Wóltaʼii 98
Diyin Yá Yáłtiʼí Joseph Smith díí diyingo bił ííshją́ą́ ályaa, Kirtland, Ohiodi, Biniʼantʼą́ą́tsʼózí 6, 1833 yihahgo. Díí diyingo ííshją́ą́ ályaaígíí Missouridi Akéé Naazíinii diné bikʼijįʼ daazlį́įgo biniinaa díí bíł chʼétʼą́. Missouridi Sodizin Bá Hooghan atʼah danilínígíí ląʼí ndahaznáago éí nááná łaʼ ákweʼé ndahaznánígíí doo bił yáʼádaatʼéeh da, éí ákweʼé ląʼí Akéé Naazíinii ndahaznánígíí biniinaa yikʼee dadeesyiz, wááshindoon dóó béeso binahjįʼ daʼiiná ádaatʼéhígíí, dóó bibee ádaʼoolʼįįł áádóó beʼoodląʼ ałʼąą ádaatʼéhígíí biniinaa díí bił chʼétʼą́. Yaʼiishjááshtsoh 1833 yihahgo, diné hadahoniłchaadii éí Sodizin Bá Hooghan binaadeełii deiyííłchxǫʼ, áádóó naakigo Sodizin atah nilínígíí jeeh łizhiní dóó tsʼídii bitaʼ yee deezhdléézh, áádóó Akéé Naazíinii Jackson County hahoodzohdóó chʼínóóhnééh deidííniid. Áko díí Missouridi achʼįʼnahwiiʼná ádahooníłígíí Diyin Yá Yáłtiʼí Kirtlanddi yidiiztsʼą́ą́ʼ (náhástʼéídi neeznádiin tsin sitą́ądi áhóótʼįįd ndi), díí yéego atíʼdahoodzaago nahashzhiizhígíí éí diyingo bił ííshją́ą́ ályaago tʼéiyá bił bééhózin doo.
1–3, Akéé Naazíinii bee bichʼįʼ ndahwiisnáʼígíí éí bá yáʼátʼééh doo; 4–8, Akéé Naazíinii éí adahwiisʼáágóó kéyah bibee hazʼáanii bee lą́ daʼazlį́ʼígíí yikʼeh dahółʼį́į doo; 9–10, Nihokááʼ dineʼé doo dabiyoochʼídígíí, dóó dahóyánígíí, dóó yáʼádaatʼéhígíí éí wááshiindoonjí naanish ádeełʼínígíí yíkáʼanídeijah doo; 11–15, Diyin Bóhólníihii binaanish binahjįʼ beʼiinaʼ ndahaztiʼígíí éí hoolʼáágóó iiná baa dahidoolyééł; 16–18, Anaaʼ hodooleełgo bikʼijįʼ danohłį́ áádóó kʼé hólǫ́ǫ dooleełgo bee ndaʼnohtin; 19–22, Kirtlanddi Akééʼ Naazíinii bichahoʼdooshkeed dóó ádaa nídaʼoohkąąh dabiʼdooniid; 23–32, Diyin Bóhólníihii Bidineʼé bikʼijįʼ ídlį́ dóó atílʼį́ bikʼijįʼ kólyaaígíí éí Bibee hazʼáanii ííshją́ą́ áyiilaa; 33–38, Diyin Bóhólníihii yee nahoníʼą́ągo tʼéiyá anaaʼ tʼáá áko dooleeł; 39–48, Akéé Naazíinii éí beʼenaʼí yaa nídaʼdiiʼaah doo, éí, ádaa nídaʼooskango, éí ałdóʼ Diyin Bóhólníihii biʼáháchʼįʼ doo bikʼijįʼ kódoolnííł da.
1 Shikʼis danohłíinii tʼáá aaníigo Shí nihichʼįʼ haasdziih, tʼáadoo nídaałdziddí, nihijéí bee chánah danohłį́į doo; aooʼ, kodóóʼ tʼáá áłahjįʼ nihił dahózhǫ́ǫ leʼ, áádóó tʼáá ałtsojįʼ ahééh danohsin leʼ;
2 Diyin Bóhólníihii bibaʼ ánítʼée leʼ, háálá Sabaoth Diyin Bóhólníihii éí nihisodizin yidiiztsʼą́ą́ʼ, áádóó díí bee bidáʼdidooljah dóó tʼáá aanínígíí náhidoodzoh—Diyin Bóhólníihii yee ádéíhaadzííʼ dóó yee nohoníʼą́ ákó éí binahjįʼ yee lą́ asłį́į́ʼ.
3 Éí bąą, díí yee ádéé haadzíʼígíí niheinílá, tsʼídá doo łahgo ánáoʼneʼ átʼéii yee nihił ahaʼdeetʼą́ bohodoolnííł biniyé; áádóó tʼáá ałtsoní bee atínihiʼdiilyaaígíí nihá yáʼátʼéehgo nihá hashtʼedoolnííł, dóó shízhiʼ ayóó átʼáo baa haʼnih doo, ní Diyin Bóhólníihii.
4 Áádóó áko, kéyah bibee hazʼáanii bídadéítiʼígíí tʼáá aaníigo Shí bee nihichʼįʼ haasdziih, shidineʼé tʼáá áłtsóní bee bichʼįʼ haasdzíʼígíí yikʼeh dahółʼį́į doogo bá nisin.
5 Áádóó kéyah bibee hazʼáanii bee lą́ daʼazlį́ʼígíí, tʼáá hó jinízingo naʼadah bitłʼááh naazléíi éí tʼáá ákogi ádaatʼéii dóó bee há adahaztʼiʼii yaa áhályą́, éí nihokááʼ dineʼé tʼáá átʼé daabí, dóó shidááhdóó tʼáá ákogi ádaatʼé.
6 Éí bąą, Shí, Diyin Bóhólníihii, nihí, dóó nihikʼisoo shisodizin daʼatahígíí doo nihikʼí hóshʼááh da doo, éí adahwiisʼáágóó kéyah bibee hazʼáanii bee lą́ daʼazlį́ʼígíí yikʼeh dahółʼį́į doo;
7 Áádóó nihokááʼ dineʼé bibee hazʼáanii baa haasdzíʼígíí, díidí biláahjįʼ doodaiiʼ biʼohgo haʼiidziihígíí, éí bąąhági átʼéii bitsʼą́ą́dóó átʼé.
8 Shí, Bóhólníihii Diyin God nishłíinii, éí tʼáá nihí nihóhólníihgo ndaahkaigo ánihiishłaa, éí bąą tʼáá aaníí tʼáá nihí nihóhólníihgo ndaahkai; áádóó índa bee hazʼáanii ałdóʼ nihididoochił.
9 Ákótʼée ndi, diné doo yáʼáshóonii bóhólníihgo éí diné yínííł danilį́į łeh.
10 Ákohgo, diné doo dabiyoochʼídígíí dóó dahóyánígíí éí yéego biká áhátʼį́į doo, diné doo dabiyoochʼídígíí dóó dahóyánígíí bikéé nisoozį́įgo bíkáʼanídaahjah doo; díí biʼoh átʼéego éí bąąhági átʼéii bitsʼą́ą́dóó átʼé.
11 Áádóó díí bee nihichʼįʼ haasdziih, áko doo ákwii óʼooʼnííłii éí nahjįʼ kódaołééh dóó tʼáá ałtsóní yáʼátʼéehii tʼéiyá yéego bąąh dashoojééʼ, saad tʼáá ałtso Diyin God yee hahadziihii bee dahinohnáa doo.
12 Háálá badaʼólíhígíí éí tʼáá ałkééʼ saad baa hashʼaah dooleeł, bee nahazʼą́ ałkééʼ baahishłéé doo; áádóó bee nanihinishtaah dóó nihedaʼadziil bídínéeshtaał.
13 Áádóó tʼáá háiida shí shiniinaa jiinánígíí nináʼázhdeetʼą́ągo, háálá shízhiʼ biniinaa, éí jiinánígíí ádá shóizhdoołtʼeeł, hoolʼáágóó iiná ndi.
14 Éí bąą, niheʼanaaʼí tʼáadoo béédaałdzidí, háálá díí shijéí biyiʼdi bee nihoníʼą́ʼ, ní Diyin Bóhólníihii, niheʼadziilii tʼáá ałtsóní bee bídínéeshtaał, bee nihił ahaʼdinishtʼánígíí daatsí bikʼeh dahonołʼį́į doo, azhą́ náádanihiʼdiilyáajįʼ ndi, áko índa daʼnohłínígíí baa ákóhodínóozįįł.
15 Háálá bee nihił ahaʼdinishtʼánígíí doo bikʼeh dahonołʼį́į́góó éí doo iinishłį́įgóó shaa ntsídaahkees.
16 Éí bąą, anaaʼ hodooleełgo bikʼijįʼ danohłį́ áádóó kʼé hólǫ́ǫ dooleełgo bee ndaʼnohtin, dóó áłchíní bizhéʼé bijéí yee tʼááłáʼí nídadoodleeł, áádóó éí azhéʼé baʼáłchíní bijéí yee tʼááłáʼí nídadoodleełgo yéego bíkáʼádaahtʼį́;
17 Áádóó ałdóʼ, Jew dineʼé Diyin Yá Yádaałtiʼí bijéí yee tʼááłáʼí nídadoodleeł, áádóó Diyin Yá Yádaałtiʼí Jew dineʼé bijéí yee tʼááłáʼí nídadoodleeł; éí doodago éí deeshááł dóó nahasdzáán tʼáá siʼą́ą ńtʼę́ę́ʼ doo yáʼáshóonii bee bikʼijįʼ hadeesdzih, dóó tʼáá ałtso atsʼíís shinááł adahididoolkʼą́ą́ł.
18 Tʼáadoo nihijéí yąąh dabíneʼí; háálá shiZhéʼé bighan daʼílíinii tʼóó ahayóí, áádóó áadi nihá hazʼą́ągo nihá hashtʼe hooshłaa; áádóó shiZhéʼé dóó shí honiidlónídi, nihí ałdóʼ áadi dahonohłǫ́ǫ dooleeł.
19 Áko shooh, Shí, Diyin Bóhólníihii, éí Kirtlanddi ląʼí da sodizin daʼatahígíí doo tʼáá íiyisíí baa shił hózhǫ́ǫ da;
20 Háálá bibąąhági ádaatʼée doo niʼ kódeiléeh da, dóó doo yáʼáshǫ́ǫ́góó ádaʼałínígíí ałdóʼ, bijéí yee ádaadadzódlí, dóó adáhonooní, dóó tʼáá átʼé tʼóó baaʼihii yaa naakai, dóó saad bee hódzáanii dóó hoolʼáágóó iiná baa níláhígíí ałdóʼ doo yikʼeh dahółʼį́į da.
21 Shí, Diyin Bóhólníihii, tʼáá aaníigo nihichʼįʼ haasdziih, éí doo ádaa nídaʼooskangóó dóó bee bichʼįʼ haasdzíʼígíí doo yikʼeh dahółʼį́į́góó, bichʼahodeeshkeeł dóó tʼáá shí íínisinígíí bichʼįʼ kódeeshłííłgo bee hastʼeʼ ninázhdookah.
22 Áádóó díí bee nihichʼįʼ hanáánásdziih, tʼáá ałtsó bee nihichʼįʼ haasdzííʼígíí bikʼeh dahonołʼį́įgo éí, Shí, Diyin Bóhólníihii, tʼáá ałtso bee hoshishkéhígíí dóó tʼóó báhádzidgo nihá nahwiideeshʼáłígíí éí nahjįʼ kódeeshłííł, áádóó chʼį́įdiitah bidáńdítį́hí éí doo nihikʼindookǫs da.
23 Kʼad éí, nihaʼáłchíní dóó nihichʼooní bídéítiʼígíí bee nihichʼįʼ haasdziih—diné atínihiilaago, éí doodago nihaʼáłchíní atíyiilaago, tʼááłáhídigo, tʼóó bił ádanohtʼéego bichʼįʼ hadaʼíínółníigo doo tʼáá ádzaagóó bichʼįʼ yádaałtiʼgóó, éí doodago doo nátʼą́ą́ átíʼhodeeshłííł danohsingóó, éí yáʼátʼéehii bee nihichʼįʼ nidaʼdoolyééł;
24 Ákondi doo bichʼįʼ hadaʼíínółníígóó, éí tʼóó nihikʼijįʼ doodzoh áádóó tʼáá łaʼ bá ídaʼnoołʼąąd yę́ęgi ánéeltʼeʼgo nihikʼijįʼ bee nídadíʼnóolʼąął.
25 Áádóó ałdóʼ, niheʼanaʼí naakidi atínihiilaago, dóó niheʼanaʼí doo tʼáá ádzaagóó bichʼįʼ yádaałtiʼgóó, dóó tʼóó bił ádanohtʼéego bichʼįʼ hadaʼíínółníigo, éí yáʼátʼéehii neeznádiindi bee nihichʼįʼ nidaʼdoolyééł.
26 Áádóó ałdóʼ, éí táádi atínihiilaago, dóó tʼóó bił ádanohtʼéego bichʼįʼ hadaʼíínółníigo, éí yáʼátʼéehii dį́į́di ałhąąh náneeláago bee nihichʼįʼ nidaʼdoolyééł;
27 Áádóó díí tááʼgo tʼáá aaníigo áhoodzaaígíí éí niheʼanaʼí doo ádaa náʼookąąhgóó bikʼijįʼ siláa dooleeł, áádóó doo kʼééʼdoolchxǫǫł da.
28 Áádóó áko, tʼáá aaníigo Shí nihichʼįʼ haasdziih, áko éí anaʼí sháháchʼįʼ yikʼee chʼííníchą́ąʼgo, dóó doo shidááh niidlóózgóó bá nihoníʼą́ągo, éí shízhįʼ binahjįʼ bee bił dahodoołnih, áko doo atínáánihidoodlííł da, nihaʼáłchíní ałdóʼ, náásgóó tááʼ dóó dį́į́di nídaʼazhchínígíí ałdóʼ éí nihaʼałchíní dóó bidaʼáłchínígíí ndi.
29 Áádóó áko, ni éí doodago naʼałchíní, éí doodago nihaʼałchíní baʼáłchínígíí éí náásgóó tááʼ dóó dį́į́di nídaʼazhchínígíí éí nihichʼįʼ dahyiiteʼgo, niʼanaʼí nilákʼéélóóz doo;
30 Áádóó doo atíinilaagóó éí, Diyinkʼehgo yínáłígíí binahjįʼ nikʼihozhdoodliił; áádóó naʼałchíní dóó badaʼáłchínígíí éí náásgóó tááʼ dóó dį́į́di nídaʼazhchínígíí ałdóʼ.
31 Ákótʼée ndi, neʼanaʼí éí yínítąʼ; dóó éétʼįįdígíí bikʼehgo atíinilaago éí tʼáá ákogi óʼoołaa doo; niʼdiyoolyéełgo yíká áátʼįįdgo, dóó neʼiinaʼ atíídoolíiłgo, ni éí yínítąʼ dóó bá nahwííníʼą́ągo éí tʼáá ákogi íʼiinilaa doo.
32 Áko shooh, shá naalʼaʼí Nephi, dóó danizhéʼé, Joseph, dóó Jacob, dóó Isaac, dóó Abraham, dóó tʼáá ałtso akʼidą́ą́ʼ shá yádaałtiʼí dóó hastóí naakitsʼáadah shikééʼ naazíinii díí bee hazʼáanii baa hílá.
33 Áádóó ałdóʼ, díí bee hazʼáanii ałkʼidą́ą́ʼ shikééʼ naazíinii baa hílá, áko tʼáá ałtso nihokááʼ dineʼé dah deíkááhgóó, ałkʼéí danidlíinii, bizaad ałʼąą ádaatʼéii dóó nihokááʼ dineʼé danilíinii doo yikʼijįʼ anaaʼ ádeidoolííł da, tʼáá hazhóʼí Shí, Diyin Bóhólníihii, ábidííniidgo tʼéiyá.
34 Áádóó łaʼ tʼáá ałtso nihokááʼ dineʼé dah deíkááhgóó, bizaad ałʼąą ádaatʼéii dóó nihokááʼ dineʼé danilíinii bikʼijįʼ anaa ádeidoolííłgo, áłtsé nihokááʼ diné danilíinii, tʼáá ałtso nihokááʼ dineʼé dah deíkááhgóó, éí doodago bizaad ałʼąą ádaatʼéii kʼé bidahnaatʼaʼí yichʼįʼ hadeidoołtsos;
35 Áádóó éí nihokááʼ dineʼé kʼé bidahnaatʼaʼí bichʼįʼ kólyaaígíí, naakidi da éí doodago tááʼdi da, doo deiniizį́į́ʼgóó Diyin Bóhólníihii bidááhdóó yaa dahodoolnih;
36 Áadi índa Shí, Diyin Bóhólníihii, saad łaʼ bee bichʼįʼ hadeesdzih, dóó tʼáá ałtso nihokááʼ dineʼé dah deíkááhgóó, bizaad ałʼąą ádaatʼéii dóó nihokááʼ dineʼé danilíinii yichʼįʼ anaaʼ ádeidoolííłgo shił tʼáá áko doo.
37 Áádóó Shí, Diyin Bóhólníihii, biʼanaaʼ tʼáá átʼé yá íídoolííł, áádóó baʼáłchíní biʼanaaʼ ałdóʼ, dóó baʼáłchíní badaʼáłchínígíí ałdóʼ, tʼáá ałtso beʼanaʼí yikʼeh dadeesdlį́įʼjįʼ índa, tááʼdi dóó dį́į́ʼdi ałkééʼ ndaʼazhchį́įjįʼ ndi.
38 Áko shooh, díí tʼáá ałtso nihokááʼ dineʼé yikʼehgo ádaʼdoolííłgo bá siláa doo, Bóhólníihii nihiDiyin God kóní, háálá díí éí tʼáá ákogi átʼáo ndahwiistʼą́ągo shidááhdóó ádaalʼį́į doo.
39 Áádóó ałdóʼ, tʼáá aaníigo Shí nihichʼįʼ haasdziih, niheʼanaʼí tsʼídá áłtsé nihichʼįʼ anaaʼ ádeiyiilaago, dóó ádaa nídaʼooskango dóó nihaa nídaʼdinohʼaah daaníigo sodadoolzingo, éí baanídaʼdiyoohʼááł, áádóó doo éí tʼáá aaníí neʼanaʼí bikʼijįʼ nááʼsíníłʼą́ą da doo—
40 Áádóó tʼáá ákótʼáo naakidi dóó tááʼdi ákódaadzaago ałdóʼ; áádóó tʼáá ádaanínádaʼookąąhgo tʼáá ahą́ą́h nihichʼįʼ anaaʼ ádeiłʼį́įgo, baanídaʼdiyoohʼaah dooleeł, azhą́ tsostsʼidiin tsostsʼidi ałhą́ą́h nániiláa ndi.
41 Áádóó doo ákǫ́ǫ́ nikʼijįʼ áátʼįįdgóó dóó doo tsʼídá áłtsé ádaa náʼooskangóó, ákódzaa ndi baanídiʼdííʼááł.
42 Áádóó naakidi doo ákǫ́ǫ́ nikʼijįʼ áátʼįįdgóó, dóó doo ádaa náʼooskangóó, ákódzaa ndi baanídiʼdííʼááł.
43 Áádóó tááʼdi doo ákǫ́ǫ́ nikʼijįʼ áátʼįįdgóó, dóó doo ádaa náʼooskangóó, ákódzaa ndi baanídiʼdííʼááł.
44 Ákótʼée ndi dį́į́ʼdi doo ákǫ́ǫ́ nikʼijįʼ áátʼįįdgo éí doo baanídiʼdííʼááł da, ndi díí nikʼijį́ áátʼįįdígíí Diyin Bóhólníihii bidááhdóó bee bił hodíílnih; áádóó doo kʼéébiʼdoolchǫǫł da ádaa náʼooskango tʼéiyá áádóó tʼáá ałtsóni yee nikʼijįʼ áátʼįįdígíí éí dį́įʼdi ałhą́ą́h nániiláago yikʼé nináʼdoodlééł.
45 Áádóó díí áyiilaago, nijéí tʼáá átʼéé ńtʼę́ę́ʼ bee baanídiʼdííʼááł; áádóó díí doo áyiilaagóó éí, Shí, Diyin Bóhólníihii, neʼanaʼí tʼááłáhídi neeznádiin ałhąąh nániilyáago ná baa nídééshtʼįįł;
46 Áádóó baʼáłchíní ałdóʼ, áádóó baʼáłchíní badaʼáłchínígíí tʼáá átʼé dashijoołahígíí ałdóʼ, tááʼdi dóó dį́į́ʼdi ałkééʼ ndaʼazhchį́įjįʼ.
47 Ákondi áłchíní ádaa nídaʼooskango, éí doodago áłchíní badaʼáłchínígíí, tʼáá átʼéé ńtʼę́ę́ʼ bijéí, yee ádaatʼéhígíí, dabíniʼ dóó bedaʼadziilii yee, Bóhólníihii biDiyin God yichʼįʼ nináhaaskaigo, áádóó dį́į́di ałhąąh nániilyáago tʼáá ałtsóni yee nikʼijįʼ áátʼįįdę́ę háádidoolnííł, éí doodago éí dabizhéʼé yee nikʼijįʼ ádáátʼįįdígíí, éí doodago dabizhéʼéyę́ę dabizhéʼégo, ákohgo índa náháchįʼyę́ę nahjįʼ kódíílííł;
48 Áádóó sháháchįʼyę́ę doo bikʼijįʼ síłʼą́ą da dooleeł, ní Bóhólníihii niDiyin God, áádóó yee nihikʼijįʼ ádáátʼįįdyę́ę éí Diyin Bóhólníihii doo bidááhdóó bikʼijįʼ siláago baa náádahídóotʼįįł da. Amen.