Ko Hono Tolu oe Tohi a Jone
Vahe 1
1 Oku ne fakaogolelei a Keio koeuhi ko ene aga fakalotu mooni, 5 mo ene ofa 7 ki he kau malaga mooni: 9 oku ne lāuga i he aga taeofa a Taiotifi koe fielahi, 11 aia ke oua aubito naa faifaitaki ki ai: 12 bea ne fakamoeni ki he ogoogo lelei e Temetelio.
¶ 1 KOE motua ki he ofeina ko Keio, aia oku ou ofa mooni ki ai.
2 E ofeina, koe fugani i he mea oku ou kolea, ke ke monuia, mo moui mālōlō, o hage be koe monuia o ho laumalie.
3 He neu fiefia lahi, i he ha‘u ae kaiga, o fakamooni ki he mooni oku iate koe, o hage ko hoo eveeva i he mooni.
4 Oku ikai haaku fiefia e lahi hake, ka ko eku fanogo oku aeva eku fānau i he mooni.
5 E ofeina, oku ke fai agatotonu be aia oku ke fai ki he gaahi kaiga, moe kakai muli;
6 Bea kuo nau fakamooni i he ao oe jiaji ki hoo ofa: bea kabau te ke moi-moi‘i akinautolu i he e nau fonoga o tāu moe Otua, ko hoo fai lelei ia:
7 He nae alu atu akinautolu koeuhi ko hono huafa, o ikai ma‘u ha mea mei he kakai Jenitaile.
8 Koia oku totonu ai e tau talia ae kakai behe, ke tau hoko koe kau tokoni ki he mooni.
9 Neu tohi ki he jiaji: ka ko Taiotifi oku manako ke lahi hake iate kinautolu, oku ikai te ne tali akinautolu.
10 Koia, kabau teu alu atu, teu manatu ki he ene gaahi gaue oku ne fai, a ene balau kiate kitautolu i he gaahi lea kovi: bea i he ene taefiu ai, oku ikai te ne tali eia ae kaiga, bea oku ne taofi kiate kinautolu nae loto ki ai, o ne kabuji akinautolu mei he jiaji.
11 E ofeina, oua naa agimui ki ha kovi, ka koia be oku lelei. Ko ia oku ne fai lelei, oku oe Otua ia: ka ko ia oku ne fai kovi, kuo ikai mamata ia ki he Otua.
12 Oku ogoogo lelei a Temetelio i he kakai kotoabe, bea i he mooni foki: io, bea oku mau fakamooni foki; bea oku mou ilo oku mooni e mau fakamooni.
13 Kuo lahi ae mea keu tohi atu ai, ka oku ikai teu loto ke tohi kiate koe aki ae vaitohi moe beni:
14 Ka oku ou amanaki e vave eku mamata kiate koe, bea te ta alea o femamataaki. Ke iate koe ae fiemalie. Oku ofa atu ae kaiga kiate koe. Tala ae ofa ki he kaiga, o hua aki ho nau higoa.