhiʼyę́ę ndi ałdóʼ, éí doodago baʼáłchíní dabízhiʼyę́ę Diyin God bibee hazʼáanii binaaltsoos ndi doo biyiʼ daasdzoh da doo, ní Diyin Tʼáá Ałtsoní bee Bóhólníihii.
6 Aooʼ, ní iinééʼ hazhoʼó áłtsʼíísígo hanádzihígíí, éí tʼáá hazhóʼígo yáłtiʼ dóó tʼáá ałtsoní neiyiiłná, áádóó łahda shitsʼin ditsxizgo ánéíyiilʼįįh tʼáadoo leʼé shił ííshjáá íílééhgo, kóníigo:
7 Áádóó baa hodoolzhish Shí, Bóhólníihii Diyin God, łaʼ ayóó bidziilii dóó hayóígíí adeeshʼaał, adziilii bílaʼ yee dah yootʼį́į́ł, adinídíín bikʼestiʼ, éí bizééʼdóó saad yee hahaadziih, hoolʼáágóó saadígíí yee; éí tʼáá aaníinii biyid biyiʼdóó háátiʼ, éí Diyin God bighan yikʼi hooʼááł, Diyin yikéé naazíinii bízhiʼ danítʼiʼígíí bikʼehgo kéyah bá daasdzoh, áádóó dabizází bízhiʼ ałdóʼ, áádóó baʼáłchíní bízhiʼ ałdóʼ, Diyin God bibee hazʼáanii binaaltsoos biyiʼ bízhiʼ danítiʼ;
8 Áko éí hastiin, Diyin God hágo bidííniid dóó yikʼidiilniiʼ, éí Diyin God bitsitsʼaaʼ dílzinii yidoołtsoł, éí atsiniltłʼish bee anoonééł bichʼįʼ kódoolnííł, atsiniltłʼish bee boʼoosniʼ nahalingo.
9 Áádóó tʼáá ałtso naaltsoos bee ééhániihii doo biyiʼ bízhiʼ dabikááʼgóó éí áajįʼ ahoolzhiizhgo baa doolyéłígíí bá ádin doo, ákondi yéego atídabidiʼdoolnííł, áádóó baa dahidoolyééłę́ę éí nááná łahjí doo daʼoodlánígíí baa dahidoolyééł, éí áadi dajidilwoshgo dajichah doo dóó hawooʼ ahídeidiłkʼash doo.
10 Díí éí doo tʼáá shí bee ádaahasneʼ da; éí bąą, Diyin Bóhólníihii éí áníigo, bídóʼ yehodoolííł.
11 Áádóó High Priesthood danilínée, éí naaltsoos bee hazʼáanii bikááʼ bízhįʼ doo daasdzoh da, éí doodago átsʼádahaaskai, éí doodago sodizin bá hooghan biyiʼdóó bízhiʼ bitsʼádahaasdzoh, áádóó aʼohgo Diyin bibeʼadziilii ałdóʼ, éí doodago sodizin daʼatahígíí, éí áajįʼ ayííłʼką́ągo Áláahdi Ayóó Átʼéii yikééʼ naazʼíinii bitahdi baa dahidoolyéłígíí ádin doo;
12 Éí bąą, priest baʼáłchíní adabiʼdiilyaayę́ęgi átʼáo ádabiʼdoolnííł, éí Ezra naaki góneʼ wóltaʼ hastą́diin dóó biʼaan tʼááłáʼí saad dashijaaʼgi náháásdzoh.