¶ 1 BEA kuo hoko a Fesito ki he buleaga, bea hili ae aho e tolu, nae alu hake ia i Sesalia ki Jelusalema.

2 Bea toki fakaha a Baula kiate ia e he taulaeiki lahi moe houeiki i he kakai Jiu, bea nau kole kiate ia.

3 Mo holi ke ofa ia, o ne fekau ke omai ia ki Jelusalema, ka nau toka tatao i he hala ke tamate‘i ia.

4 Ka nae behe e Fesito, ke nofo be a Baula i Sesalia, kae toe jii bea alu be ia ki ai.

5 Bea naa ne behe, Ke tau alu hifo mo kimoutolu, e faa alu, o talatalaaki ae tagata koia, o kabau oku iate ia ha kovi.

6 Bea koe aho hogofulu tubu ene nofo iate kinautolu, bea alu hifo ia ki Sesalia; bea i he aho nae feholo‘i, nae nofo ia i he nofoa fakamāu, mo ne fekau ke omi a Baula.

7 Bea kuo ha‘u ia, bea tutuu takatakai ae kau Jiu kuo nau alu hifo mei Jelusalema, o tukuaki‘i a Baula i he gaahi kovi lahi mo mamafa, ka nae ikai te nau faa fakamooni ki ai.

8 Ka nae fakamatala eia, Oku ikai aubito teu fai ha kovi jii ki he fono ae kakai Jiu, be ki he fale lotu lahi, be kia Sisa.

9 Ka nae loto a Fesito ke ne fai ke fakafiefia‘i ae kakai Jiu, bea ne leaage kia Baula, o behe, Te ke alu hake ki Jelusalema, ke fakamāu ai koe i he gaahi mea ni i hoku ao?

10 Bea behe e Baula, Oku ou tuu i he nofoa fakamāu o Sisa, aia oku totonu ke fakamāu ai au: oku ikai teu fai ha kovi ki he kakai Jiu, bea oku ke ilo bau ia.

11 He kabau koe fai kovi au, be kuou fai ha mea oku totonu keu mate ai, oku ikai teu fie hao mei he mate: bea kabau oku ikai ha mea oku tukuaki‘i ai au ekinautolu ni, bea oku ikai ha tagata e faa tuku au kiate kinautolu. Teu fakamāu be au ia Sisa.

12 Bea toki alea a Fesito moe kau fakamāu, bea ne behe, Kuo ke behe te ke fakamāu be ia Sisa? Bea te ke alu koe kia Sisa.

13 Bea kuo hili ae aho niihi, bea ha‘u ae tu‘i ko Akiliba mo Belenaisi ki Sesalia ke nau feiloaki mo Fesito.

14 Bea kuo na nofo ai o aho lahi, bea fakaha e Fesito ae mea a Baula ki he tu‘i, o ne behe, Oku ai ae tagata e taha nae tuku bobula e Filike:

15 Bea nae fakaha mai ia i he eku kei i Jelusalema, e he kau taulaeiki lahi moe mātua oe kakai Jiu, o nau kole ke tukuage ia ke tamate‘i.

16 Ka neu behe kiate kinautolu, Oku ikai koe aga o Loma ke tomua tukuage ha tagata ke mate, kae oua ke fakamāu fakataha aia oku tukuaki‘i mo kinautolu oku nau tukuaki‘i ia, bea oua ke ne fakamatala eia ae kovi kuo tukuaki‘i ai ia.

17 Bea koia, i he e nau ha‘u ki heni, o bogibogi ai, naaku nofo leva i he nofoa fakamāu, beau fekau ke omi ae tagata.

18 Bea i he tutuu hake ae kau tukuaki, nae ikai te nau talatalaaki‘i ia i ha mea naaku amanaki ki ai:

19 Ka nau talatalaaki‘i ia i he gaahi mea i he e nau lotu a nautolu, bea ki he toko taha kuo mate ko Jisu, ka nae fakababau e Baula kuo moui ia.

20 Bea koeuhi nae ikai teu ilo be fefe‘i ae eke oe gaahi mea behe, neu fehui be te ne alu ki Jelusalema, o fakamāu ai i he gaahi mea ni.

21 Ka i he behe e Baula e fakamāu‘i ia i he ao o Aokositusi, koia neu fekau ke tuku be ia kae oua keu atu ia kia Sisa.

22 Bea behe e Akiliba kia Fesito, Amujiaage eau kuou fanogo foki au ki he tagata. Bea behe eia, Te ke fanogo kiate ia abogibogi.

23 Bea i he abogibogi, nae ha‘u a Akiliba mo Belenaisi, moe teuga lahi aubito, o hu ki he botu fakamāu, moe gaahi eiki tau, moe kau matābule oe kolo, bea i he fekau e Fesito nae omi a Baula.

24 Bea behe e Fesito, E tu‘i ko Akiliba, moe kakai kotoabe oku tau fakataha ni, oku mou mamata ki he tagata ni, aia kuo kole lahi ai kiate au e he kakai Jiu kotoabe i Jelusalema, bea i heni foki, o nau kalaga oku ikai lelei ke moui ai be ia.

25 Ka i he eku ilo oku ikai te ne fai ha mea e totonu ke mate ai ia, bea i he ene behe eia e fakamau‘i be ia ia Aokositusi, kuo mau hoku loto keu tuku atu ia.

26 Ka oku ikai teu ma‘u ha mea kuo fakababau kiate ia keu tohi atu ai ki he eku eiki. Koia kuou omi ai ia ki ho mou ao, bea ki he ao oe tu‘i ko Akiliba, koeuhi ka hili hono ekea, teu ilo ai ha mea ke tohi.

27 He oku matamata vale kiate au ke tuku atu ha bobula, kae ikai ke fakamatala ae gaahi kovi oku talatalaaki‘i ai ia.