ປຈສ, ປະຖົມມະການ 14:25–40. ປຽບທຽບໃສ່ກັບ ປະຖົມມະການ 14:18–20
ເມນຄີເສເດັກອວຍພອນອັບຣາມ. ການປະຕິບັດສາດສະໜາກິດທີ່ຍິ່ງໃຫຍ່ຂອງເມນຄີເສເດັກ ແລະ ອຳນາດ ແລະ ພອນຂອງຖານະປະໂລຫິດແຫ່ງເມນຄີເສເດັກ ໄດ້ຖືກບັນຍາຍໄວ້.
25 ແລະ ເມນຄີເສເດັກໄດ້ເປັ່ງສຽງ ແລະ ອວຍພອນອັບຣາມ.
26 ບັດນີ້ ເມນຄີເສເດັກເປັນຄົນມີສັດທາ, ຜູ້ໄດ້ເຮັດຄວາມຊອບທຳ; ແລະ ເມື່ອຕອນຍັງນ້ອຍ ເພິ່ນໄດ້ຢຳເກງພຣະເຈົ້າ, ແລະ ໄດ້ປິດປາກສິງ, ແລະ ໄດ້ດັບຄວາມຮ້ອນຂອງໄຟ.
27 ແລະ ດັ່ງນັ້ນ, ໂດຍທີ່ໄດ້ຮັບຄວາມເຫັນຊອບຂອງພຣະເຈົ້າ, ເພິ່ນຈຶ່ງໄດ້ຖືກແຕ່ງຕັ້ງເປັນມະຫາປະໂລຫິດ ຕາມລະບຽບຂອງພັນທະສັນຍາ ຊຶ່ງພຣະເຈົ້າໄດ້ເຮັດໄວ້ກັບເອນົກ,
28 ມັນເປັນໄປຕາມລະບຽບຂອງພຣະບຸດຂອງພຣະເຈົ້າ; ຊຶ່ງລະບຽບໄດ້ເກີດຂຶ້ນ, ບໍ່ແມ່ນໂດຍມະນຸດ, ຫລື ໂດຍຄວາມປະສົງຂອງມະນຸດ; ບໍ່ແມ່ນໂດຍພໍ່ ຫລື ແມ່; ບໍ່ແມ່ນໂດຍການເລີ່ມຕົ້ນຂອງວັນ ຫລື ໂດຍການສິ້ນສຸດຂອງປີ; ແຕ່ໂດຍພຣະເຈົ້າ;
29 ແລະ ມັນໄດ້ຖືກມອບໃຫ້ມະນຸດ ໂດຍການເອີ້ນດ້ວຍສຸລະສຽງຂອງພຣະອົງເອງ, ຕາມພຣະປະສົງຂອງພຣະອົງເອງ, ແກ່ຄົນຫລາຍຕໍ່ຫລາຍຄົນທີ່ເຊື່ອໃນພຣະນາມຂອງພຣະອົງ.
30 ເພາະພຣະເຈົ້າໂດຍທີ່ໄດ້ປະຕິຍານກັບເອນົກ ແລະ ກັບລູກຫລານຂອງເພິ່ນ ດ້ວຍຄຳສາບານດ້ວຍຕົວພຣະອົງເອງ; ວ່າທຸກຄົນທີ່ໄດ້ຮັບການແຕ່ງຕັ້ງຕາມລະບຽບ ແລະ ການເອີ້ນ ຈະມີອຳນາດ, ໂດຍສັດທາ, ເພື່ອທຳລາຍພູເຂົາ, ເພື່ອແຍກທະເລ, ເພື່ອເຮັດໃຫ້ນ້ຳແຫ້ງ, ເພື່ອປ່ຽນສາຍນ້ຳອອກຈາກເສັ້ນທາງເດີນຂອງມັນ;
31 ເພື່ອຕໍ່ຕ້ານບັນດາກອງທັບຂອງປະຊາຊາດ, ເພື່ອແຍກແຜ່ນດິນໂລກ, ເພື່ອຕັດສາຍຮັດທຸກເສັ້ນ, ເພື່ອຢືນໃນທີ່ປະທັບຂອງພຣະເຈົ້າ; ເພື່ອເຮັດທຸກສິ່ງທັງປວງຕາມພຣະປະສົງຂອງພຣະອົງ, ຕາມພຣະບັນຊາຂອງພຣະອົງ, ປາບເຂດປົກຄອງ ແລະ ອຳນາດທັງຫລາຍ; ແລະ ສິ່ງນີ້ໂດຍພຣະປະສົງຂອງພຣະເຈົ້າ ຊຶ່ງດຳລົງຢູ່ກ່ອນການວາງຮາກຖານຂອງໂລກ.
32 ແລະ ມະນຸດໂດຍທີ່ມີສັດທານີ້, ທີ່ຂຶ້ນມາເຖິງລະບຽບນີ້ຂອງພຣະເຈົ້າ, ໄດ້ຖືກປ່ຽນແປງສະພາບ ແລະ ຖືກພາຂຶ້ນສູ່ສະຫວັນ.
33 ແລະ ບັດນີ້, ເມນຄີເສເດັກໄດ້ເປັນປະໂລຫິດຂອງລະບຽບນີ້; ສະນັ້ນ ເພິ່ນຈຶ່ງໄດ້ຮັບສັນຕິສຸກ ໃນຊາເລັມ, ແລະ ຖືກເອີ້ນວ່າ ເຈົ້າສັນຕິລາດ.
34 ແລະ ຜູ້ຄົນຂອງເພິ່ນໄດ້ເຮັດຄວາມຊອບທຳ, ແລະ ໄດ້ຮັບສະຫວັນ, ແລະ ໄດ້ສະແຫວງຫາເມືອງຂອງເອນົກ ຊຶ່ງພຣະເຈົ້າໄດ້ຮັບເອົາໄປກ່ອນໜ້ານັ້ນ, ໄດ້ແຍກມັນອອກຈາກແຜ່ນດິນໂລກ, ໄດ້ຮັກສາມັນໄວ້ສຳລັບຍຸກສຸດທ້າຍ, ຫລື ຄາວສິ້ນສຸດໂລກ;
35 ແລະ ໄດ້ກ່າວ, ແລະ ໄດ້ປະຕິຍານດ້ວຍຄຳສາບານ, ວ່າສະຫວັນ ແລະ ແຜ່ນດິນໂລກ ຈະບໍ່ເຂົ້າມາຫາກັນອີກ; ແລະ ບັນດາບຸດຂອງພຣະເຈົ້າ ຈະຖືກທົດສອບດັ່ງນັ້ນດ້ວຍໄຟ.
36 ແລະ ເມນຄີເສເດັກຄົນນີ້, ໂດຍທີ່ໄດ້ສະຖາປະນາຄວາມຊອບທຳດັ່ງນີ້, ຈຶ່ງໄດ້ຖືກເອີ້ນວ່າ ກະສັດແຫ່ງສະຫວັນ ໂດຍຜູ້ຄົນຂອງເພິ່ນ, ຫລື ອີກຄຳໜຶ່ງ, ກະສັດແຫ່ງສັນຕິສຸກ.
37 ແລະ ເພິ່ນໄດ້ເປັ່ງສຽງຂອງເພິ່ນ; ແລະ ເພິ່ນໄດ້ອວຍພອນອັບຣາມ, ໂດຍທີ່ເປັນມະຫາປະໂລຫິດ, ແລະ ຜູ້ດູແລຄັງຂອງພຣະເຈົ້າ;
38 ເພິ່ນປັນຜູ້ທີ່ພຣະເຈົ້າໄດ້ກຳນົດໄວ້ ເພື່ອໃຫ້ຮັບເອົາໜຶ່ງສ່ວນສິບ ສຳລັບຄົນຍາກຈົນ.
39 ດັ່ງນັ້ນ, ອັບຣາມຈຶ່ງໄດ້ຈ່າຍໜຶ່ງສ່ວນສິບຂອງທຸກສິ່ງທີ່ເພິ່ນມີໃຫ້ເພິ່ນ, ຈາກຊັບສົມບັດທັງໝົດທີ່ເພິ່ນຄອບຄອງ, ຊຶ່ງພຣະເຈົ້າໄດ້ປະທານໃຫ້ເພິ່ນ ຫລາຍກວ່າທີ່ເພິ່ນຕ້ອງການ.
40 ແລະ ເຫດການໄດ້ເກີດຂຶ້ນ, ຄືພຣະເຈົ້າໄດ້ອວຍພອນອັບຣາມ, ແລະ ໄດ້ປະທານຄວາມຮັ່ງມີໃຫ້ເພິ່ນ, ແລະ ກຽດຕິຍົດ, ແລະ ທີ່ດິນ ເພື່ອເປັນຊັບສົມບັດອັນເປັນນິດ; ຕາມພັນທະສັນຍາທີ່ເພິ່ນໄດ້ເຮັດໄວ້, ແລະ ຕາມພອນທີ່ເມນຄີເສເດັກໄດ້ມອບໃຫ້ເພິ່ນ.