Ko Hono Ua oe Tohi a Bita
Vahe 1
1 Oku fai e Bita ke fakatuu mau akinautolu i he amanaki lelei ki he tubulaki oe gaahi foaki lelei ae Otua, 5 oku ne eginaki ke nau fakamooni‘i ho nau ui aki ae tui moe gaahi gaue lelei: 12 aia oku ne tokaga lahi ke fakamanatu akinautolu ki ai, he kuo ofi ene bekia aana: 16 bea ne ako ke nau tuu mau i he tui kia Kalaisi, koe Alo mooni oe Otua, koe fakamooni ki ai ae kau abosetolo, moe Tamai, moe kau balofita.
¶ 1 KO AU SAIMONE BITA, koe tamai-oeiki moe abosetolo o Jisu Kalaisi, kiate kinautolu kuo lava‘i mo kimautolu ae tui mahuiga koia i he maonioni o ho tau Otua moe Fakamoui ko Jisu Kalaisi:
2 Ke tubulekina kiate kimoutolu ae aloofa moe monuia i he ilo oe Otua, bea mo Jisu ko ho tau Eiki,
3 O fakatatau ki he foaki kiate kitautolu e he ene malohi faka‐Otua ae gaahi mea kotoabe ki he moui moe aga faka‐Otua, i he ilo kiate ia kuo ne uiui‘i aki-tautolu ki he hakeaki moe maonioni:
4 Aia kuo foaki ai kiate kitautolu ae gaahi talaofa oku lahi aubito mo mahuiga: koeuhi ke mou kau ai i he aga ae Otua, i hoo mou hao mei he kovi oku i mamani i he holi kovi.
5 Bea koeuhi koia, ke mou matuaki fai lahi, o taki hake hoo mou tui ki he loto toa; bea ki he loto toa ae ilo;
6 Bea ki he ilo ae faa taofi; bea ki he faa taofi ae faa kataki; bea ki he faa kataki ae aga faka‐Otua;
7 Bea ki he aga faka‐Otua ae agalelei fakakaiga; bea ki he agalelei fakakaiga ae ofa.
8 He kabau oku nofoia akimoutolu e he gaahi mea ni, mo tubulekina, e ikai ai te mou fakabikobiko be taefua i he ilo ki ho tau Eiki ko Jisu Kalaisi.
9 Ka ko ia oku majiva i he gaahi mea ni oku kui ia, bea oku ikai faa mamata mamao atu, bea kuo galo iate ia hono fakamaa mei he ene muaki agahala.
10 Koia, e kaiga, ke ajili ai hoo mou fai feiga ke fakatuu mau ho mou ui mo ho mou fili: he kabau te mou fai ae gaahi mea ni, e ikai aubito te mou higa:
11 He koia e tuku ai kiate kimoutolu o lahi aubito ae huaga ki he buleaga taegata o ho tau Eiki moe Fakamoui ko Jisu Kalaisi.
12 Koia e ikai tuku eku fakamanatu‘i mau ai be akimoutolu i he gaahi mea ni, ka oku mou ilo‘i ia, bea oku mou tuu mau i he mooni ni.
13 Ka oku ou behe, oku totonu, i he eku kei i he fale fehikitaki ni, ke lagaki mo fakamanatu‘i akimoutolu;
14 I he eku ilo, e toe jii bea teu tukuage hoku fale fehikitaki, o hage koe fakaha mai kiate au e ho tau Eiki ko Jisu Kalaisi.
15 Ka teu fai totoaki, koeuhi, ka hili eku mate, ke mou faa manatu mau ai be ki he gaahi mea ni.
16 He nae ikai te mau agimui ki he gaahi talatubua nae fakatubu e he boto fakakākā, i he e mau fakailo kiate kimoutolu ae malohi moe hoko mai a ho tau Eiki ko Jisu Kalaisi, ka koe kau mamata akimautolu ki hono nāunāu.
17 He nae ma‘u eia ae ogoogo lelei moe nāunāu mei he Otua koe Tamai, i he hoko mai kiate ia ae le‘o koia mei he nāunāu lelei lahi aubito, Ko hoku Alo ofaaga eni, aia oku ou fiemalie lahi ai.
18 Bea koe le‘o ni nae ha‘u mei he lagi naa mau ogo‘i, i he e mau fakataha mo ia i he mouga tabu.
19 Bea oku tau ma‘u foki ae lea mooni lahi oe kikite; aia ko hoo mou fai lelei a hoo mou tokaga ki ai, o hage ha māma oku ulo i he botu fakabouli, kae oua ke mafoa ae ata, bea hobo hake ae fetuu aho i ho mou loto:
20 O tomua ilo aeni, oku ikai ha kikite i he tohitabu oku tubu meiate ia be a hono uhiga.
21 He koe kikite i mu‘a nae ikai tubu mei he faiteliha ae tagata: ka nae lea ae kau tagata maonioni oe Otua i hono ue‘i akinautolu e he Laumalie Maonioni.