1 Sa’ xtiklajik chaq kijultikaman li evangelio sa’ xk’ab’a’ li K’ajolb’ej. Ut li evangelio a’an li aatin, ut li aatin kiwan rik’in li K’ajolb’ej, ut li K’ajolb’ej kiwan rik’in li Dios, ut li K’ajolb’ej re chaq li Dios.

2 A’an ajwi’ kiwan chaq sa’ xtiklajik rik’in li Dios.

3 Chixjunil li k’a’aq re ru kiyiib’aak xb’aan a’an; ut chi maak’a’ ta a’an maak’a’ k’a’ru yiib’anb’il li kiyiib’aman.

4 Rik’in a’an kiwan li evangelio, ut li evangelio a’an li yu’am, ut li yu’am a’an chaq xsaqenkileb’ li winq;

5 Ut li saqen nalemtz’un sa’ li ruchich’och’, ut li ruchich’och’ ink’a’ naxk’e reetal.

6 Kiwan jun winq taqlanb’il chaq rik’in li Dios, aj Jwan xk’ab’a’.

7 A’an kichal sa’ li ruchich’och’ choq’ aj yehol nawom, re xch’olob’ankil xyaalal li saqen, re xch’olob’ankil xyaalal li evangelio sa’ xk’ab’a’ li K’ajolb’ej, chiru chixjunileb’, re naq sa’ xk’ab’a’ a’an taaruuq te’paab’anq chixjunileb’ li winq.

8 Moko a’an ta li saqen, kichal b’an re xch’olob’ankil xyaalal li saqen a’an,

9 A’ li tz’aqal saqen, li nakutanob’resink re li junjunq chi winq li nachal sa’ li ruchich’och’;

10 A’an ajwi’ li Ralal li Dios. A’ li kiwan sa’ li ruchich’och’, ut li ruchich’och’ yiib’anb’il chaq xb’aan a’an, ut li ruchich’och’ moko kixnaw ta ru.

11 Kichal rik’ineb’ li re, ut eb’ li re moko ke’xk’ul ta.

12 A’b’anan jo’ k’ihal li ke’k’uluk re, reheb’ a’an kixk’e wankilal chi ok choq’ ralal li Dios; ka’ajwi’ reheb’ li ke’paab’ank re lix k’ab’a’.

13 A’an kiyo’la, moko rik’in ta kik’, chi moko xb’aan rajom li tz’ejwalej, chi moko xb’aan rajom xch’ool li winq, rik’in b’an li Dios.

14 Ut li aatin a’an kik’ehe’ chi tz’ejwalo’k, ut kiwan xna’aj sa’ qayanq, ut kiqak’e reetal lix loq’al, li loq’alil chanchan re li Junaj Yo’lajenaq chiru li Yuwa’b’ej, nujenaq chi usilal ut chi yaal.

15 Laj Jwan kixch’olob’ li yaal chirix, ut kixjap re chixyeeb’al, A’in li kin’aatinak wi’; Li ani nachal chiwix, ajb’il wi’chik chiwu; xb’aan naq ak wan chaq junxilaj chiwu.

16 Xb’aan naq sa’ xtiklajik chaq kiwan li Aatin, a’an li K’ajolb’ej, li kik’ehe’ chi tz’ejwalo’k, ut kitaqlaak qik’in xb’aan li rajom li Yuwa’b’ej. Ut jo’ k’ihaleb’ li neke’paab’ank re lix k’ab’a’ te’xk’ul xkomon lix tz’aqalil. Ut xkomon lix tz’aqalil xqak’ul chiqajunilo, a’ li kole’k chiru li kamk ut li junelik yu’am, sa’ xk’ab’a’ li rusilal.

17 Xb’aan naq li chaq’rab’ kik’eeman sa’ xk’ab’a’ laj Moises, a’b’an li yu’am ut li yaal ke’chal sa’ xk’ab’a’ li Jesukristo.

18 Xb’aan naq li chaq’rab’ kiwan jo’ chanru jun tz’ejwalejil taqlahom, re xk’anjelankil li kamk; a’b’an li evangelio jo’ chanru lix wankilal jun li yu’am li maak’a’ roso’jik, sa’ xk’ab’a’ li Jesukristo, li K’ajolb’ej Junaj Chirib’il, li wan chire xch’ool li Yuwa’b’ej.

19 Ut maajun winq x’ilok re li Dios jun sutaq, ka’ajwi’ naq a’an xch’olob’ xyaalal li K’ajolb’ej, xb’aan naq chi maawa’ sa’ xk’ab’a’ ta a’an maajun winq naru chi kole’k.

20 Ut a’in li esil kixch’olob’ laj Jwan, naq eb’ laj Judio ke’xtaqlaheb’ chaq laj tij ut laj Levita chalen Jerusalen chixpatz’b’al re; Anihat laa’at?

21 Ut a’an kixch’olob’ li yaal, ut moko kixye ta naq moko a’an ta laj Elias; kixch’olob’ b’an xyaalal, ut kixye; Maawa’in li Kristo.

22 Ut ke’patz’ok re, ut ke’xye; Chan put ru naq laa’at aj Elias? Ut a’an kixye, maawa’in laj Elias a’an li taak’ojob’anq wi’chik re chixjunil li k’a’aq re ru. Ut ke’patz’ok chiru, ut ke’xye, Ma laa’at li profeet a’an? Ut a’an kixye, Ink’a’.

23 Toja’ naq ke’xye re, Anihat laa’at? re taqak’e xsumenkileb’ ru li xe’taqlan chaq qe. K’a’ru nakaye chawix?

24 A’an kixye, Laa’in lix yaab’ xkux jun li naxjap re chixyeeb’al sa’ li yamyookil ch’och’, Tiikob’resihomaq ru lix b’e li Qaawa’, jo’ naxye li profeet aj Isaias.

25 Ut eb’ li ke’taqlaak chaq a’aneb’ xkomoneb’ laj Fariseo.

26 Ut ke’patz’ok chiru, ut ke’xye re; K’a’ put naq nakatkub’sin ha’, wi maawa’at li Kristo, chi moko laj Elias li taak’ojob’anq wi’chik re chixjunil li k’a’aq re ru, chi moko li profeet a’an?

27 Laj Jwan kixsumeheb’ ut kixye; Laa’in ninkub’si eeha’ rik’in ha’, a’b’an wan jun li xaqxo sa’ eeyanq, li moko nekenaw ta ru;

28 A’an li ninch’olob’ xyaalal. A’an li profeet a’an, aj Elias ajwi’, a’ li taachalq chiwix, li ajlb’il wi’chik chiwu laa’in, li moko ink’ulub’ ta xhitb’al xtz’apb’al lix xaab’, malaj ut li moko ink’ulub’ ta wank sa’ xna’aj a’an; xb’aan naq a’an taakub’sinq ha’, moko ka’aj ta wi’ rik’in ha’; rik’in b’an xam, ut rik’in li Santil Musiq’ej.

29 Sa’ li kutan jun chik laj Jwan naril li Jesus chi chalk rik’in, ut kixye; K’ehomaq reetal lix Karneer li Dios, li na’isink re lix maak li ruchich’och’!

30 Ut laj Jwan kixch’olob’ xyaalal a’an chiruheb’ li tenamit, ut kixye, A’an a’in li kinye wi’; Chiwix laa’in chalk re jun winq li ajb’il wi’chik chiwu; xb’aan naq ak wan chaq junxilaj chiwu, ut kinnaw ru, ut naq a’an taak’ehe’q chi k’utmank chiru Israel; chi jo’kan chalenaqin chi kub’sink ha’ rik’in ha’.

31 Ut laj Jwan kixch’olob’ xyaalal, ut kixye, Naq kikub’siik xha’ inb’aan, kiwil li Musiq’ej chi kub’eek chaq sa’ choxa jo’ jun mukuy, ut kikana sa’ xb’een.

32 Ut kinnaw ru; xb’aan naq li ani kitaqlank chaq we chi kub’sink ha’ rik’in ha’, a’an ajwi’ kixye we; Ani sa’ aj b’een taawil li Musiq’ej chi kub’eek, ut chi kanaak sa’ xb’een, a’an ajwi’ a’an li nakub’sink ha’ rik’in li Santil Musiq’ej.

33 Ut laa’in kiwil, ut ninch’olob’ xyaalal naq a’in li Ralal li Dios.

34 Li k’a’aq re ru a’in kib’aanuman Betabara, junpak’al Jordan, b’ar yoo wi’ laj Jwan chi kub’sink ha’.

42 Ut kixk’am rik’in li Jesus. Ut naq li Jesus kiril, kixye, Laa’at Simon, ralal laj Jonas, laa’at Sefas taayeemanq aawe, a’an chi jalb’il ru, aj ilol na’leb’, malaj pek. Ut a’aneb’ aj kar. Ut tikto ke’xkanab’ chixjunil, ut ke’xtaaqe li Jesus.