Vahe 87
Ko e fakahā mo e kikite ʻo kau ki he taú, naʻe fai mai ʻia Siosefa Sāmita ko e Palōfitá, ʻi Ketilani, ʻOhaiō pe ofi ki ai, ʻi he ʻaho 25 Tīsema, 1832. Naʻe mafola ʻi he taimi ko ʻení ʻa e moveuveú ʻi he ʻIunaiteti Siteití fekauʻaki mo e fakapōpulá pea mo hono fakataʻeʻaongaʻi ʻe Saute Kalolaina e ngaahi tukuhaú. ʻOku pehē ʻe he hisitōlia ʻa Siosefa Sāmitá naʻe “hā mai ʻa e ngaahi faingataʻaʻia ʻi he ngaahi puleʻanga” ʻo fakaʻau ke “toe mahino ange” ki he Palōfitá “ʻi ha toe taimi kimuʻa talu e hiki fononga ʻa e Siasí ki he feituʻu maomaonganoá.”
1–4, ʻOku tomuʻa fakahā ʻa e tau ʻi he vahaʻa ʻo e ngaahi Siteiti Fakatokelaú mo e ngaahi Siteiti Fakatongá; 5–8, ʻE tō ai ʻa e ngaahi fakatuʻutāmaki lahi ki he kakai kotoa ʻo e māmaní.
1 Ko e moʻoni, ʻoku folofola peheni ʻe he ʻEikí, ʻo kau ki he ngaahi tau ʻoku ofi ke hokó, ʻo kamata ʻi he angatuʻu ʻa Kalolaina Sauté, ʻa ia ʻe faifai pea iku ki he mate mo e mamahi ʻa e kakai tokolahi;
2 Pea ʻe hoko ʻa e taimi ʻe lilingi hifo ai ʻa e tau ki he ngaahi puleʻanga kotoa pē, ʻo kamata mei he feituʻú ni.
3 He vakai, ʻe mavahe atu ʻa e ngaahi Siteiti Fakatongá ke fakafili ki he ngaahi Siteiti Fakatokelaú, pea ʻe ui atu ʻe he ngaahi Siteiti Fakatongá ki ha ngaahi puleʻanga kehe, ʻio ʻa e puleʻanga ko Pilitānia Lahí, ʻa ia ko e hingoa ʻoku ui ʻaki iá, pea te nau ui atu foki ki ha ngaahi puleʻanga kehe, koeʻuhí ke maluʻi ʻa kinautolu mei he ngaahi puleʻanga kehé; pea ʻe toki lilingi atu ʻa e taú ki he ngaahi puleʻanga kotoa pē.
4 Pea ʻe hoko ʻo pehē, ʻi he hili ʻa e ngaahi ʻaho lahi, ʻe tuʻu hake ʻa e kau pōpulá ki honau ngaahi ʻeikí, ʻa ia ʻe teuʻi mo akoʻi ke tau.
5 Pea ʻe hoko ʻo pehē foki ko e ngaahi toenga ʻe toe mei he fonuá te nau teuteuʻi kinautolu ki he tau, pea te nau fuʻu ʻita lahi ʻaupito, pea te nau fakamamahiʻi ʻa e kau Senitailé ʻaki ʻa e fakamamahi lahi ʻaupito.
6 Pea ko ia, ʻe tangi ʻa e kakai ʻo e māmaní koeʻuhi ko e heletā pea mo e lilingi toto; pea ko e meʻa ʻi he hongé, mo e mahaki fakaʻauhá, mo e ngaahi mofuiké, pea mo e mana ʻo e langí, pea mo e ʻuhila mālohi mo ngingilá foki, ʻe ngaohi ai ʻa e kakai ʻo e māmaní ke nau ongoʻi ʻa e houhau, mo e tuputāmaki, mo e toʻukupu tautea ʻo e ʻOtua Māfimafí, kae ʻoua ke fakaʻosi ʻe he fakaʻauha kuo kotofá ʻa e ngaahi puleʻanga kotoa pē;
7 Koeʻuhi ke ngata ʻa e ʻalu hake ki he telinga ʻo e ʻEiki ʻo e Sapaotí ʻa e tangi ʻa e kau māʻoniʻoní, pea mo e toto ʻo e kau māʻoniʻoní, mei he kelekelé ke sāuni ki honau ngaahi filí.
8 Ko ia, mou tuʻu ʻi he ngaahi potu toputapu, pea ʻoua ʻe hiki mei ai kae ʻoua ke hokosia ʻa e ʻaho ʻo e ʻEikí; he vakai, ʻoku haʻu vave ia, ʻoku folofola ʻe he ʻEikí. ʻĒmeni.