3 Ao e koro bukina, bwa Aberam e bwaka ni bobaraki, ao e wetea aran te Uea.

4 Ao te Atua e taetae ma ngaia, ni kangai, Au aomata a tia ni kitani au reirei, ao a tia n aki kawakini au otenanti nako, ake I anga nakoia aia bakatibu;

5 Ao a tia n aki kawakina au kabiribiri, ao te tauni mate, ke te bwabetito are I tuangia;

6 Ma a tia n aki kawakina te tua, ao ni karaoi i bon irouia tebokakiia ataei, ao te katimtim n te rara;

7 Ao n tia n taekinna bwa raraan Abera ae raoiroi e kawawaeaki ibukin bure; ao a aki ataia bwa a na kanga ni bukinaki imatau.

8 Ma ibukim, nooria, N na karaoa au berita ae tabu ma ngkoe, ao ko na riki bwa tamaia botanaomata aika mwaiti.

9 Ao te berita ae tabu aio ae I karaoia, bwa aonga n ataki natim i buakoia botanaomata ni kabane. E na aki manga weteaki aram bwa Aberam, ma e na weteaki aram bwa Aberaam; bwa, I a karikiko bwa tamaia botanaomata aika a mwaiti.

10 Ao N na karaoiko bwa a na rangi ni mwaiti am kariki, ao N na karikia botanaomata mai iroum, ao a na riki taian uea mai iroum, ao mai irouia kanoam.

11 Ao N na karaoa te berita ibukin te korotobibi ma ngkoe, ao e na riki bwa au berita ae tabu imarenau ma ngkoe, ao am kariki ake imwiim, n aia roro nako; bwa kam aonga n ataia n taai nako bwa ataei aki bukinaki imatau ni karokoa ae koro waniua aia ririki.

12 Ao ko na taraia bwa ko na kawakin ni kabane au berita aika tabu ake I berita iai ma am bakatibu; ao ko na kawakin tua ake I tia n anganiko n oin wiin, ao N na riki bwa Atuam ao am kariki ake imwiim.

23 I mwina Aberaam e bwaka ni bobaraki ao e kimwareirei, ao e taku i nanona, E na iai te ataei ae na bungiaki nakoina are bon tebubua ana ririki, ao Tara are bon ruabwi ana ririki e na bung.

24 Ao Aberaam e taku nakon te Atua, O bwa e aonga ni maiuakina te raoiroi Itimaera imatam!