24 Ug si Jose miingon ngadto sa iyang mga kaigsoonan, Ako mamatay, ug moadto ngadto sa akong mga amahan; ug ako manaog sa akong lubnganan uban ang kalipay. Ang Dios sa akong amahan nga si Jacob mouban kaninyo, aron sa pagluwas kaninyo gikan sa kasakitan sa mga adlaw sa inyong pagkaulipon; kay ang Ginoo miduaw kanako, ug ako nakaangkon og usa ka saad gikan sa Ginoo, nga gikan sa bunga sa akong mga bat-ang, ang Ginoong Dios mopasanay og usa ka matarung nga sanga gikan sa akong mga bat-ang; ug nganha kaninyo, kinsa ang akong amahan nga si Jacob naghingalan og Israel, nga usa ka propeta; (dili ang Mesiyas kinsa gitawag og Shilo;) ug kini nga propeta moluwas sa akong mga katawhan gikan sa Ehipto sa mga adlaw sa inyong pagkaulipon.

25 Ug kini mahinabo nga sila pagatibulaagon pag-usab; ug usa ka sanga pagabalion, ug pagadad-on ngadto sa usa ka layo nga nasud; bisan pa niana sila pagahinumduman diha sa mga pakigsaad sa Ginoo, kon moabut ang Mesiyas; kay siya magpakita ngadto kanila sa ulahing mga adlaw, diha sa gahum sa Espiritu; ug modala kanila gikan sa kangitngit ngadto sa kahayag; gikan sa tinago nga kangitngit, ug gikan sa pagkabihag ngadto sa kagawasan.

26 Usa ka manalagna ang Ginoo nga akong Dios mopasanay, kinsa mahimo nga usa ka pinili nga manalagna ngadto sa bunga sa akong mga bat-ang.

27 Busa nag-ingon ang Ginoong Dios sa akong mga amahan ngari kanako, Usa ka pinili nga manalagna Ako mopasanay gikan sa bunga sa imong mga bat-ang, ug siya pagatahuron sa hilabihan taliwala sa bunga sa imong mga bat-ang; ug ngadto kaniya Ako mohatag og sugo nga siya mohimo og usa ka buluhaton alang sa bunga sa imong mga bat-ang, ang iyang mga kaigsoonan.

28 Ug siya modala kanila ngadto sa kasayuran sa mga pakigsaad nga Ako mihimo uban sa imong mga amahan; ug siya mobuhat sa bisan unsa nga buluhaton nga Ako mosugo kaniya.

29 Ug Ako mohimo kaniya nga bantugan diha sa akong mga mata, kay siya mobuhat sa akong mga buluhaton; ug siya mahimo nga halangdon sama ngadto kaniya kinsa Ako miingon nga pasanayon nganha kanimo, aron sa pagluwas sa akong mga katawhan, O balay ni Israel, gikan sa yuta sa Ehipto; kay sa usa ka manalagna Ako mopasanay aron sa pagluwas sa akong mga katawhan gikan sa yuta sa Ehipto; ug siya pagatawgon og Moises. Ug pinaagi niini nga ngalan siya masayud nga siya kalabut sa imong balay; kay siya pagaamumahan sa anak nga babaye sa hari, ug pagatawgon nga iyang anak.

30 Ug usab, usa ka manalagna Ako mopasanay gikan sa bunga sa imong mga bat-ang, ug ngadto kaniya Ako mohatag og gahum sa pagdala sa akong pulong ngadto sa binhi sa imong mga bat-ang; ug dili pagdala sa akong pulong lamang, nag-ingon ang Ginoo, apan ngadto sa pagkabig kanila mahitungod sa akong pulong, diin maanaa na taliwala kanila sa katapusan nga mga adlaw;

31 Busa ang bunga sa imong mga bat-ang mosulat, ug ang bunga sa mga bat-ang ni Juda mosulat; ug kana nga isulat pinaagi sa bunga sa imong mga bat-ang, ug usab niana nga isulat pinaagi sa bunga sa mga bat-ang ni Juda, magdungan sa pagtubo ngadto sa paglibug sa mga doktrina nga bakak, ug sa pagpahilum sa mga panagbingkil, ug sa pagtukod og kalinaw taliwala sa bunga sa imong mga bat-ang, ug sa pagdala kanila ngadto sa kahibalo mahitungod sa ilang mga amahan sa ulahing mga adlaw; ug usab ngadto sa kahibalo sa akong mga pakigsaad, miingon ang Ginoo.

32 Ug gikan sa kahuyang siya mahimo nga malig-on, niana nga adlaw kon ang akong buluhaton mopadayon diha sa akong tanan nga mga katawhan, diin mopahiuli kanila, kinsa anaa sa balay ni Israel, sa katapusan nga mga adlaw.

33 Ug kana nga manalagna Ako mopanalangin, ug sila nga maninguha sa paglaglag kaniya pagalibugon; kay kini nga saad Ako mohatag nganha kanimo; kay Ako mahinumdom kanimo gikan sa kaliwatan ngadto sa kaliwatan; ug ang iyang ngalan pagatawgon og Joseph, ug kini sunod sa ngalan sa iyang amahan; ug siya mahisama kanimo; kay ang butang nga ang Ginoo modala pinaagi sa iyang kamot modala sa akong mga katawhan ngadto sa kaluwasan.

34 Ug ang Ginoo nanumpa ngadto kang Jose nga siya mopanalipod sa iyang binhi sa kahangturan, nga nag-ingon, Ako mopasanay ni Moises, ug usa ka sungkod maanaa sa iyang kamot, ug siya mopundok sa akong mga katawhan, ug siya mogiya kanila ingon og usa ka panon, ug siya mohampak sa mga katubigan sa Pulang Dagat sa iyang sungkod.

35 Ug siya adunay paghukom, ug mosulat sa pulong sa Ginoo. Ug siya dili mosulti og daghan nga mga pulong, kay Ako mosulat ngadto kaniya sa akong balaod pinaagi sa tudlo sa akong kaugalingon nga kamot. Ug ako mohimo og usa ka tigpama-ba alang kaniya, ug ang iyang ngalan pagatawgon og Aaron.

36 Ug kini matuman nganha kanimo sa katapusan nga mga adlaw usab, gani ingon sa akong pagpanumpa. Busa, si Jose miingon ngadto sa iyang mga kaigsoonan, nga ang Dios moduaw kaninyo, ug modala kaninyo gikan niini nga yuta, ngadto sa yuta diin siya nanumpa ngadto ni Abraham, ug ngadto ni Isaac, ug ngadto ni Jacob.

37 Ug si Jose mipamatuod sa daghan nga mga butang ngadto sa iyang mga kaigsoonan, ug nanumpa ngadto sa mga anak ni Israel, nag-ingon ngadto kanila, ang Dios sa pagkatinuod moduaw kaninyo, ug kamo modala sa akong mga bukog gikan dinhi.

38 Sa ingon si Jose namatay sa diha nga siya nagpanuigon og usa ka gatus ug napulo ka mga tuig; ug sila miimbalsamar kaniya, ug sila mipahiluna kaniya sa usa ka lungon diha sa Ehipto; ug siya gihaya ug wala una ilubong sa mga anak ni Israel, aron siya madala ug mapahiluna sa usa ka lubnganan uban sa iyang amahan. Ug sa ingon sila nahinumdom sa panumpa nga sila nanumpa ngadto kaniya.