1 Diyin Bóhólníihii kóní, tʼáá aaníí, tʼáá aaníigo Shí ándishní shiyeʼ, bąąhági átʼéii baa nisíníyáhę́ę bee naanídeitʼą́, baa náʼiníkąąhę́ę bikʼehgo, háálá nisodizin dóó nihikʼisoo bisodizin éí sidétsʼą́ą́ʼ.

2 Éí bąą, kodóó nikʼihojidoodliił Diyin bił hazʼą́ągi bee ąą ńdítį́hí naadoojih dóó tʼáá nanijaah doo; éí Diyin bił hazʼą́ doo nahjįʼ kónáádoolnííłgóó baa hoolzhiizh.

3 Shí tʼáá aaníigo nichʼįʼ haasdziih, Diyin bił hazʼą́ągi bee ąą ńdítį́hí neiyíjaaʼígíí tsʼídá doo nitsʼą́ą́ʼ náádidooʼjih da, díí nihokááʼgi hinínáago, dóó náásdi nihokááʼ nááhástʼą́ągi;

4 Ákótʼée ndi, nininahjįʼ díí diyingo ííshją́ą́ ádaalneʼígíí éí nááná łaʼ bá dooleeł, aooʼ, éí sodizin bá hooghan daʼatahígíí bichʼįʼ ałdóʼ.

5 Áádóó tʼáá ałtso díí Diyin God bitsʼą́ą́dééʼ ííshją́ą́ ádaalyaaígíí bichʼįʼ kódaalyaago, haitʼáó dahdeiyóléhígíí yaa ádahalyą́ą doo éí doodago éí doo yéego ílį́įgo yaa tsídadookos, dóó bá ndahodootʼááł, dóó yéego niłtsą́ bikʼijįʼ kódaadzaago dadidoogoh dóó naa ahinidééh doo, áádóó ayóó átʼéego bichʼįʼ deeyol, dóó ahoʼniiłtą́ągo, bighanyę́ę yéego bikʼinahołtą́.

6 Áádóó ałdóʼ, tʼáá aaníigo Shí nikʼisoo bichʼįʼ haasdziih, Sidney Rigdon dóó Frederick G. Williams, bąąhági áátʼįįdígíí baa nídiniʼą́, áádóó nigi átʼéego díí akéedi Diyingo hazʼą́ bibee aa nídítį́hí dahyoojih doo;

7 Áádóó ni nahóʼáhígíí biníkááʼ góneʼ kʼad Diyin yá yádaałtiʼí bá óltaʼ bibee aa nídítį́hí, binahjįʼ hadidoolnííł dííniid;

8 Áko éí binahjįʼ hadaałtʼéego naʼnitin doo, áádóó Israel bidineʼé dahdeiyíkáhígíí, dóó Gentile dineʼé, tʼáá daʼoosdląądígíí ánéélą́ągo Zion yił yisdéídooʼish;

9 Áádóó ni nahóʼáhígíí biníkááʼ góneʼ Diyin bizaad néididoolééł, áádóó nahóʼáhígíí biníkááʼ góneʼ Diyin bizaad tʼáá ałtso nihokááʼ nidaneesʼą́ąj́įʼ, Gentile dineʼé áłtsé bee hahodoolzhish, áádóó índa, áko shooh, díí nołʼį́, Jew dineʼé Diyin bizaad yee neidínóotįįł.

10 Áádóó éí bijį́įjįʼ ahodoolzhish Diyin Bóhólníihii bigaan binahjįʼ bibeeʼ adziilii bééhodoozįįł éí binahjįʼ diné dah deiyínéhígíí akʼedaʼdidootį́į́ł, doo daʼoodláanii dah deiyíkáhígíí, Joseph bighandóó háájéʼígíí, éí Diyin binahatʼá bee yisdáʼiildéehii yikʼidaʼdidootį́į́ł.

11 Háálá éí bijį́įdi baa hodoolzhish, diné tʼáá ałtso Jesus Christ binahatʼá bee yisdáʼiildéehii tʼáá bídabizaadígíí bikʼehgo, dóó tʼáá bí dabizaad yee deididootsʼį́į́ł, díí adziilii bee bikʼidahodiiniiʼígíí binahjįʼ, Aaʼáhályáanii nahaʼáhígíí binahjįʼ, Jesus Christ yéé dahodoosįįł.

12 Áádóó áko, tʼáá aaníigo Shí nihichʼįʼ haasdziih, díí tʼáá ółʼį́į dooleełgo ánihidishní naʼnohtin dóó ákáʼanáhinoołchéehgo nahohʼáa doo.

13 Áádóó diyin yá yádaałtiʼí yee hadahaasdzíʼę́ę nááná łahjįʼ saad ałtso íínilaago, sodizin bá hooghan daʼatahígíí dóó óltaʼ bikʼi díníʼį́įgo bá hwííʼááł doo;

14 Áádóó bá náhootʼaahgo, Aaʼáhályáanii diyingo ííshją́ą́ éʼéłʼįįhgo, Diyingo hazʼą́ bi tʼáá aaníinii tʼahdoo béédahoozįįhę́ę ííshją́ą́ íídoolííł;

15 Áádóó sodizin bá hooghan daʼatahígíí bá dahooʼááł doo, áádóó naaltsoos dawóltaʼígíí tʼáá ałtso yáʼádaatʼéhígíí baa ákodadínóosįįł, dóó nidaołkaah dóó bitsʼą́ą́dóó ídahoołʼaah, áádóó nihokááʼ dineʼé dabizaad, dóó saad ałʼąą ádaatʼéii, dóó diné danilíinii baa ídahoołʼaah.

16 Áádóó díí éí tʼáá ałtso niheʼiinaʼ ádaałaajįʼ nihindaanish dóó bíkáʼádaahtʼínígíí átʼée doo, atah ndahohʼáa doo, áádóó tʼáá ałtso sodizin dóó diyingo nahazʼą́ bídadéítiʼígíí bikʼidadínóhʼį́į doo.

17 Tʼáadoo yá danohsiní, éí doodago tʼáadoo nihił daholání; ákondi yówééʼ áníshtʼé dóó shaahodzódlí tʼáadoo danohsiní, háálá nihiiʼ naazʼíinii łoh bá niitʼą́ nahalingo nidanihidoołchxǫǫł.

18 Nihighan hazhóʼí nidanohʼaah; ił hóyééʼ dóó chin daabąąhígíí nízaadi bitsʼąą nidaahkai.

19 Kʼad, tʼáá aaníigo Shí nihichʼįʼ haasdziih, Frederick G. Williams, dóó nikáʼanálwoʼí dóó ná naʼizooʼígíí baʼáłchíní dóó bichʼooní, tʼáá tsxíłígo, hooghan łaʼ bá nidootʼááł.

20 Áádóó bíniʼdii shá naalʼaʼí náás silį́įʼii, Joseph Smith, Sen., bí dóó baʼáłchíní kéédahatʼį́įgi tʼáá ákweʼé dabighan doo; áádóó doo nahidoonih da Diyin Bóhólníihii ádííniidgo índa.

21 Áádóó bíniʼdii shíkáʼanálwoʼii, Sidney Rigdon, kééhatʼį́įgi tʼáá ákweʼé bighan doo Diyin Bóhólníihii nááná łahgi kééhwiinítʼį́į doo bidííniidgo índa.

22 Áádóó bíniʼdii bishop łaʼ akʼidéezʼį́įgo haidinóotaał, áádóó bíniʼdii éí dinéhígíí atʼį́į doo—dóó éí diné beʼoodląʼ niłdzilgo, Diyin God yikééʼ sizį́į doo—

23 Áko éí tʼáá ałtso ąąhadaazʼáí bikʼé nináʼdoolyééłgo íídoolííł; áko Diyin Bóhólníihii binaalyéhí báhooghan diné doo tʼóó yaa dadloh da doo.

24 Tʼáadoo niʼ kódanohtʼéhé yéego hadaʼnohtá, tʼáá áłahjįʼ sodadołzin, dóó daʼiinohdlą́, áko tʼáá ałtsoní nihá yáʼátʼéehgo nihá hashtʼedoolnííł, hazhóʼí dahinohná dóó diyingo bee ahadaʼdinohtʼánígíí béédaałniih.

25 Áádóó tʼáá nihaʼáłchínígíí tʼéiyá nidaahʼeesh doo, shá naalʼaʼí náás bidiiskánígíí Joseph Smith, Sen. éí tʼáá íiyisíí baʼáłchíní tʼéiyá, doo nihighandóó danilínígíí éí díí tʼáá íiyisíí bídadéítʼiʼ;

26 Áko shinaanish bohodoolníiłgo, tʼáadoo leʼé neílyáhígíí, éí doo nigha doolyéełgo nááná łaʼ diné doo naanish bił nilínígíí baa doolyééł da—

27 Áko éí da biniinaa shí naanish bee nihichʼįʼ haasdzíʼę́ę doo ádadoolííł da.

28 Áádóó ałdóʼ, tʼáá aaníigo Shí nihichʼįʼ haasdziih, shá naalʼaʼí Vienna Jaques béeso baa doojihgo bá nisin áko yikʼeniʼdooléłígíí tʼáá yíighah doo, áádóó kéyah Zion góde doogááł;

29 Áádóó béeso bííʼohígíí éí yiilzį́įʼgo shichʼįʼ kódeidoolííł, áádóó baa hoolzhiizhgo bichʼįʼ nináʼdoolyééł.

30 Tʼáá aaníigo Shí nihichʼįʼ haasdziih, tʼáá áko niizį́įgo kéyah Ziongóó doogááł, áádóó kéyah baa deetʼánígíí éí bishop bichʼįʼ kwíídoolííł;

31 Áko shaʼ ólíigo bił ahodeezyéelgo bił hwiidooʼaał, áádóó doo bił hóyééʼgóó iiná íídoolííł.

32 Áádóó áko shooh, Shí tʼáá aaníigo nihichʼįʼ haasdziih, díí bee haasdzíʼígíí nídadohsoh, áádóó nihikʼisoo Ziondi kódabidiʼdoohniił, ayóóʼóʼóní bee yáʼátʼéeh dabidohniił, tʼáá shí ííniizį́įgo Zion bikʼidadínóhʼį́į dooleeł éí ałdóʼ bee nihikʼidiishniiʼ.

33 Éí bąą, bíniʼdii díí yąąh dabíneʼígíí doo tʼáá áłahjįʼ yee shaa nídaatʼį́į da doo.

34 Áko shooh, Shí nihichʼįʼ haasdziih nihikʼisoo Ziondi kéédahatʼínígíí ádaa nídaʼookąąh dooleeł, áko éí Diyin yá ndaalʼaʼí yaa bił dahózhǫ́ǫ dooleeł.

35 Ákótʼée ndi, tʼáá ląʼígo doo baa shił hózhǫ́ǫ da; áádóó ałdóʼ shá naalʼaʼí William E. McLellin doo baa shił hózhǫ́ǫ da, áádóó shá naalʼaʼí Sidney Gilbert ałdóʼ; áádóó bishop ndi, áádóó diné ląʼígo yaa ádaa nídaʼdookąąłígíí hólǫ́.

36 Ákondi tʼáá aaníigo nihichʼįʼ haasdziih, Shí, Diyin Bóhólníihii, éí Zion bichʼįʼ saad adiyeeshnił, dóó binaatʼáanii dabidziilígíí néídeeshkąął, áádóó bichʼah hoshishkéego bąąhági átʼéii yikʼeh didoodleeł áádóó índa shidááhdóó niłtólí dooleeł.

37 Háálá doo hizhdółnááł átʼéégóó siʼą́ą dooleeł. Shí, Diyin Bóhólníihii, díí bee haasdzííʼ. Amen.