3 Im ālikin men kein, Ebream eaar wōtlo̧k ioon turin mejān, im kūr ioon etan Irooj.

4 Im Anij eaar ekkōnono ippān, im ba, Armej ro doō rekar jebwābwe jān katak ko Aō, im kar jab kōjparok kain̄i ko Aō, ko Iaar liļo̧k n̄an ro jemāer;

5 Im rekar jab kōjparok ekkapit eo Aō, im kallib eo, ak peptaij eo im kake Iaar jiron̄ er;

6 A rekar oktakļo̧k jān kien eo, im bōk n̄an er make kwaļkoļ an ajri ro, im bōtōktōkin wūt-dikdik;

7 Im kar ba bwe bōtōktōkin eo ejim̧we Ebel kar kōto̧o̧reļo̧k kōn jero̧wiwi ko; im rekar jab jeļā wāween aer bōk eddo im̧aan Meja.

8 A n̄e kōn kwe, lo, I naaj kōm̧m̧ane bujen eo Aō ippam̧, im kwo naaj juon jemān elōn̄ laļ ko.

9 Im bujen in Ij kōm̧m̧ane, bwe ro nejūm̧ ren maron̄ jeļā kajjeer ilubwilijin aolep laļ ko. Im barāinwōt etam̧ ban bar ān̄inn̄ini Ebram, ak etam̧ naaj ān̄inn̄ini Ebream; bwe, juon jemān elon̄ laļ ko Iaar kōm̧m̧an bwe en kwe.

10 Im Inaaj kōm̧m̧an bwe kwōn wōrļo̧k otem wōrļo̧k, im I naaj kōm̧m̧anm̧an laļ ko jān eok, im kiin̄ ro renaaj itok jān eok, im jān ineem̧.

11 Im Inaaj kajutak juon bujen in m̧wijm̧wij ippam̧, im enaaj bujen eo Aō ikōtaaō im kwe, im ineem ālikim, im epepen ko aer; bwe kwōn maron̄ jeļā indeeo bwe ajri ro rej jab bōk eddo Im̧aō m̧ae n̄e rej ruwalitōk iiō dettaer.

12 Im kwōn lale n̄an kōjparok aolep bujen ko Aō me Iaar kōm̧m̧ani ippān ro jemām̧i; im kwōn kōjparok kien ko me Iaar liwōj n̄an eok kōn lo̧n̄iiū make, im Inaaj juon Anij n̄an kwe im ineem ālikim.

23 Innām Ebream ar wōtlo̧k ioon mejān im m̧ōņōņō, im ba ilo būruōn, Enaaj wōr juon ajri enaaj ļotak n̄an e eo ej jibukwi iiō rūttoun, im Sera eo ej ruwatimjuonn̄oul iiō ko rūttoun enaaj keotake.

24 Im Ebream ar ba n̄an Anij, O iakwe bwe Ishmael en maron̄ kar mour jejjet Im̧aam̧!