¶ 1 BEA i hono hogofulu ma nima oe ta‘u oe bule a Taibiliusi Sisa, koe eiki bule a Bonito Bailato i Jutea, bea tu‘i ai a Helota i Kaleli, bea tu‘i a hono tokoua ko Filibe i Aitulia moe feituu o Tilakonite, bea tu‘i a Lisaniasi Abiline,

2 Bea ko Anasi mo Kaiafasi koe ogo taulaeiki lahi akinaua, nae hoko ae folofola ae Otua kia Jone koe foha o Sakalia i he toafa.

3 Bea ha‘u ia ki he botu fonua kotoabe o ofi ki Joatani, o ne malaga aki ae babitaiso oe fakatomala ki he fakamolemole oe agahala:

4 O hage koia kuo tohi i he tohi ae gaahi lea ae balofita ko Isaia, o behe, Koe le‘o oe toko taha oku kalaga i he toafa, Mou teuteu ae hala o Jihova, bea fakatonutonu hono aluaga.

5 E tanu ae luo kotoabe, e holoki hifo ae mouga moe tafugofuga kotoabe; bea e fakatotonu ae bikobiko, bea e fakatoka lelei ae gaahi hala oku toka tamaki;

6 Bea e mamata ae kakai kotoabe ki he fakamoui ae Otua.

7 Bea toki behe eia ki he kakai kuo aluage ke nau babitaiso iate ia, Ae fānau ae gata fekai, kohai ne ne valoki akimoutolu ke mou buna mei he houhau e ha‘u?

8 Koia mou fakaha ae gaahi fua oku gali moe fakatomala, bea oua naa lau leva i ho mou loto, Oku mau tamai aki a Ebalahame: he oku ou tala atu kiate kimoutolu, Oku faa fai e he Otua ke fakatubu i he gaahi maka ni ae fānau kia Ebalahame.

9 Bea koeni foki, kuo tuku ae toki ki he tefito oe gaahi akau: bea koia, ka iloga ae akau oku ikai tubu ai ae fua lelei e ta hifo  ia, o laku ki he afi.

10 Bea fehui ae kakai kiate ia, o behe, Koeha nai te mau fai?

11 Bea lea ia, o beheage kiate kinautolu, Ko ia oku ma‘u ae kofu tua e ua, ke ne foaki kiate ia oku ikai ma‘u; bea ko ia oku ma‘u ae mea kai, ke fai behe  foki.

12 Bea ha‘u foki ae kau tanaki tukuhau ke babitaiso, o nau behe kiate ia, Eiki, koeha te mau fai?

13 Bea behe eia kiate kinautolu, Oua naa mou ma‘u o lahi i he mea kuo tuutuuni maa moutolu.

14 Bea fehui foki e he kau tau kiate ia, o behe, Bea koeha te mau fai? Bea behe eia kiate kinautolu, Oua naa fai fakamalohi ki ha taha, bea oua naa lohiaki‘i; bea mou fiemalie i hoo mou totogi.

15 Bea nae lolotoga ae amanaki ae kakai, mo nau fifili kotoabe i ho nau loto kia Jone, be koe Kalaisi ia be ikai;

16 Bea lea a Jone, o ne beheage kiate kinautolu kotoabe, Koe mooni oku ou babitaiso aki akimoutolu ae vai; ka oku ha‘u ae toko taha oku malohi iate au, bea oku ikai tāu mo au keu vete ae nonoo o hono tobuva‘e: bea e babitaiso aki eia akimoutolu ae Laumalie Maonioni moe afi:

17 Oku i hono nima a hono fohe, bea te ne fakamaa aubito hono hahaaga, bea e tanaki ae uite ki hono feleoko; ka e tutu eia ae kafukafu aki ae afi taemate.

¶ 18 Bea lahi ae mea kehekehe naa ne malaga aki i he ene eginaki ki he kakai.

19 Ka nae valoki eia a Helota koe tu‘i, koeuhi ko Helotiasi koe unoho o hono tokoua ko Filibe, bea moe kovi kotoabe ne fai e Helota.

20 Bea ne fakalahi aki ae mea  ni kotoabe, a ene fakahu a Jone ki he fale fakabobula.

¶ 21 Bea kuo babitaiso ae kakai kotoabe, bea behe, ne babitaiso foki mo Jisu, bea i he ene lotu, ne matoo ae lagi,

22 Bea maliu hifo ae Laumalie Maonioni kiate ia o hage koe jino oe lube, bea hoko mai moe le‘o mei he lagi, o behe, Ko hoku Alo ofaaga koe; oku ou fiemalie lahi iate koe.

¶ 23 Bea kuo tolugofulu nai ae ta‘u o Jisu, aia (nae ui) koe foha o Josefa, aia koe foha o Helai,

24 Koe foha ia o Matati, koe foha ia o Livai, koe foha ia o Melikai, koe foha ia o Jana, koe foha ia o Josefa,

25 Koe foha ia o Matatiasi, koe foha ia o Emosi, koe foha ia o Neumi, koe foha ia o Esilai, koe foha ia o Naki,

26 Koe foha ia o Mati, koe foha ia o Matatiasi, koe foha ia o Semiai, koe foha ia o Josefa, koe foha ia o Juta,

27 Koe foha ia o Joana, koe foha ia o Lisa, koe foha ia o Solobebeli, koe foha ia o Saletieli, koe foha ia o Nilai,

28 Koe foha ia o Milikai, koe foha ia o Atai, koe foha ia o Kosami, koe foha ia o Elimotami, koe foha ia o Ea,

29 Koe foha ia o Jose, koe foha ia o Eliesa, koe foha ia o Jolimi, koe foha ia o Matati, koe foha ia o Livai,

30 Koe foha ia o Simione, koe foha ia o Juta, koe foha ia o Josefa, koe foha ia o Jonani, koe foha ia o Iliakimi,

31 Koe foha ia o Melia, koe foha ia o Menani, koe foha ia o Matata, koe foha ia o Netani, koe foha ia o Tevita,

32 Koe foha ia o Jese, koe foha ia o Obeti, koe foha ia o Boasi, koe foha ia o Salimoni, koe foha ia o Neasoni,

33 Koe foha ia o Aminitabe, koe foha ia o Elami, koe foha ia o Esiloni, koe foha ia o Felesi, koe foha ia o Juta,

34 Koe foha ia o Jekobe, koe foha ia o Aisake, koe foha ia o Ebalahame, koe foha ia o Tela, koe foha ia o Nekoa,

35 Koe foha ia o Seluki, koe foha ia o Lekoa, koe foha ia o Feleki, koe foha ia o Heba, koe foha ia o Sala,

36 Koe foha ia o Kenani, koe foha ia o Afakisati, koe foha ia o Semi, koe foha ia o Noa, koe foha ia o Lemeki,

37 Koe foha ia o Metusela, koe foha ia o Inoke, koe foha ia o Jeleti, koe foha ia o Melilieli, koe foha ia o Kenani,

38 Koe foha ia o Inosi, koe foha ia o Seti, koe foha ia o Atama, koe foha ia oe Otua.