1 Ko e Fakahā kia Sione, ko ha tamaioʻeiki ʻa e ʻOtuá, ʻa ia naʻe foaki kiate ia ʻe Sīsū Kalaisi, ke fakahā ki heʻene kau tamaioʻeikí ʻa e ngaahi meʻa ʻoku vave ʻa ʻene hokó, ʻa ia naʻá ne fekau mo fakaʻilo ʻi heʻene ʻāngelo ki heʻene tamaioʻeiki ko Sioné,

2 ʻA ia naʻá ne fakamoʻoni ki he folofola ʻa e ʻOtuá, pea mo e fakamoʻoni ʻa Sīsū Kalaisí, pea mo e ngaahi meʻa kotoa pē naʻá ne mamata ki aí.

3 Monūʻia ʻa kinautolu ʻoku nau laú, mo kinautolu ʻoku fanongo pea ʻiloʻi ʻa e ngaahi folofola ʻo e kikite ní, pea tauhi ʻa e ngaahi meʻa ko ia ʻoku tohi ʻi aí, he ʻoku ofi ʻa e taimi ʻo e hāʻele mai ʻa e ʻEikí.

4 Ko ʻeni ko e fakamoʻoni ʻeni ʻa Sione ki he kau tamaioʻeiki ʻe toko fitu ʻa ia ʻoku nau tokangaʻi ʻa e ngaahi siasi ʻe fitu ʻi ʻĒsiá. Ke ʻiate kimoutolu ʻa e ʻaloʻofá, mo e melinó meiate ia ʻoku ʻi ai, pea naʻe ʻi ai, pea ʻe ʻi ai; ʻa ia kuó ne fekauʻi mai ʻa ʻene ʻāngeló mei hono taloní, ke fakamoʻoniʻi kiate kinautolu ko e kau tamaioʻeiki ʻe toko fitu ki he ngaahi siasi ʻe fitú.

5 Ko ia, ko au Sione, ko e fakamoʻoni faivelenga, ʻoku ou fakamoʻoni ki he ngaahi meʻa ne ʻomi kiate au ʻe he ʻāngeló, pea meia Sīsū Kalaisi ko e ʻuluaki fua ʻo e mate, mo e Pilinisi ʻo e ngaahi tuʻi ʻo e māmaní.

6 Pea kiate ia naʻá ne ʻofeina kitautolú, ke fakalāngilangiʻi; ʻa ia naʻá ne fufulu ʻa kitautolu mei heʻetau ngaahi angahalá ʻi hono taʻataʻa ʻoʻoná, pea kuó ne ngaohi kitautolu ko e ngaahi tuʻi mo e kau taulaʻeiki ki he ʻOtuá, ʻa ʻene Tamaí. Ke ʻiate ia ʻa e langilangí mo e pulé, ʻo taʻengata pea taʻengata. ʻĒmeni.

7 He vakai, ʻokú ne hāʻele mai ʻi he ngaahi ʻaó mo ha toko tahamano ʻo ʻene kau māʻoniʻoni ʻi he puleʻangá, kuo kofu ʻaki e nāunau ʻo ʻene Tamaí. Pea ʻe mamata e mata kotoa pē; pe ko kinautolu naʻa nau hokaʻi iá, pea ʻe tangi mamahi ʻa e ngaahi faʻahinga kotoa ʻo e māmaní koeʻuhí ko ia. Ke pehē pē, ʻĒmeni.

8 He ʻokú ne folofola, ko au ko e ʻĀlifa mo e ʻŌmeka, ko e kamataʻanga mo e ngataʻanga, ko e ʻEiki, ʻa ia ʻoku ʻi ai, pea naʻe ʻi ai, pea ʻe ʻi aí, ko e Māfimafi.