¶ 1 KOIA i he ikai te mau kei faa kataki, naa mau fiemalie ke nofo be i Atenisi;

2 Kae fekau atu a Timote, ko ho mau tokoua, moe faifekau ae Otua, moe mau kauga gaue i he ogoogolelei a Kalaisi, ke fakamalohi akimoutolu, bea ke fakafiemalie‘i akimoutolu koe mea i hoo mou tui:

3 Koeuhi ke oua naa gau‘eue ha taha i he gaahi mamahi ni: he oku mou ilo kuo tuutuuni akitautolu ki ai.

4 He koe mooni, i he e mau iate kimoutolu, naa mau tomua tala kiate kimoutolu e tautea akimautolu; o hage koia nae hoko, bea oku mou ilo.

5 Koeuhi koe mea ni, i he ikai teu kei faa kataki, neu fekau atu ai keu ilo hoo mou tui, telia naa ai ha mea kuo fakatauvele‘i ai akimoutolu e he ahiahi, bea fakataeaoga ai e mau gaue.

6 Ka koeni, i he hoko mai a Timote meiate kimoutolu, o omi kiate kimautolu ae ogoogo lelei o hoo mou tui moe ofa, bea mo hoo mou manatu lelei mau ai be kiate kimautolu, o holi lahi ke mamata kiate kimautolu, o hage ko kimautolu kiate kimoutolu:

7 Koia, e kaiga, naa mau fiemalie iate kimoutolu, i he e mau mamahi moe tuutamaki kotoabe, i hoo mou tui:

8 He oku mau moui eni, o kabau oku mou tuu mau i he Eiki.

9 He koeha ae fakafetai te mau faa atu ki he Otua koeuhi ko kimoutolu, i he fiefia kotoabe oku mau fiefia ai i he ao o ho tau Otua koeuhi ko kimoutolu;

10 O lotu lahi aubito i he bo moe aho, koeuhi ke mau mamata ki ho mou mata, bea ke mau fakakakato aia oku toe i hoo mou tui?

11 Bea koeni, ke i he Otua be koe tau Tamai, mo ho tau Eiki ko Jisu Kalaisi, ke fakahinohino ho mau hala kiate kimoutolu.

12 Bea ke fakafonu akimoutolu e he Eiki, ke mou tubulekina lahi i he feofaaki akimoutolu kiate kimoutolu, bea ki he kakai kotoabe, o hage ko kimautolu kiate kimoutolu:

13 Koeuhi ke ne fokotuu mau o taehalaia ho mou loto i he maonioni, i he ao oe Otua, koe tau Tamai, i he haele mai a ho tau Eiki ko Jisu Kalaisi mo ene kau maonioni kotoabe.