JJS, Mateo 4:1, 5–6, 8–9. Chi’ilmanq sa’ Mateo 4:1, 5–6, 8–9; kijalman ajwi’ chi jo’ka’in li aatin sa’ Lukas 4:2, 5–11
Li Jesus nab’eresiik xb’aan li Musiq’ej, moko xb’aan ta laj Satanas.
1 Toja’ naq kib’eresiik li Jesus xb’aan li Musiq’ej toj sa’ li yamyookil ch’och’, re taawanq rik’in li Dios.
5 Toja’ naq kik’ame’ li Jesus sa’ li santil tenamit, ut li Musiq’ej kixk’ojob’ sa’ ru’uj li santil ochoch.
6 Toja’ naq kichal laj tza rik’in ut kixye, Wi laa’at li Ralal li Dios, kut aawib’ taq’a, xb’aan naq tz’iib’anb’il, Tixk’e xchaq’rab’inkileb’ lix anjel chawix: ut tate’xk’am sa’ ruq’eb’, maare anchal taaten laa woq chiru junaq pek.
8 Ut jo’kan wi’chik, kiwan li Jesus sa’ li Musiq’ej, ut a’an kixk’am sa’ jun li tzuul q’axal najt xteram, ut kixk’ut chiru chixjunil li awa’b’ejihom re li ruchich’och’, ut lix loq’aleb’ a’an.
9 Ut laj tza kichal wi’chik rik’in, ut kixye, Chixjunil li k’a’aq re ru a’in tink’e aawe, wi taakut aawib’ chi woq ut tinaaloq’oni.
JJS, Mateo 4:11. Chi’ilmanq sa’ Mateo 4:11
Li Jesus naxtaqlaheb’ li anjel re te’k’anjelaq chiru laj Jwan aj Kub’sihom Ha’.
11 Anajwan ut li Jesus kixnaw naq laj Jwan tz’apb’il sa’ tz’alam, ut kixtaqlaheb’ li anjel, ut k’ehomaq reetal, ke’chal ut ke’k’anjelak chiru.
JJS, Mateo 4:18. Chi’ilmanq sa’ Mateo 4:19
Eb’ li profeet sa’ li Najter Chaq’rab’ neke’aatinak chirix li Jesus.
18 Ut kixye reheb’, Laa’in li tz’iib’anb’il resil xb’aaneb’ li profeet; chineetaaqe ut texink’e chi karib’k re xsik’b’aleb’ li winq.
JJS, Mateo 4:22. Chi’ilmanq sa’ Mateo 4:23
Li Jesus nak’irtesink sa’ xyanqeb’ li neke’paab’ank re lix k’ab’a’.
22 Ut xko’o li Jesus chiru chixjunil Galilea, chi k’utuk sa’eb’ lix ch’utleb’aal, ut chixjultikankil li evangelio re li awa’b’ejihom; ut chixk’irtesinkil li k’iila paay chi rahilal, ut li k’iila paay chi yajel sa’ xyanqeb’ li tenamit li neke’paab’ank re lix k’ab’a’.