¶ 1 KUOU tala ae gaahi mea ni kiate kimoutolu, koeuhi ke oua naa mou tūkia.

2 Te nau kabuji akimoutolu mei he fale lotu: io, e hokojia ae kuoga, ko ia te ne tamate‘i akimoutolu, e mahalo eia ko ene gaue lelei ki he Otua.

3 Bea te nau fai ae gaahi mea ni kiate kimoutolu, koeuhi nae ikai te nau ilo ae Tamai, be ko au.

4 Ka kuou tala ae gaahi mea ni kiate kimoutolu, koeuhi oka hoko ae kuoga, ke mou manatu naaku tala ia kiate kimoutolu. Bea nae ikai teu tala ae gaahi mea ni kiate kimoutolu i he kamataaga, koeuhi naaku iate kimoutolu.

5 Ka ko eni, i he eku alu kiate ia naa ne fekau au, oku ikai fehui ha mou toko taha kiate au, Oku ke alu kife?

6 Ka koe mea i he eku tala ae gaahi mea ni kiate kimoutolu, kuo bito ho mou loto i he mamahi.

7 Ka oku ou tala ae mooni kiate kimoutolu, oku aoga kiate kimoutolu eku alu: he kabau e ikai teu alu, e ikai ha‘u kiate kimoutolu ae Fakafiemalie; ka i he eku alu, teu fekau ia kiate kimoutolu.

8 Bea ka ha‘u ia, te ne valoki a mamani i he agahala, bea i he maonioni, bea i he fakamāu:

9 I he agahala, koe mea i he ikai te nau tui kiate au;

10 I he maonioni, koe mea i he eku alu ki he eku Tamai, bea e ikai te mou toe mamata kiate au;

11 I he fakamāu, koe mea i he fakamāu‘i ae eiki o mamani.

12 Oku kei lahi ae mea oku ou fie lea ai kiate kimoutolu, ka oku ikai te mou faa kataki ni.

13 Ka i he ha‘u ae Laumalie oe mooni, e tataki eia akimoutolu ki he mooni kotoabe: he ko ene lea e ikai meiate ia; ka koe mea kotoabe kuo ne fanogo ki ai,  koia ia te ne lea aki: bea e fakaha eia kiate kimoutolu ae gaahi mea e hoko.

14 E fakaogoogolelei‘i au eia: he te ne ma‘u aia oku aaku, o fakaha ia kiate kimoutolu.

15 Koe mea kotoabe oku ae Tamai, oku aaku ia: koia neu behe ai, te ne ma‘u aia oku aaku, o fakaha ia kiate kimoutolu.

16 E toe jii, bea e ikai te mou mamata kiate au; bea toe jii foki, bea te mou mamata kiate au, koe mea i he eku alu ki he Tamai.

17 Bea lea ai ene kau akoga niihi iate kinautolu, Koeha ae mea ni oku ne tala kiate kitautolu, E toe jii, bea e ikai te mou mamata kiate au: bea toe jii foki, bea te mou man ata kiate au: bea, Koe mea i he eku alu ki he Tamai?

18 Koia naa nau behe ai, Koeha ae mea ni oku ne lea aki, E toetoe jii? oku ikai te tau ilo ene lea.

19 Ka nae ilo e Jisu e nau holi ke fehui kiate ia, bea ne behe kiate kinautolu, Oku mou fehui iate kimoutolu i he eku lea, E toe jii, bea e ikai te mou mamata kiate au: bea toe jii foki, bea te mou mamata kiate au?

20 Koe mooni, koe mooni, oku ou tala atu kiate kimoutolu, Te mou tagi bea tagilāulāu, ka e fiefia a mamani: bea te mou mamahi, ka ko hoo mou mamahi e liliu koe fiefia.

21 Oka lagā ae fefine, oku mamahi ia, koeuhi kuo hokojia hono aho: ka i he ene faele‘i ae tama, oku ikai kei manatu ia ki he mamahi, koeuhi ko ene fiefia i he fanau‘i ha tagata ki mamani.

22 Ko eni, oku mamahi ni akimoutolu: ka teu toe vakai kiate kimoutolu, bea e fiefia ai ho mou loto, bea ko hoo mou fiefia, e ikai too e ha taha meiate kimoutolu.

23 Bea i he aho koia e ikai te mou fehui ha mea e taha kiate au. Koe mooni, koe mooni, oku ou tala kiate kimoutolu, Koe mea kotoabe te mou kole ki he Tamai i hoku huafa, te ne foaki kiate kimoutolu.

24 Oku teeki ai te mou kole ha mea i hoku huafa: kole, bea te mou ma‘u, koeuhi ke kakato ai hoo mou fiefia.

25 Koe gaahi mea ni kuou tala kiate kimoutolu i he gaahi lea fakatātā: ka oku ha‘u ae aho, e ikai teu kei lea ai kiate kimoutolu i he gaahi lea fakatātā, ka teu fakaha fakababau kiate kimoutolu i he Tamai.

26 I he aho koia te mou kole i hoku huafa: bea oku ikai teu behe kiate kimoutolu, teu fakakolekole ki he Tamai koeuhi ko kimoutolu:

27 He oku ofa ae Tamai foki kiate kimoutolu, koe mea i hoo mou ofa kiate au, bea i hoo mou tui naaku ha‘u mei he Otua.

28 Naaku ha‘u mei he Tamai, bea kuou ha‘u ki mamani: ko eni, oku ou tuku a mamani, kau alu ki he Tamai.

29 Bea behe e he ene kau akoga kiate ia, Vakai, ko eni oku ke lea ilogofua, bea oku ikai te ke lea i he fakatātā.

30 Ko eni oku mau ilo bau oku ke ilo‘i ae gaahi mea kotoabe, bea oku ikai aoga ke fehui e ha toko taha kiate koe: koe mea ni oku mau tui ai kuo ke ha‘u mei he Otua.

31 Bea leaage a Jisu kiate kinautolu, Oku mou tui ni koa?

32 Vakai, oku ha‘u ae aho, io, kuo hoko ni, e fakamovete ai akimoutolu, o tahi taha maana, bea te mou tuku au toko taha be: ka oku ikai teu toko taha be, he oku iate au ae Tamai.

33 Kuou tala ae gaahi mea ni kiate kimoutolu, koeuhi ke mou ma‘u ae fiemalie iate au. Te mou ma‘u ae mamahi i mamani: ka mou loto to‘a; kuou iku‘i a mamani.