¶ 1 I HE kuoga koia, nae mafao ai ae nima o Helota koe tu‘i, ke fakamamahi‘i ae niihi i he jiaji.

2 Bea ne tamate‘i a Jemesi koe tokoua o Jone aki ae heleta.

3 Bea i he ene mamata oku fiefia ai ae kakai Jiu, nae fai eia ke ne buke foki a Bita. (Bea nae feuga ia moe gaahi aho oe ma tae mea fakatubu.)

4 Bea kuo ne buke ia, bea ne fakahu ki he fale fakabobula, o tuku ki he vahega tau e fa, nae taki toko fa, ke nau leohi ia; o ne tokaga ke omi ia kituaa ki he kakai oka hili ae  katoaga oe Lakaatu.

5 Koia nae moua be a Bita i he fale fakabobula: ka nae hufia fakamatoato ia e he jiaji ki he Otua.

6 Bea i he tokaga a Helota ke omi ia kituaa, nae mohe a Bita i he bo koia i he vahaa oe ogo tagata tau, nae ha‘i aki ae ukamea fihifihi e ua: bea i he mataba ae kau leo, o leohi ae fale fakabobula.

7 Bea vakai, kuo iate ia ha agelo ae Eiki, bea malama i he fale fakabobula ae māma: bea ne ta‘i a Bita i he vakavaka, mo ne fokotuu ia, o behe, Tui ke vave. Bea nae homo ae ukamea fihifihi i hono nima.

8 Bea behe e he agelo kiate ia, Nonoo ho kofu, bea fakamau mo ho tobuva‘e. Bea ne fai ia. Bea ne behe kiate ia, Ai ho kofu, bea ke muimui kiate au.

9 Bea naa ne alu kituaa, o muimui iate ia; bea nae ikai te ne ilo be koe mooni aia kuo fai e he agelo; ka nae mahalo eia koe mea ha mai oku ne mamata ai.

10 Bea kuo na tuku ki mui ae uluaki kau leo mo hono ua, bea na hoko ki he mataba ukamea, oku alu atu ai ki he kolo; bea matoo ia, iate ia be, kiate kinaua: bea naa na o kituaa, o na fonoga i he hala e taha; bea fakafokifa be kuo mole iate ia ae agelo.

11 Bea kuo matala ae loto o Bita, bea behe eia, Oku ou toki ilo bau ni, kuo fekau mai e he Eiki ene agelo, bea kuo ne fakamoui au mei he nima o Helota, moe amanaki kotoabe ae kakai Jiu.

12 Bea i he ene kei fifili ki ai, mo ene hoko ki he fale o Mele koe fa‘e a Jone, oku higoa ko Maake; nae katoa ai ae toko lahi o lotu.

13 Bea i he tukituki a Bita ki he mataba ituaa, nae ha‘u ae taahine oku higoa ko Lota, o fakafanogo.

14 Bea i he ene ilo ae le‘o o Bita, nae ikai te ne too ae mataba, koe mea i he fiefia, ka ka lele ia o tala oku tuu a Bita i he mataba.

15 Bea nau behe kiate ia, Oku ke vale. Ka nae fakababau ia, Koe mooni ko ia be. Bea nau toki behe, Ko ene agelo.

16 Ka nae kei tukituki be a Bita: bea i he e nau too o mamata kiate ia, naa nau ofo.

17 Ka nae taofi aki eia hono nima ke nau fakalogobe, bea ne fakamatala kiate kinautolu a hono omi ia e he Eiki mei he fale fakabobula. Bea ne behe, Alu o fakaha ae gaahi mea ni kia Jemesi, moe kaiga. Bea alu ia mei ai, o alu ki ha botu kehe.

18 Bea kuo aho hake, nae maveuveu lahi ae kau tau, be kofaa a Bita.

19 Bea i he kumi ia e Helota, mo ikai jii ilo ia, naa ne fakamāu‘i ae kau leo, bea fekau eia ke tamate‘i  akinautolu. Bea nae alu hifo ia mei Jutea o nofo ki Sesalia.

¶ 20 Bea nae ita lahi a Helota kiate kinautolu i Taia mo Saitone: ka naa nau ha‘u loto taha kiate ia, bea kuo nau kaiga aki a Balasito, koe tauhi oe botu mohe oe tu‘i, o kole ke nau fakalelei; koeuhi nae ma‘u e ho nau fonua ae mea kai mei he  fonua oe tu‘i.

21 Bea koe aho nae kotofa, nae kofu fakatu‘i ai a Helota, bea nofo i hono nofoa fakatu‘i, bea fai ene lea kiate kinautolu.

22 Bea mavava ae kakai  o behe, Koe le‘o ia oe otua, ka oku ikai oe tagata.

23 Bea ta‘i leva ia e ha agelo ae Eiki, koeuhi nae ikai te ne tuku ae fakaabaaba ki he Otua: bea nae kai ia e he tuga, bea mate ia.

¶ 24 Ka nae tubu bea mafola atu o lahi ae folofola oe Otua.

25 Bea liu mai mei Jelusalema a Banebasa mo Saula, kuo na fai e na fekau, bea naa na o mo Jone, oku higoa ko Maake.