¶ 1 BEA toki behe e he taulaeiki lahi, Oku mooni ae gaahi mea ni?

2 Bea behe eia, Ae kau tagata kaiga moe mātua, mou fanogo; Nae ha mai ae Otua lagilagi ki he e tau tamai ko Ebalahame, i he ene kei i Mesobotemia, kae teeki nofo ia i Kalana,

3 O ne behe kiate ia, Alu i ho fonua, mei ho kaiga, bea ke alu ki he fonua teu fakaha kiate koe.

4 Bea toki ha‘u ia mei he fonua ko Kalitia, o nofo i Kalana: bea i he bekia a ene tamai, bea toki hiki ia mei ai ki he fonua ni, aia oku mou nofo ai ni.

5 Bea nae ikai te ne foaki kiate ia ha abi i ai, be ha botu ke tuu ai hono va‘e: ka naa ne fakailo te ne foaki ia moona, bea mo hono hako ki mui iate ia, ka nae teeki ai haane fānau.

6 Bea nae behe ae folofola ae Otua, E nofo aunofo hono hako i ha fonua kehe; bea e fakabobula‘i akinautolu e he kakai, mo gaohi kovi i he ta‘u e fageau.

7 Bea nae behe e he Otua, Teu tautea ae buleaga te nau bobula ki ai: bea hili ia, te nau ha‘u mei ai, o tauhi‘i au i he botu ni.

8 Bea ne tuku kiate ia ae fuakava oe kamu: bea nae tubu a Aisake, bea kamu ia i hono aho valu; bea tubu ia Aisake a Jekobe; bea tubu ia Jekobe, ae houeiki matua e toko hogofulu ma toko ua.

9 Bea nae loto meheka ae kau matua kia Josefa, bea naa nau fakatau ia ki Ijibite: ka nae iate ia ae Otua,

10 O ne fakamoui ia mei he ene mamahi kotoabe, bea naa ne bule ke ofeina ia mo boto i he ao o Felo koe tu‘i o Ijibite; bea ne fakanofo ia koe bule ki Ijibite mo hono fale kotoabe.

11 Bea nae hoko ae hoge moe mamahi lahi ki he fonua kotoabe o Ijibite mo Kenani: bea nae ikai ma‘u ha mea kai e he e tau gaahi tamai.

12 Bea i he fanogo a Jekobe oku i Ijibite ae uite, naa ne tomua fekau atu ae tau gaahi tamai.

13 Bea i hono tuo ua  hifo, nae fakaha a Josefa ki hono kaiga; bea nae fakaha ae kaiga o Josefa kia Felo.

14 Bea toki fekau e Josefa, ke omi a ene tamai ko Jekobe, mo hono kaiga kotoabe, koe toko fitugofulu ma toko nima.

15 Bea nae alu hifo a Jekobe ki Ijibite, bea nae bekia ai, aia moe tau gaahi tamai.

16 Bea nae fetuku akinautolu ki Sikemi, o tuku ki he fonualoto nae fakatau e Ebalahame aki ae gaahi baaga mei he foha o Emoa  koe tamai a Sikemi.

17 Ka kuo fakaaau o ofi ae kuoga nae talaofa ki ai, aia nae fuakava ki ai e he Otua kia Ebalahame, bea tubu o toko lahi ae kakai i Ijibite,

18 O a‘u ki he hoko ae tu‘i e taha, aia nae ikai ilo eia a Josefa.

19 Bea nae fai kākā ia ki ho tau kaiga, mo fai fakamamahi ki he e tau gaahi tamai, bea naa nau li ai kituaa e nau fānau valevale, ke oua naa nau moui.

20 Bea feuga mo ia nae fanau‘i a Mosese, bea nae fakaofoofa lahi ia, bea nae tauhi  fufu ia i he fale o ene tamai i he mahina e tolu:

21 Bea i he tuku ia kitua, nae too hake ia e he ofefine o Felo, bea nae gaohi ia maane tama.

22 Bea nae akonaki‘i a Mosese i he boto kotoabe oe kakai Ijibite, bea nae malohi ia i he lea moe gaue.

23 Bea kuo kakato kiate ia ae ta‘u e fagofulu, bea tubu i hono loto ke aahi ki hono kaiga koe fānau a Isileli.

24 Bea i he ene mamata ki he toko taha nae teia taetotonu, naa ne lagomaki‘i ia, o totogi, ia kuo fakamalohi‘i, mo tamate‘i ae tagata Ijibite:

25 He nae mahalo eia kuo ilo e hono kaiga e fakamoui e he Otua akinautolu i hono nima: ka nae ikai te nau ilo.

26 Bea bogibogi ai, naa ne fakaha ia kiate kinautolu lolotoga e nau ke, bea ne fai ke fakalelei akinautolu, o ne behe, Kau tagata, koe kaiga akimoutolu; koeha oku mo fefai kovi aki ai?

27 Ka ko ia nae fai kovi ki hono kaugaabi, ne ne teke‘i atu ia, o behe, Kohai naa ne fakanofo koe koe bule moe fakamāu kiate kimautolu?

28 Te ke tamate‘i au, o hage ko hoo tamate‘i aneafi ae tagata Ijibite?

29 Bea toki hola a Mosese i he lea koia, bea aunofo ia i he fonua ko Mitiani, bea nae tubu iate ia i ae foha e toko ua.

30 Bea kuo hili ae ta‘u e fagofulu, bea ha mai kiate ia, i he toafa oe mouga ko Sainai, ha agelo ae Eiki, i he ulo afi i he ulu akau.

31 Bea i he mamata a Mosese ki ai, nae ofo ia i he ene ha mai: bea i he ene unuunu atu ke vakai, nae ogo mai kiate ia ae le‘o oe Eiki,

32  O behe, Koe Otua au o hoo gaahi tamai, koe Otua o Ebalahame, koe Otua o Aisake, bea koe Otua o Jekobe. Bea nae toki tetetete a Mosese, bea nanavahe ke jio.

33 Bea behe e he Eiki kiate ia, Too ho tobuva‘e i ho va‘e; he koe botu oku ke tuu ai koe botu maonioni.

34 Kuou mamata, kuou mamata, ki he mamahi, a hoku kakai i Ijibite, bea kuou fanogo ki he e nau to‘e, bea kuou alu hifo ke fakamoui akinautolu. Bea ke ha‘u, teu fekau koe ki Ijibite.

35 Ko Mosese eni, aia naa nau liaki, o behe, Kohai ne ne fakanofo koe koe bule moe fakamāu? ko ia ia nae fekau e he Otua koe eiki moe huhui, i he nima oe agelo nae ha mai kiate ia i he ulu akau.

36 Bea ne omi akinautolu mei ai, kuo hili ene fai ae gaahi mana moe gaue fakaofo i he fonua ko Ijibite, moe Tahi Kulokula, bea moe toafa, i he ta‘u e fagofulu.

¶ 37 Bea koe Mosese koia eni, nae behe kihe fānau a Isileli, E fokotuu kiate kimoutolu e he Eiki ko ho mou Otua ha balofita i ho mou kaiga, ke hage ko au; bea te mou fanogo kiate ia.

38 Ko ia ia nae i he fakataha i he toafa, moe agelo aia nae lea kiate ia i he mouga ko Sainai, bea moe tau gaahi tamai; aia nae ma‘u ae gaahi fekau moui ke tuku kiate kitautolu:

39 Aia nae ikai talagofua ki ai e tau gaahi tamai, ka nae teke‘i atu ia iate kinautolu, bea nau foki i ho nau loto ki Ijibite,

40 O nau behe kia Eloni, Gaohi moo tautolu ha gaahi otua ke muomua iate kitautolu: he koe Mosese ni, aia nae omi akitautolu mei he fonua ko Ijibite, oku ikai te tau ilo be oku ife ia.

41 Bea naa nau gaohi ae uhiki‘i bulu i he gaahi aho koia, bea feilaulau ki he tamabua, o fiefia i he gaue a ho nau nima.

42 Bea nae tafoki ae Otua, o fakatukutuku‘i akinautolu, ke nau lotu ki he gaahi mea oe lagi; o hage koia kuo tohi i he tohi oe kau balofita, Ae fale o Isileli, he kuo mou tauhi aki au ae manu tamate‘i, moe feilaulau, i he ta‘u e fagofulu i he toafa?

43 Io, bea mou too hake ae fale fehikitaki o Moloke, moe fetuu o ho mou otua ko Lemafani, ae gaahi fakatātā naa mou gaohi ke mou lotu ki ai: bea teu fetuku akimoutolu kitua Babilone.

44 Nae i he e tau gaahi tamai ae fale fehikitaki oe fakamooni i he toafa, o hage koe tuutuuni o ia nae folofola kia Mosese, ke ne gaohi ia o fakatatau ki he fakatātā kuo ne mamata ki ai.

45 Aia nae omi e he e tau gaahi tamai mo Josiua ki he fonua oe kakai Jenitaile, akinautolu nae kabuji e he Otua mei he ao oe tau gaahi tamai, o a‘u ki he gaahi aho o Tevita,

46 Aia nae ofeina i he ao oe Otua, bea ne holi ke ne ilo ha nofoaga moe Otua o Jekobe.

47 Ka nae laga e Solomone ae fale moona.

48 Ka oku ikai nofo ae Fugani Maoluga i he gaahi fale kuo gaohi aki ae nima; o hage koe lea ae balofita,

49 Oku behe e he Eiki, Ko hoku nofoa ae lagi, bea ko hoku tuugava‘e a mamani: koeha ae fale te mou laga mooku? bea koeha hoku mālōlōaga?

50 Ikai nae gaohi e hoku nima ae gaahi mea ni kotoabe?

¶ 51 Ae kau kia kekeva, bea taekamu ae loto moe teliga, oku mou teke‘i mau ai be ae Laumalie Maonioni: o hage ko hoo mou gaahi tamai.

52 Koe balofita fe nae ikai fakataga‘i e hoo mou gaahi tamai? bea kuo nau tamate‘i akinautolu nae muaki fakaha ae ha‘u oe Toko Taha Agatonu; aia kuo mou toki lavaki‘i mo tamate‘i:

53 Akimoutolu nae ma‘u ae fono i he ao oe kau agelo, kae ikai fai ki ai.

¶ 54 Bea kuo nau fanogo ki he gaahi mea ni, nae tekelili ho nau loto i he ita, bea nau fakalili ho nau nifo kiate ia.

55 Ka nae bito ia i he Laumalie Maonioni, bea jio fakamama‘u ia ki he lagi, o ne mamata ki he nāunāu oe Otua, mo Jisu oku tuu i he nima toomatau oe Otua,

56 O ne behe, Vakai, oku ou mamata ki he lagi kuo matagaki, moe Foha oe tagata oku tuu i he nima toomatau oe Otua.

57 Bea naa nau toki kalaga aki ae le‘o lahi, mo tabuni ho nau teliga, o feohofi fakataha kiate ia,

58 O li ia ki he tuaa kolo, mo tologaki aki ae maka: bea nae tuku hifo e he kau fakamooni ho nau kofu i he va‘e oe talavou, ko Saula hono higoa.

59 Bea naa nau tologaki a Setiveni, kae lotu be ia, mo behe, Eiki Jisu, ke ke ma‘u hoku laumalie.

60 Bea tuulutui ia, o kalaga aki ae le‘o lahi, Eiki, oua naa lau ae agahala ni kiate kinautolu. Bea kuo ne lea aki ia, bea mohe. Bea nae loto lelei a Saula ki he ene mate.