5 Aua ina o i ai i tatou i la le tino, o lagona o le agasala, ia sa lē tusa ai ma le tulafono, sa galueaina i o tatou itu tino ina ia aumaia ai fua e oti ai.

6 Aʼo lenei, ua laveaina i tatou ai le tulafono lea sa taofia ai i tatou, ina ua tatou oti e tusa ma le tulafono, ina ia tatou auauna atu ai i le agaga fou, ae lē o le mataitusi tuai o le tulafono.

7 Se ā ea sa tatou upu e fai atu? O le agasala ea le tulafono? Ia faasaina e le Atua lea mea. E leai, ou te lei iloa le agasala, ae ala i le tulafono; aua na ou lē iloa le tuinanau, vaganā le tulafono na faapea mai, Aua e te matapeapea.

8 Aʼo le agasala, ua maua le avanoa e ala i le poloaiga, ua faatupu ai i totonu ia te aʼu o ituaiga eseese o tuinanau uma. Aua ua oti le agasala pe a aunoa ma le tulafono.

9 Aua na ou ola muamua e aunoa ma le soliga o le tulafono, ae ina ua oo mai le poloaiga a Keriso, ona toe ola mai ai lea o le agasala, ma sa ou oti ai.

10 Ma ina ua ou lē talitonu i le poloaiga a Keriso lea na oo mai, lea na faauuīna i le ola, na ou iloa na faasalaina ai aʼu i le oti.

11 Aua na maua e le agasala le avanoa, na teena ai le poloaiga, ma sa faasesēina ai aʼu; ma sa fasiotia ai aʼu.

12 Ae ui i lea, na ou mauaina le tulafono, ma le poloaiga e paia, ma ua tonu, ma ua lelei.

13 Po ua avea ea le mea lelei ma mea e oo mai ai le oti ia te aʼu? Ia faasaina e le Atua lea mea. Aʼo le agasala, ina ia foliga mai o le agasala e ala mai i le mea lelei ua galueaiina le oti i totonu o aʼu; ina ia avea le agasala, e ala i le poloaiga, ma agasala tele lava.

14 Aua ua tatou iloa o le poloaiga e faaleagaga; ae peitaʼi, ina o i ai aʼu i lalo o le tulafono, sa faaletino pea lava aʼu, ua faatauina atu aʼu i le agasala.

15 Aʼo lenei ua ou faaleagaga; aua o le mea lena na poloaiina ai aʼu e fai, ou te faia; ma o le mea lena na poloaiina aʼu ia le faatagaina, ou te lē faatagaina lava.

16 Aua o le mea ou te iloa e lē saʼo, ou te lē faia lava; aua o lena mea o le agasala, ou te ʼinoʼino i ai.

17 Afai la ou te lē faia lena mea ou te lē faatagaina, ua ou gauai atu i le tulafono, o le mea lelei lena mea; ma e lē taʼusalaina ai aʼu.

18 O lenei la, e leʼo aʼu ua agasala; ae ou te saili e faatoilalo lena agasala o loo nofo i totonu ia te aʼu.

19 Aua ua ou iloa i totonu ia te aʼu, o lona uiga, i loʼu tino, e leai se mea lelei o nofo ai; aua o le loto e faatasi pea ma aʼu, aʼo le faia o lena mea e lelei, ou te lē mauaina lava, naʼo Keriso e maua ai.

20 Aua o le lelei lea na ou faia aʼo i lalo o le tulafono, ou te mauaina e lē lelei; o lea, ou te lē faia ai lena mea.

21 Aʼo le leaga lea na ou lē faia i lalo o le tulafono, ou te mauaina e lelei; o lea mea, ou te faia.

22 O lenei, afai ou te faia lena mea, e ala i le fesoasoani a Keriso, ou te lē faia i lalo o le tulafono, e le o i ai aʼu i lalo o le tulafono; ma ou te lē toe saʼili atu e faia se mea sesē, ao le faatoʼilaloina o le agasala lea o loo nofo i totonu o aʼu.

23 Ua ou maua la aʼo i lalo o le tulafono, ina na ou faia le lelei, sa faatasi pea le leaga ma aʼu; aua ou te fiafia i le tulafono a le Atua e tusa ma le totonu o le tagata.

24 Ma lenei ua ou iloa le isi tulafono, o le poloaiga lava a Keriso, ma ua tusia ai i loʼu mafaufau.

25 Ae ua fetauai oʼu itutino e tetee i le tulafono a loʼu mafaufau, ma aumaia ai aʼu i le nofopologa i le tulafono o le agasala lea o loʼo i ai i vaega o loʼu itutino.

26 Ma afai ou te lē faatoilaloina le agasala lea o loo i totonu o aʼu, ae faaaoga le tino e auauna atu i le tulafono o le agasala; Aue o aʼu le tagata malaia! O ai ea o le a laveaiina aʼu mai le tino o lenei oti?

27 Ou te faafetai atu la i le Atua e ala ia Iesu Keriso lo tatou Alii, ina ia mafai ona ou auauna atu ai aʼu ma le mafaufau i le tulafono a le Atua.