Vahe 5
1 Ko ia oku ofa ki he Otua, oku ofa foki ia ki he ene fānau, bea ne fai ene gaahi fekau: 3 oku maamaa ae gaahi fekau ki he kakai maonioni, kae ikai fakamamahi. 9 Koe Alo oe Otua a Jisu, oku ne faa fakamoui akitautolu, 15 bea ke ogo‘i e tau gaahi lotu, aia oku tau lotua ai akitautolu, bea moe kakai kehe.
¶ 1 KO IA ia oku tui koe Kalaisi a Jisu, kuo fanau‘i ia i he Otua: bea ko ia fulibe oku ofa kiate ia oku ne faka-tubu, oku ofa foki ia kiate ia kuo tubu meiate ia.
2 Ko eni oku tau ilo ai oku tau ofa ki he fānau ae Otua, i he e tau ofa ki he Otua, moe fai ki he ene gaahi fekau.
3 He ko eni ae ofa ki he Otua, koe tau fai ki he ene gaahi fekau: bea oku ikai fakamamahi a ene gaahi fekau.
4 He ko ia kotoabe kuo fanau‘i i he Otua, oku ne ikuna a mamani: bea ko eni ae malohi oku ne ikuna aki a mamani, koe tau tui.
5 Kohai ia oku ne ikuna a mamani, ka ko ia oku tui koe Alo oe Otua a Jisu?
6 Ko eni ia nae ha‘u i he vai moe toto, a Jisu Kalaisi; ikai i he vai be, kae i he vai moe toto. Bea oku fakamooni e he Laumalie, he oku mooni ae Laumalie.
7 He oku ai ae toko tolu i he lagi oku fakamooni, koe Tamai, moe Folofola, bea moe Laumalie Maonioni: bea oku taha be ae toko tolu ni.
8 Bea oku ai ae tolu i mamani oku fakamooni, koe Laumalie, moe vai, bea moe toto: bea oku kau fakataha ae tolu ni.
9 Kabau oku tau tali ae fakamooni oe tagata, oku lahi hake ae fakamooni oe Otua: he ko eni ae fakamooni oe Otua aia kuo ne fakaha ki hono Alo.
10 Ko ia oku tui ki he Alo oe Otua, oku iate ia be ae fakamooni: ko ia oku ikai ke tui ki he Otua, oku ne lohiaki‘i ia; koeuhi oku ikai ke tui ia ki he fakamooni aia kuo fakaha e he Otua ki hono Alo.
11 Bea ko eni ae fakamooni, kuo foaki e he Otua ae moui taegata kiate kitautolu, bea koe moui ni oku i hono Alo.
12 Ko ia oku ne ma‘u ae Alo, oku ne ma‘u moe moui; bea ko ia oku ikai te ne ma‘u ae Alo oe Otua, oku ikai te ne ma‘u ae moui.
13 Kuou tohi ae gaahi mea ni kiate kimoutolu oku tui ki he huafa oe Alo oe Otua, koeuhi ke mou ilo oku a moutolu ae moui taegata, bea ke mou tui ki he huafa oe Alo oe Otua.
14 Bea ko eni ae malohi aia oku tau ma‘u kiate ia, koeuhi, ka tau ka kole ha mea o fakatatau ki hono finagalo, oku ne ogo‘i akitautolu:
15 Bea kabau oku tau ilo oku ne ogo‘i akitautolu, koia kotoabe oku tau kolea, oku tau ilo oku tau ma‘u ae gaahi kole naa tau holi ai kiate ia.
16 Kabau e mamata e ha taha ki he fai e hono tokoua ha agahala oku ikai ki he mate, bea e kole ia, bea te ne foaki ae moui kiate ia maa nautolu oku agahala kae ikai ki he mate. Oku ai ae agahala ki he mate: oku ikai teu behe ke ne lotua ia.
17 Koe taemaonioni kotoabe koe agahala ia: bea oku ai ae agahala oku ikai ki he mate.
18 Oku tau ilo, ko ia kotoabe kuo fanau‘i i he Otua, oku ikai agahala ia; ka ko ia kuo fanau‘i i he Otua oku ne taofi ia eia, bea oku ikai alaji ia e he toko taha kovi koia.
19 Oku tau ilo oku ae Otua akitautolu, ka oku tokoto a mamani kotoabe i he toko taha kovi.
20 Bea oku tau ilo kuo ha‘u ae Alo oe Otua, bea kuo ne foaki ae ilo kiate kitautolu, ke tau ilo‘i ia aia oku mooni, bea oku tau iate ia oku mooni, i hono Alo ko Jisu Kalaisi. Ko eni ae Otua mooni, moe moui taegata.
21 Ae fānau ofeina, taofi akimoutolu mei he gaahi tamabua. Emeni.