¶ 1 KA nae ai foki ae kau balofita loi i he kakai, o hage e iate kimoutolu ae kau akonaki loi, akinautolu e omi faka-fufu ae gaahi he fakamalaia, o fakafiji‘i ae Eiki naa ne fakatau akinautolu, o omi ai kiate kinautolu ae fakaauha fakatootoo.

2 Bea e muimui ae toko lahi ki ho nau hala fakamalaia; bea koe mea iate kinautolu e lauikovi‘i ai ae hala oe mooni.

3 Bea koe mea i he manumanu te nau mea fakatau aki akimoutolu i he gaahi lea kākā: ko ho nau tautea kuo tala fuoloa oku ikai fakatuai, bea koe nau malaia oku ikai tulemohe.

4 He kabau nae ikai mamae ae Otua ki he kau agelo nae agahala, ka nae li hifo akinautolu ki heli, o tuku ki he gaahi ha‘iha‘i oe fakabouli, ke tatali ki he fakamāu;

5 Bea nae ikai te ne mamae ki he mama motua, ka nae fakamoui a Noa, aia naa ne malaga aki ae maonioni, moe toko fitu, o ne omi ae lomaki ki he mama oe kakai agahala;

6 O ne tuku ae ogo kolo ko Sotoma mo Komola ki he fakaauha, o ne liliu ia koe efuefu, bea ne gaohi ia koe fakailoga kiate kinautolu e moui fai agahala ki mui;

7 O ne fakamoui a Lote agatonu, aia nae mamahi i he ulugaaga fakalielia ae kau agahala:

8 (He nae nofo ae tagata maonioni koia iate kinautolu, bea i he ene mamata mo fanogo, nae fakamamahi a hono laumalie maonioni, i he aho kotoabe, aki e nau gaahi faiaga taetotonu;)

9 Oku ilo e he Eiki ke fakamoui ae kakai aga faka‐Otua mei he gaahi ahi-ahi, bea ke tuku ae taeagatonu ki he aho oe fakamāu ke tautea:

10 Ka e lahi kiate kinautolu oku aeva o fakatatau ki he kakano i he holi fakalielia, bea nau manuki‘i ae bule. Koe kau aga malohi, moe kau aga fefeka, oku ikai te nau manavahe ke lauikovi ae kau bule.

11 Ka koe kau agelo, oku nau lahi hake i he malohi moe mafai, oku ikai te nau lauikovi akinautolu i he ao oe Eiki.

12 Ka ko kinautolu ni oku fakakakano, o hage koe faga manu taeloto, kuo gaohi ke moua mo fakaauha, oku nau lea kovi ki he gaahi mea oku ikai te nau ilo‘i; bea e auha aubito akinautolu i he e nau kovi a nautolu;

13 Bea te nau ma‘u ae totogi oe taemaonioni; akinautolu oku behe koe mea malie ke fai kovi oku kei aho. Koe gaahi ila moe gaahi mele  akinautolu, oku nau vaiga aki a ho nau kākā‘i, lolotoga e nau katoaga be mo kimoutolu;

14 Ko ho nau mata oku fonu i he tono fefine, bea oku ikai faa tuku ae agahala; oku nau tauhele ae kau laumalie tae-mau: oku iate kinautolu ae loto kuo boto i he gaahi gaue manumanu; koe fānau malaia:

15 Kuo nau jiaki ae hala totonu, bea alu hehe, o muimui i he hala o Belami koe foha o Bosoa, aia naa ne manako ki he totogi oe taemaonioni:

16 Ka nae valoki ia i he ene agahala: i he lea ae asi noa aki ae le‘o oe tagata, o ne taofi ki he vale ae balofita.

17 Koe gaahi luo tae ai ha vai akinautolu ni, koe gaahi ao oku viligia e he afā; akinautolu kuo tuku tologa ki ai ae uliuli oe fakabouli taegata.

18 Koeuhi oka nau ka lea aki ae gaahi lea fakafuofuo lahi oe loi, oku nau tauhele i he gaahi holi fakakakano, moe aga fakalielia, akinautolu nae hao mooni meiate kinautolu oku moui hehe be.

19 Lolotoga e nau fakailo kiate kinautolu ae tauataina, kae ta oku nau bobula akinautolu ki he fakalielia: he koia kuo ikuna ai ae tagata koia ia kuo ne fakabobula ai.

20 He kabau ko eni, kuo hili e nau hao mei he gaahi uli o mamani i he ilo‘i ae Eiki moe Fakamoui ko Jisu Kalaisi, e toe fihituu ai, mo ikuna akinautolu, bea e kovi lahi ae gataaga kiate kinautolu i he kamataaga.

21 He koe mea e lelei lahi kiate kinautolu o ka ne ikai te nau ilo ae hala oe maonioni, ka i he e nau ilo ia, bea toe tafoki mei he fekau maonioni nae tuku kiate kinautolu.

22 Ka kuo hoko kiate kinautolu o hage koe fakatātā mooni, Kuo toe foki ae kuli ki he ene lua aana; moe jinā-manu nae kaukau ki he ene fetafoki-fokiaki i he belebela.