¶ 1 HE oku ilo ekimoutolu, e kaiga, koe mau hoko atu kiate kimoutolu, nae ikai taeaoga ia:

2 Kae hili e mau tomua mamahi, mo ho mau gaohi kovi‘i aubito, i Filibai, aia oku mou ilo, naa mau malohi i ho mau Otua ke lea aki kiate kimoutolu ae ogoogolelei oe Otua lolotoga ae fakataga lahi.

3 He nae ikai i he kākā e mau akonaki, be i he taemaonioni, be i he fakaoloolo:

4 Ka i he ene lelei ki he Otua ke tuku kiate kimautolu ae ogoogolelei, koia oku behe ai e mau lea; o ikai koe fakafiemalie ki he kakai, ka koe Otua, aia oku ne ahiahi‘i ho mau loto.

5 He oku mou ilo, nae ikai te mau gaue aki ae lea fakalai i ha kuoga e taha, be koe kofu oe manumanu; koe fakamooni ae Otua:

6 Bea nae ikai te mau kumi ha faka-malo mei he tagata, be meiate kimoutolu, be mei ha niihi kehe, ka nae gofua be ke mau fakamāfajia akimoutolu, o tāu moe kau abosetolo o Kalaisi.

7 Ka naa mau iate kimoutolu i he agavaivai, io, o hage koe tauhi oku ne tauhi ofa ene fānau:

8 Bea i he e mau tokaga ofa kiate kimoutolu, naa mau loto ke atu kiate kimoutolu, ikai koe ogoogolelei oe Otua be, ka koe mau moui foki, koeuhi koe ofeina lahi akimoutolu kiate kimautolu.

9 He oku mou manatu, e kaiga, e mau gaue moe ogojia: koe mea i he gaue i he bo moe aho, koeuhi ke oua naa mau fakamajiva ha toko taha iate kimoutolu, bea naa mau malaga aki ae ogoogolelei oe Otua kiate kimoutolu.

10 Koe kau fakamooni akimoutolu, moe Otua foki, ki he e mau ulugaaga maonioni mo totonu mo taehalaia iate kimoutolu oku tui:

11 Bea oku mou ilo foki e mau eginaki‘i mo fakafiemalie mo fakababau kiate kimoutolu kotoabe, o hage koe tamai ki he ene fānau,

12 Koeuhi ke mou aeva o tāu moe Otua, aia kuo ne ui akimoutolu ki hono buleaga mo hono nāunāu.

13 Koe mea koia oku mau fakafetai taetuku ai foki ki he Otua, koeuhi, i hoo mou ma‘u ae folofola ae Otua aia ne mou fanogo ai iate kimautolu, nae ikai te mou ma‘u ia o hage koe lea ae tagata, kae hage koia oku mooni, koe folofola ae Otua, aia oku gaue aoga foki kiate kimoutolu oku tui.

14 He naa mou hoko, e kaiga, koe kau faifaitaki ki he gaahi jiaji oe Otua i Jutea oku ia Kalaisi Jisu: he naa mou kataki ae gaahi mea behe i he kakai i ho mou fonua foki, o hage ko kinautolu i he kakai Jiu:

15 Akinautolu nae tamate‘i ae Eiki ko Jisu, mo ho nau kau balofita foki, bea kuo nau fakataga‘i akimautolu; bea oku ikai te nau lelei ki he Otua, bea oku nau fai kehe moe kakai kotoabe:

16 Oku nau taofi e mau lea ki he gaahi Jenitaile koeuhi ke nau moui, koe mea ke fakakakato ai e nau gaahi agahala: he kuo hoko hono lahi oe houhau kiate kinautolu.

17 Ka ko kimautolu, e kaiga, kuo mavahe meiate kimoutolu i he kuoga jii i he jino, kae ikai i he loto, kuo lahi hake aubito ai e mau ahiahi mo holi lahi ke mamata ki ho mou mata.

18 Koia naa mau fie alu atu ai kiate kimoutolu, io, ko au Baula, o liuga taha mo liuga ua; ka nae taofi akimautolu e Setani.

19 He koeha e mau amanaki lelei, be fiefia, be koe bolebole oe fiefia? Ikai ko kimoutolu foki i he ao o ho tau Eiki ko Jisu Kalaisi i he ene haele mai?

20 He ko ho mau vikivikiaga akimoutolu moe mau fiefia.