¶ 1 BEA behe, kuo hili ia, naa ne alu i he kolo moe botu kakai kotoabe, o malaga mo fakaha ae ogoogolelei oe Otua: bea nae iate ia ae toko hogofulu ma toko ua,

2 Bea moe kau fefine nae fakamoui mei he kau laumalie kovi, moe gaahi mahaki, ko Mele oku ui ko Makitaline, aia nae alu ai ae tevolo e toko fitu,

3 Mo Joana koe unoho o Kusa koe tauhi koloa o Helota, mo Susana, moe toko lahi kehe, naa nau tauhi aki ia e nau koloa.

¶ 4 Bea kuo fakataha mai ae fuu kakai, kuo ha‘u mei he kolo kotoabe kiate ia, bea behe eia i he fakatātā:

5 Nae alu atu ae tagata tutui ke tutui ene tega; bea i he ene tutui, nae mokulu ae niihi ki he vee hala: bea malaki hifo ia, bea nae kai o oji ia e he faga manu buna oe atā.

6 Bea mokulu ae niihi ki he maka; bea kuo toki tubu hake ia, bea mae  leva, koeuhi nae ikai viviku ia.

7 Bea mokulu ae niihi ki he akau talatala; bea tubu hake mo ia ae akau talatala, o kājia ai ia.

8 Bea mokulu ae niihi ki he kelekele lelei, o tubu hake, bea tubu ai ae fua e teau. Bea kuo ne lea aki ae gaahi mea ni, bea kalaga ia, Ko ia oku ne teliga ogo, ke ogo‘i ia.

9 Bea nae fehui a ene kau akoga kiate ia, o behe, Koeha nai  hono uhiga oe fakatātā ni?

10 Bea behe eia, Kuo tuku ke ilo ekimoutolu ae gaahi mea lilo oe buleaga oe Otua: ka ki he kakai kehe i he gaahi fakatātā; koeuhi ke nau a ka e ikai mamata, bea fanogo ka e ikai ilo.

11 Bea koe fakatātā eni: Koe tega koe folofola ia ae Otua.

12 Ko kinautolu  eni he vee hala, oku nau fanogo; bea toki ha‘u ae tevolo, o ne too atu ae folofola i ho nau loto, telia naa nau tui bea moui ai.

13 Ko kinautolu  eni i he maka, aia oku fanogo, bea ma‘u ae folofola i he fiefia; ka oku ikai ha nau aka, bea oku nau tui fuoloa jii be, bea i he aho oe ahiahi oku nau higa ai.

14 Bea koia nae mokulu ki he akau talatala, ko kinautolu eni oku fanogo bea alu atu, ka koe tokaga  mamahi moe koloa moe fiefia i mamani, oku kājia ai ia, bea e ikai ai ha fua ke haohaoa.

15 Ka koia oku i he kelekele moui, ko kinautolu eni oku nau fanogo ki he folofola, o ma‘u  ia ki he loto totonu mo lelei, bea faka tubu ae fua i he fakakukafi.

¶ 16 Oku ikai ha tagata te ne tutu ae māma, ke fakabuloga aki ae ibu, be tuku  ia ki he lalo mohega; kae fokotuu  ia ki ha tuuga, koeuhi ke mamata ki he māma akinautolu oku  i ai.

17 He oku ikai ha mea oku lilo, e tae fakaha; bea oku ikai ha mea oku fufu, e tae iloa be tae mafola kitua.

18 Koia mou tokaga ki hoo mou fanogo: he ko ia oku ma‘u, e foaki kiate ia; bea ko ia oku ikai te ne ma‘u, e too meiate ia aia oku ne mahalo kuo ne ma‘u.

¶ 19 Bea ha‘u ai kiate ia a ene fa‘e mo hono kaiga, ka nae ikai te nau ofi kiate ia, koe mea i he kakai.

20 Bea nae fakaha kiate ia, o behe, Ko hoo fa‘e mo ho kaiga oku tutuu itua, ko e nau holi ke mamata kiate koe.

21 Bea lea ia, o beheage kiate kinautolu, Ko eku fa‘e mo hoku kaiga akinautolu ni oku fanogo ki he folofola ae Otua, mo fai ki ai.

¶ 22 Bea behe, i he aho e taha, nae heka vaka ia mo ene kau akoga: bea behe eia kiate kinautolu, Ke tau o ki he kau vai e taha. Bea naa nau tuku atu.

23 Ka i he e nau folau nae mohe ia: bea nae to hifo ki he tahi ae taufa lahi: bea gotofuu  ae vaka, bea nau tuutama-ki ai.

24 Bea naa nau ha‘u, o fafagu ia, mo nau behe, Eiki, eiki, kuo tau mate. Bea tuu hake ia, o lolomi ae matagi moe hou ae tahi; bea tuku ia, o to-fuki.

25 Bea behe eia kiate kinautolu, Kofaa hoo mou tui? Ka nae manavahe mo ofo akinautolu, o nau febeheaki, Kohai nai ae tagata ni! he oku fekau eia ki he matagi moe tahi, bea oku talagofua ia kiate ia.

¶ 26 Bea naa nau tau ki he fonua oe kakai Katala, aia oku hagatonu ki Kaleli.

27 Bea i he ene alu ki uta, nae fakafetaulaki mai kiate ia ae tagata e toko taha mei he kolo, nae fuoloa ae ulujino iate ia ae kau tevolo, nae ikai ke vala, be nofo fale, ka i he gaahi faitoka.

28 Bea mamata ia kia Jisu, bea kalaga, mo fakatomabee i hono ao, o  tagi le‘o lahi, o behe, E Jisu, Alo oe fugani Otua maoluga, koeha au kiate koe? oku ou kole kiate koe, oua e fakamamahi‘i au.

29 (He kuo fekau eia ki he laumalie uli ke ha‘u kitua mei he tagata. He kuo liuga lahi hono buke ia: bea nae ma‘u ia i hono ha‘ijia aki ae gaahi ukamea fihifihi moe gaahi ukamea fakamau; kae motuhi eia ae gaahi ha‘i, bea tuli ia e he tevolo ki he toafa.)

30 Bea fehui a Jisu kiate ia, o behe, Kohai ho higoa? Bea behe eia, Ko Lijione: koeuhi kuo hu kiate ia ae kau tevolo toko lahi.

31 Bea naa nau kole kiate ia, ke oua te ne fekau akinautolu ke nau alu atu ki he loloto.

32 Bea nae ai ae faga buaka lahi nae fafaga i he mouga: bea naa nau kole kiate ia ke ne tuku ke nau hu ki ai. Bea ne tukuage ia.

33 Bea alu atu  leva ae kau tevolo i he tagata, o nau hu ki he faga buaka; bea felele‘i o oho ae faga buaka i he botu tahifohifo ki tahi, o melemo ai.

34 Bea kuo mamata ae kau tauhi manu ki he mea kuo fai, bea nau feholaki, o alu o fakaha i he kolo moe tukuuta.

35 Bea naa nau alu atu ke vakai be koeha kuo fai, o ha‘u kia Jisu, bea ilo ae tagata, aia kuo alu ai ae kau tevolo, oku nofo ia i he va‘e o Jisu, kuo kofu, bea boto hono loto: bea naa nau manavahe ai.

36 Bea ko kinautolu foki nae mamata  ki ai, naa nau tala kiate kinautolu ae gaue kuo moui ai ia, aia nae ulujino ai ae kau tevolo.

¶ 37 Bea toki kole ae kakai kotoabe oe fonua oe kau Katala ke alu ia iate kinautolu; he kuo nau bukea i he ilifia lahi: bea heka ia ki vaka, o  toe liu mai.

38 Bea koe tagata nae alu ai ae kau tevolo, naa ne kole kiate ia ke na nonofo mo ia: ka nae fekau e Jisu ke alu ia, o ne behe,

39 Toe alu koe ki ho fale, o fakaha ae gaahi mea lahi kuo fai e he Otua kiate koe. Bea nae alu ia, o ne ogoogoa i he kolo kotoabe ae gaahi mea lahi kuo fai e Jisu kiate ia.

¶ 40 Bea behe, kuo fokiage a Jisu, nae  toe ma‘u fiefia ia e he kakai: he naa nau tatali kotoabe kiate ia.

41 Bea vakai, nae ha‘u ae tagata ko Jailosi hono higoa, koe bule ia i he fale lotu; bea ne fakatomabee ki he va‘e o Jisu, o kole kiate ia ke ha‘u ki hono fale:

42 He kuo taha be hono ofefine, bea kuo hogofulu ma ua nai hono ta‘u bea kuo tei mate ia. Ka i he ene alu nae fakaefi ia e he kakai.

¶ 43 Bea koe fefine e toko taha nae iate ia ae au oe toto, i he ta‘u e hogofulu ma ua, bea kuo fakaoji eia a ene mea kotoabe ki he kau faitoo, ka nae ikai ke moui ia i ha taha,

44 Nae ha‘u ia ki  hono tua, o ala ki he kaba o hono kofu: bea matuu leva ae au o hono toto.

45 Bea behe e Jisu, Kohai kuo ala kiate au? Bea kuo nau ikai kotoabe, bea behe e Bita mo kinautolu naa nau iate ia, Eiki, oku fakaefi mo kabui koe e he kakai, bea oku ke behe, Kohai kuo ala kiate au?

46 Bea beheage e Jisu, Kuo ala ha taha kiate au: he oku ou ilo kuo alu ae malohi iate au.

47 Bea kuo ilo e he fefine oku ikai lilo ia, bea ha‘u teteteke ia, o fakatomabee i hono ao, o ne fakaha kiate ia i he ao oe kakai kotoabe hono uhiga o ene ala kiate ia, bea mo ene moui ai leva.

48 Bea behe eia kiate ia, Ofefine, ke ke fiemalie: kuo fakamoui koe e hoo tui; alu o fiemalie.

¶ 49 Bea nae lototoga ene lea, mo ene ha‘u ae toko taha mei he  fale oe bule oe fale lotu, o ne behe kiate ia, Kuo bekia ho ofefine; oua naa fakafiu‘i ae Eiki.

50 Ka kuo fanogo ki ai a Jisu, bea lea ia, o behe kiate ia, Oua te ke manavahe: ka ke tui be, bea e fakamoui ia.

51 Bea kuo ha‘u ia ki he fale, nae ikai te ne tuku ke hu  ki ai ha taha, ka ko Bita, mo Jemesi, mo Jone, bea moe tamai moe fa‘e ae taahine.

52 Bea naa nau tagi mo tagilāulāu kotoabe koeuhi ko ia: ka naa ne behe, Oua e tagi; he oku ikai mate ia, ka oku mohe  be.

53 Ka naa nau kakata manuki kiate ia, ko e nau ilo kuo mate ia.

54 Bea ne tuku akinautolu kotoabe kitua, bea buke hono nima, o ne ui, o behe, Taahine, tuu hake.

55 Bea nae toe ha‘u a hono laumalie, bea tuu hake leva ia: bea ne fekau ke atu haa ne mea kai.

56 Bea ofo ai a ene mātua: ka nae fekau eia kiate kinaua ke oua naa na fakaha ki ha taha aia kuo fai.