¶ 1 KA koe mea i he gaahi kuoga moe gaahi faahita‘u, oku ikai aoga, e kaiga, keu tohi kiate kimoutolu.

2 He oku mou ilo fakababau, koe aho oe Eiki oku ha‘u o hage koe kaihaa i he bouli.

3 He oka nau ka behe, Fiemalie mo lelei be; e hoko fakafokifa ae faka-auha kiate kinautolu, o hage koe lagā ki ha fefine feitama; bea e ikai te nau hao.

4 Ka ko kimoutolu, e kaiga, oku ikai te mou i he bouli, koeuhi ke moua akimoutolu e he aho koia o hage ha kaihaa.

5 Koe fānau ae māma akimoutolu kotoabe, moe fānau ae aho: oku ikai oe bo akitautolu, be oe bouli.

6 Koia ke oua naa mohe akitautolu, o hage koe niihi; ka tau leo bea tau fakabotoboto.

7 He ko kinautolu oku mone, oku mohe i he bo; bea ko kinautolu oku kona, oku kona i he bo.

8 Ka ke fakabotoboto akitautolu oku oe aho, o ai ki he fatafata ae jifa koe tui moe ofa; bea tau tatā aki ae amanaki lelei ki he fakamoui.

9 He nae ikai tuutuuni akitautolu e he Otua ki he houhau, ka ke tau ma‘u ae fakamoui i ho tau Eiki ko Jisu Kalaisi.

10 Aia nae bekia koeuhi ko kitautolu, koeuhi, ka tau ka a be mohe, ke tau moui fakataha mo ia.

11 Koia ke mou fefakafiemalieaki akimoutolu, o felagaaki hake akimoutolu, o hage foki koia oku mou fai.

12 Bea oku mau kole kiate kimoutolu, e kaiga, ke mou ilo akinautolu oku gaue iate kimoutolu, bea oku nau bule‘i akimoutolu i he Eiki, bea valoki‘i akimoutolu;

13 Bea ke mou tokaga lahi aubito kiate kinautolu i he ofa koeuhi koe nau gaue. Bea ke mou nonofo feofoofani be.

14 Bea koeni, oku mau eginaki kiate kimoutolu, e kaiga, valoki‘i akinautolu oku fakamaveuveu, fakafiemalie ki he kau loto foi, boubou ae vaivai, ke mou faa kataki‘i kotoabe.

15 Vakai ke oua naa ai ha taha oku totogi ae kovi aki ae kovi ki ha taha; ka mou tulituli mau ai be ki he mea oku lelei, iate kimoutolu, bea ki he kakai kotoabe.

16 Fiefia mau ai be.

17 Lotu taetuku.

18 Fakafetai i he mea kotoabe: he koe finagalo ia oe Otua ia Kalaisi Jisu kiate kimoutolu.

19 Oua naa fuifui ae Laumalie.

20 Oua naa taetokaga ki he gaahi malaga.

21 Ahiahi‘i ae gaahi mea kotoabe; buke ke mau aia oku lelei.

22 Taofi akimoutolu mei he matamata kovi kotoabe.

23 Bea ofa ke fakamaonioni haohaoa akimoutolu e he Otua oe melino: bea ofa ke fakatologa taehalaia akimoutolu a ho mou laumalie kotoa, mo ho mou loto, mo ho mou jino, o a‘u ki he haele mai a ho tau Eiki ko Jisu Kalaisi.

24 Oku mooni aia oku ne uiui‘i akimoutolu; bea te ne mafai foki ia.

25 E kaiga, hufia akimautolu.

26 Ofa atu ki he kaiga kotoabe aki ae uma maonioni.

27 Oku ou fekau fakababau kiate kimoutolu i he Eiki, ke lau atu ae tohi ni ki he kaiga maonioni kotoabe.

28 Ke iate kimoutolu ae aloofa a ho tau Eiki ko Jisu Kalaisi. Emeni.