¶ 1 KOIA foki, ke tuku ki mui ae gaahi uluaki akonaki a Kalaisi, ka tau fai atu ki he haohaoa; ke oua naa toe ai ae tuuga oe fakatomala mei he gaahi gaue mate, bea moe tui ki he Otua,

2 Ae akonaki oe gaahi babitaiso, moe hilifaki oe nima, moe toetuu oe mate, moe fakamāu taegata.

3 Bea te tau fai eni, o kabau e lelei ki he Otua.

4 He koeuhi e ikai aubito mafai kiate kinautolu nae muaki māmagia, mo nau kamata ae foaki mei oluga, bea nau ma‘u moe Laumalie Maonioni,

5 Bea kuo nau kamata ae folofola lelei ae Otua, moe gaahi malohi oe mama e ha‘u,

6 Bea kuo nau higa atu,  e ikai mafai ke toe fakafoou akinautolu ki he fakatomala; he oku nau toe tutuki ki he akau ekinautolu be ae Alo oe Otua, o fai fakahāhā be a hono fakama‘i.

7 He koe kelekele oku ne inumia ae uha oku faa to ki ai, bea tubu mei ai ae akau oku tāu mo kinautolu oku tauhi ia, oku tabuekina ia mei he Otua:

8 Ka koia oku tubu mei ai ae akau talatala moe talatalaamoa, kuo jiaki, bea kuo ofi ki he malaia; ko hono gataaga o ia koe vela.

9 Ka ko kimoutolu, e kaiga, ne ogo oku behe ni e mau lea, ka oku mau amanaki ki he gaahi mea lelei lahi iate kimoutolu, moe gaahi mea oku hoa moe fakamoui.

10 He oku ikai taeagatonu ae Otua, ke ne fakagalo‘i hoo mou gaue moe feiga ofa, aia kuo mou fakaha ki hono huafa, i hoo mou tauhihi‘i ae kaiga maonioni, mo hoo mou gaue.

11 Bea ko ho mau loto, ke taki taha fakaha ekimoutolu ae faa fakakukafi koia ki he ilo bau oe amanaki lelei o a‘u ki he gataaga:

12 Ke oua naa mou fakabikobiko, ka e faifaitaki kiate kinautolu kuo nau lava‘i i he tui moe faa kataki ae gaahi talaofa.

13 He nae talaofa ae Otua kia Ebalahame, bea koeuhi kuo ikai ha taha e lahi hake ke ne fuakava ai, ne ne fuakava iate ia be,

14 O behe, Koe mooni i he fakamonuia teu fakamonuia‘i koe, bea i he fakatokolahi teu fakatokolahi‘i koe.

15 Bea kuo hili ene kataki fuoloa, ne ma‘u eia ae talaofa.

16 He koe mooni oku fuakava ae kakai i he lahi hake: bea koe fuakava ke fakamooni aki, koe fakagata ia oe fakakikihi kotoabe kiate kinautolu.

17 Bea i he mea ni, kuo finagalo ae Otua ke fakaha o lahi ki he kakai nae talaofa ki ai ae tae faa liliu o ene folofola, bea ne fakamooni aki ia ae fuakava:

18 Koeuhi i he mea tae faa liliu e ua, aia kuo ikai ai aubito faa loi ae Otua, ke ma‘u ekitautolu ae fiemalie lahi, akitautolu kuo feholaki ki he hufaga, ke buke ki he amanaki lelei kuo tuku i ho tau ao:

19 Aia kuo tau ma‘u o hage koe taula oe laumalie, bea oku mau mo taegau‘e, bea oku tau ia ki he  botu i loto buibui;

20 Aia kuo hu ki ai a Jisu koe takimu‘a maa tautolu, koe taulaeiki lahi o taegata i he lakaga o Melikiseteke.