9 Aʼo lē na te faafitia aʼu i luma o tagata, e faafitia foi o ia i luma o agelu a le Atua.

10 O lenei, sa iloa e ona soo na ia fai atu nei upu, ona sa latou tautala leaga e uiga ia te ia i luma o tagata; aua sa fefefe i latou e taʼutino atu o ia i luma o tagata.

11 Ma sa latou talanoa ai ia i latou lava, ua faapea ane, Ua silafia e ia o tatou loto, ma saunoa mai ai o ia i lo tatou taʼusalaga, ma o le a lē faamagaloina i tatou. Ae na ia tali atu ia te i latou, ma ia fetalai atu ia te i latou,

12 Ai se tasi e tautala i se upu e tetee i le Atalii o le Tagata, ma salamō ai, e faamagaloina ai o ia; aʼo lē e upuleaga i le Agaga Paia, e lē faamagaloina ai o ia.

41 Aua, faauta, e afio mai o ia i le leoleoga muamua o le po, ma e afio mai foi o ia i le leoleoga lona lua, ma e toe afio mai o ia i le leoleoga lona tolu.

42 Ma e moni ou te fai atu ia te outou, Ua uma ona afio mai o ia, e pei ona sa tusia e uiga ia te ia; ma pe a toe afio mai o ia i le leoleoga lona lua, pe afio mai i le leoleoga lona tolu, amuia lava na auauna pe a afio mai o ia, na te mauaina o faapea ona latou faia;

43 Aua o le Alii o na auauna na te fusi ia te ia lava, ma faanonofo i latou i lalo e taumamafa, ma e afio mai o ia ma auauna atu ia te i latou.

44 Ma lenei, e moni ou te fai atu nei mea ia te outou, ina ia outou iloa ai lenei mea, o le afio mai o le Alii e pei o se gaoi i le po.

45 Ma ua faatusaina foi i le matai o le aiga, o lē, afai na te lē leoleoina ana oloa, e sau le gaoi i le itulā na te lē iloaina, ma aveina ana oloa, ma vaevaeina ai i ana aumea.

46 Ma ua latou fai ifo ia i latou lava, Ana fai e iloa e le matai o le aiga le itulā e sau ai le gaoi, semanū ua leoleoina ai e ia, ma lē tuuina atu ai lona fale ina ia veteina ma aveese ai ana oloa.

47 Ma sa ia fetalai atu ia te i latou, E moni ou te fai atu ia te outou, o lea ia saunia ai foi outou; aua e sau le Atalii o le Tagata i le itulā tou te lē manatunatu ai i ai.

48 Ona fai atu lea o Peteru ia te ia, Le Alii e, pe e te fetalai mai ea lenei faataoto ia te i matou, pe i tagata uma?

49 Ma sa fetalai atu le Alii, ou te tautala atu ia te i latou o e e fai e le Alii ma pule i lona aiga, e tuuina atu i lana fanau lo latou vaega o meaʼai i le tau e tatau ai.

50 Ma sa latou fai ane, O ai ea lena auauna faamaoni ma le poto?

51 Ma sa fetalai atu le Alii ia te i latou, O lena auauna lava o lē mataala, ina ia tuuina atu lana vaega o meaʼai i le tau e tatau ai.

52 Amuia lava lena auauna o lē e maua mai e lona Alii, pe a afio mai o ia, o faapea ona ia faia.

53 E moni lava ou te fai atu ai ia te outou, na te faia o ia ma pule i mea uma o ia te ia.

54 Aʼo le auauna leaga o lē e maua atu e lē o mataala. Ma afai e maua atu lena auauna e lē o mataala, na te faapea ifo i lona loto, Ua tolopo e loʼu Alii lona afio mai; ma e amata ai e ia ona sasa i auauna tane, ma auauna fafine, ma aai, ma inu, ma fai ia ʼonā.

55 E afio mai le Alii o lena auauna i se aso na te lē tulimatai atu ai, ma i se itula e lē o iloa e ia, ma e taia o ia i lalo, ma e tofia o ia i lona vaega faatasi ma e lē talitonu.

56 Ma o lena auauna na iloa le finagalo o lona Alii, ma sa lē saunia ai i le afio mai o lona Alii, sa lē faia foi e tusa ma lona finagalo, e sasaina i ta e tele.

57 Aʼo lē na te lei iloa le finagalo o lona Alii, ma sa faia mea e tele e tatau ai ona taina, e sasaina i ta itiiti. Aua o lē ua tuuina atu i ai mea e tele, e tele foi mea e manaomia mai ia te ia; ma o lē ua tuuina atu i ai e le Alii mea e tele, o ia foi lea e fesili atili i ai tagata.